تحدي القراءة السنوي 2022

مع نهاية سنة 2022 دايماً بيكون فيه وقت تراجع فيه كل حاجة عملتها في السنة دي سواء كانت أهدافك اللي عايز تحققها أو حتى بعض الأمنيات اللي كان نفسها تحصل في السنة، لكن بالنسبالي كان دايماً يتردد عليا سؤال واحد بس "هعمل أيه في تحدي القراءة؟" لأن الآن تحدى القراءة يعتبر من أهم الأولويات اللي لازم أرتبها في السنة وبقعد وقت طويل أحسب أنا هتجه لأيه وهقرأ أيه ، وأخيراً بعد الإنتهاء من السنة الرائعة دي تعالي نكتشف ايه الكتب اللي قرأتها في السنة دي مع إقتراحات لكتب تانية مختلفة وفي الأخير هتكلم عن تحدي سنة 2023 وهيكون متقسم إزاي!

ما قبل التحدي ... ليه التحدي موجود؟

فكرة التحدي جت في أول سنة ليا في الكلية في سنة 2019 وجت لأني كنت بحاول أشوف عالم القراءة ده عن ايه وإيه اللي يخلي جمهور كبير يكون متعلق بالكتب.

محتاج تعرف إن التحدي ده بالنسبالي هو مجرد طريقة أقدر أخلي نفسي قارئ بشكل متمرس وإني موصلش لمرحلة إني مش هقرأ كتب تاني، وعلى الرغم أن فيه أوقات بكون مخلص فيها التحدي لكن فيه اوقات برده بخسر لكن كل ده مش مهم ... الأهم هو الأستمرارية الكاملة للقراءة والإستفادة المستمرة!

تعمل التحدي للسنة الجديدة إزاي؟

لو حابب تعمل زي ما عملت محتاج تفتح حساب من موقع أو برنامج Goodreads ، الموقع ده بشكل عام عامل زي IMDB لكنه للكتب فالفكرة ببساطة لو حابب تبحث عن كتاب وتشوف تقييم الناس ليه أيه أو مستواه مقارنةً بباقي الكتب التانية هيكون الموقع ده مناسب ليك ... بعد ما تسجل وتعمل حسابك وتفعل الحساب هيجيلك في أول السنة Reading challenge وأنت اللي بتختار عدد الكتب اللي هتخلصها في السنة هتكون كام ، أنا عن نفسي ماشي بالرقم 10 طول الوقت لأنه بيتيح ليا وقت كبير على كل كتاب أقرأه حق قراءة!

متستغربوش رواية أوبال اللي متكررة مرتين مش عارف أحلها☠

الكتاب الأول "Introduction of the short story"

حيبت أني أتكلم الأول عن الكتاب ده لأنه بالفعل هي محاولتي الأولى لقراءة عمل كامل بالإنجليزي وكويس جداً إن أختياري كان في محله!

فكرة الكتاب ده أنه بيجيبلك قصص صغيرة كتير سواء كان ليها فكرة أو لا وفيه منها اللي معروفة وتعتبر من أحسن القصص القصيرة اللي في العالم، هدف الكتاب زي ما كان مكتوب بالضبط في أول الصفحات هو إنك متنزعجش من الكتاب أو لغة الكتاب وفي نفس الوقت تستمتع بالكتاب والقصص اللي موجودة فيه ... صحيح إني لما قرأت الكتاب وقفت قدامي أكتر من 75 كلمة لكن مش مشكلة🤣، أغلب القصص القصيرة كانت تستحق القراءة وفيه قصص كنت بخلصها في يوم واحد من كتر عظمتها ... أنت ومستواك في الإنجليزي هو اللي هيحدد مستوى الإستمتاع اللي هتلاقيه 

التقيم : 9/10

على فكرة سبق وإتكلمت عن رحلتي في تعلم اللغة الإنجليزي وإتكلمت عن نصايح ممكن تعملها لو عايز تتعلم من وجهة نظري فلو مستواك مش عالي أنصحك بقراءة المقالة دي أو الإشتراك في النشرة بشكل عام🥺

رحلتي في تعلم اللغة الإنجليزية! - مساحة أدهم | هدهد

الكتاب الثاني "التجربة الفكرية لروح أمه"

من أغرب العناوين اللي لاقيتها في الكتب بشكل عام🤣،لكن صراحةً من أول ما قرأت اول صفحات الكتاب فهمت هو الكاتب بيتكلم عن أيه ، الكتاب من الآخر مش عايز يلف ولا يدور هو بيتكلم باللغة المصرية العامية وبيتكلم عن مواضيع كتير جداً بطرق مختلفة من غير أي تجويد أو حتى تفاصيل قد تكون غير مهمة ،وده اللي ممكن تلاقيه الإيجابي الأساسي في الكتاب إنك بس هتلاقي معلومات قيمة بطريقة سهلة "جداً" ، العيوب قد تكون شخصية بالنسبالي هو أني مش متعود على القراءة 

التقييم : 7/10

لو حابب تعرف أكتر

الكتاب الثالث "حوار مع صديقي المُلحد"

