ما تعلمته من "الأب الغني والأب الفقير"

  سؤال بسيط قبل البداية "مين مش بيحب الفلوس؟" ، والجواب أن لا أحد في العالم ده مش بيحب الفلوس ، أصل فكر فيها لما تيجي الفلوس في دماغك يعني قدرتك على شراء اي حاجة وقت ما تحب ، عربيات موبايلات أو أي حاجة تانية أنت عايزها ، لكن إنك إزاي تعمل الفلوس دي ... ده هو اللغز اللي مش كتير بيقع فيه، وده كان حالي فعلاً فكنت عايز أفكر أكتر إزاي أقدر أعمل فلوس أو الأحسن إزاي أفهم الفلوس، وبعد بحث لقيت الكتاب اللي أقدر أقول عنه الأب الروحي للكتب اللي بتتكلم عن الفلوس ، كتاب أرجحه لأي حد مقرأش قبل كده عن الفلوس وهو كتاب الأب الغني والأب الفقير

الكتاب هيكون متقسم لعناوين وفي كل عنوان هتكلم عليه بتفصيل بسيط وأيه اللي فهمته ولو أحسن ممكن أتكلم عن أمثلة للي بيتكلم عنه

مصطلحات مهمة قبل البدأ

خلينا هنا نتفق