حوار مع صديقي المُلحد هو من أوائل الكتب اللي قرأتها للكاتب مصطفي محمود والكتاب كان رائع جداً ... الكتاب بيتكلم عن تساؤلات شخص مُلحد لمصطفى محمود وبيتكلم الكتاب عن مواضيع كتير جداً سواء عن ربنا او القدر أو المرأة وغيره ، من الإيجابيات الرائعة اللي هتلاحظها هي قدرة الدكتور مصطفى محمود على الإجابة بطريقة مقنعة جداً لكل سؤال وغير كده الأسئلة اللي بتتسأل في الكتاب مشهورة ويمكن الكل بيتكلم عنها الأيام وهنا يكمن الجهور إزاي أن الكتاب مكتوب اساساً من فترة طويلة وأسئلته لسه موجودة حتى الآن ... كتاب رائع جداً أنصح بقرأته أكتر من مرة!

التقييم : 10/10

انا معايا الكتاب ورقي فلو حابب تشتريه ويجيلك لحد البيت تواصل معايا على الفيس

لو حابب تشوف تقييم الكتاب أضغط هنا

حوار مع صديقي المُلحد | Facebook

الكتاب الرابع " عصر القرود"

عصر القرود هو ثاني كتاب أقرأه بعد ما قرأت حوار مع صديقي المُلحد علطول وكان كتاب قيم، الكتاب بيتكلم عننا كبشر وإزاي الزمن ده أباح للمثيرات والإباحية تتغلغل في اغلب البيوت ، إزاي إتكونا وأزاي نقدر نفهم نفسنا ونفهم المحتوى اللي بنتعرضله كل يوم، كتاب رائع وصغير جداً مأخدش من وقتي يومين بالكتير وخلصته ... لكن تجربة الكتاب رائعة وتستحق القراءة

التقييم : 10/10

لو حابب تعرف أكتر عن الكتاب أضغط هنا

الكتاب الخامس "Wonder"

رواية Wonder من الروايات اللي أكتشفتها عن طريق فيلم فكنت شايف فيلم Wonder من فترة طويلة ولما عرفت إن ليه رواية قررت إني أنتهز الفرصة وأقرأ الرواية وخصوصاً بالإنجليزي، العظيم جداً إن الرواية بتتحكي من عيل صغير فاللغة مكانتش صعبة بتاتاً والقصة كانت رائعة والشخصيات بسيطة لأبعد درجة خلت من قراءة الرواية مهمة بسيطة على النفس إنها تخلصها ، فعلاً رواية جميلة لو حابب إنك تبدأ فعلاً بيها لأنها مش صعبة كأنجليزي وكمان قصة جميلة تستمتع بيها
أنا عارض الكتاب ده ورقي فلو حابب تستمتع باللحظة وإنت بتقرأ الكتاب كلمني على الفيس

رابط الmarketplace (لو حابب تعرف أكتر عن الكتاب إضغط هنا)

الكتاب السادس : أوبال (مملكة البلاغة)

أوبال بشكل عام تُعتبر الجزء الثاني من سلسلة مشهورة للكاتبة حنين لاشين تُعرف بإسم "مملكة البلاغة" لكن ولأن قصص مملكة البلاغة ممكن تعتبرها قصص منفصلة لوحدها فتقدر تعتبر الرواية دي حاجة لوحدها ، ميزة الرواية إنها وكعادة الكاتبة حنان لاشين دايماً تحب تمتعنا بالشخصيات والوصف الرائع لكل حاجة ، الأماكن والأحداث والشخصيات تم وصفها وسردها بطريقة جميلة تُرضي أي قارئ ، رواية جميلة وسرد أكتر من رائع لو حابب تبدأ في السلسلة من الأساس فأبدأ برواية إيكادولي اللي لا تقل روعة عن أوبال

الكتاب السابع : Rich dad poor dad

جينا بقى للمعلم🤯الكتاب اللي فعلاً فادني حتى الآن في حياتي وفي تفكيري عن الفلوس ، الكتاب بيقدم مصطلحات مبسطة عن الفلوس والتفكير في الفلوس وإن ازاي الجيل ده مش بيعلم الناس إزاي تفهم الفلوس وتجيب الفلوس ، كتاب مليان حاجات مختلفة من إزاي تعمل المشروع الخاص بيك وإزاي تفهم قدرتك على عمل الفلوس ... صراحةً مش هقدر أتكلم عن الكتاب كتير لأنه يستاهل إنك تكتشفه بنفسك وسبق إني إتكلمت عنه في مقالة قبل كده ممكن تشوفها وتقرأها

الكتاب عندي منه ورقي فلو حابب تشتريه مجرد تواصل معايا هنا

ما تعلمته من "الأب الغني والأب الفقير" - مساحة أدهم | هدهد

الكتاب الثامن: باري

باري من الروايات اللي أكتشفتها بالصدفة وانا بدور في المكتبات ومكنتش أعرف إنها بالتقييم العالي ده ، كل الناس كانت بتقول الرواية رائعة والشخصيات عظيمة كتابياً وسرداً وكلامهم بالفعل هو اللي خلاني أبدأ في رواية باري والحمد لله إني بدأت ... الرواية بتغطي أحداث مهمة حصلت للمسلمين في بريطانيا والراوية بتدي لكل شخصية حقها في الظهور والأحسن ان الكاتب مخلاش كل حاجة تتحكي عن المسلمين بس فأدى فرصة للكفار وقتها بالظهور وإظهار شخصيتهم ، الرواية طويلة لكنها تستحق بشدة!

لو حابب تعرف أكتر عن الكتاب إضغط هنا

الكتاب برده عندي منه ورقي فلو حابب تشتريه مجرد تواصل معايا من هنا

الكتاب التاسع : الهشاشة النفسية

كتاب الهشاشة النفسية هو كتاب لقيته بالصدفة وأنا بدور على أي حاجة أقرأها في شهر 11 ، كتاب تم إقتراحه بشدة من قبل صاحب قناة "جيل يقرأ" وهو بالمناسبة شخص أتابعه بشكل غريب، لما أقترح الكتاب بنفسه قلت ليه لا ما يمكن يكون حلو، هو مش بس طلع حلو لكنه كتاب رائع جداً ، أولاً الكتاب بيتكلم عن النفس وإزاي النفس دي بقت هشة بسبب سهولة الجيل الجديد وعدم تعرضه للمخاطر ، إزاي الجيل الجديد بقى بيزعل على مشاكل كانت زمان تافهة وتتحل بسهولة ، إزاي إن المراهق بيكون عنده جهل غريب وقدرة عالية على الإستمتاع بالمتعة اللحظية أحسن من المتعة الحقيقية، مابالك بالمشاكل العاطفية اللي على الإنترنت واللي أغلبها بينتهى بإكتئاب حاد! ، كتاب جميل سرد كل المشاكل مع المصادر بتاعتها فالكاتب فعلاً بيحاول يشرح مشكلة الكل واقع فيها وإزاي نقدر نحلها ومنبقاش هشين نفسياً !

لو حابب تعرف أكتر عن الكتاب أضغط هنا

الكتاب العاشر :الشيطان يحكم

الشيطان يحكم هو آخر كتاب أختتمته في السنة وهو كتاب للكاتب الرائع دكتور مصطفى محمود بشكل عام هي مجموعة مقالات ينتقد فيها الكاتب ما طرأ على المجتمع المصري من تغيرات إجتماعية وإنسانية في ذلك الوقت من ثمانينيات القرن الماضي ، كتاب رائع بسرد لطيف مش صعب على القارئ إنه يفهمه ، والأحسن واللي تزود من الكتاب قيمة هي إزاي دكتور مصطفي محمود بيتكلم عن مشاكل المفروض تكون قديمة لكنها مازالت متوغلة في عالمنا الحالي.

التقييم : 9/10

لو عايز تعرف أكتر عن الكتاب إضغط هنا

خطة سنة 2023

صحيح إن لسه بدري عقبال ما تيجي السنة الجديدة لكن أنا قلت إني أخطط من بدري للموضوع ده بحيث لما أبدأ أكون أكثر دقة وأحصل على نتيجة سنة أكثر فائدة من قبل كده ، طبعاً والشئ اللي لن يتغير هو إن عدد الكتب هتكون 10 زي كل سنة ومعتقدش في يوم هزود عن كده لأن 10 كتب في السنة كافيين بالنسبالي جداً ، المشكلة الوحيدة إن في سنة 2022 مكنش فيه النوعية اللي كنت بحتاجها فاللي ملاحظ هيلاقي إني يا إما بقرأ روايات أو بقرأ كتب للتنمية البشرية وده شئ لا يرضيني بالمرة أولاً لأني لقيت إن فئة التنمية البشرية مبقتش تجيب معايا سكة أبداً وغير كده إني كنت حابب اجرب حاجات مختلفة من مجالات كتير مجربتهاش قبل كده

فخطتي المرة دي إني هختار كتاب من فئة واحدة ولما أخلصه مش هقرأ كتاب تاني بنفس الفئة خالص والفئات هي :

• كتاب تاريخي أو بيتكلم عن حقبة تاريخية
• كتاب ديني
• رواية
• كتاب أجنبي (أياً كان)
• عمل رومانسي أو عن العلاقات
• سيرة ذاتية لشخص معين
• كتاب علمي عن مشكلة أو مرض
• كتاب عن الفلوس
• كتاب عن إزاي أعمل حاجة معينة (حسب الإهتمام)
• كتاب تنمية ذاتية

التقسيمة دي مش س هتخليني أجرب حاجات مختلفة في نفس الوقت لكن هتفتح أبواب جديدة لو حابب أتعمق في موضوع معين

في الأخير لو حابب تتواصل معايا في موضوع معين أو حتى حابب تشوف إيه الكتب اللي حاططها في الليست بحيث لو حابب تقرأ شبهي تواصل معايا هنا ونستفاد سوا

DONE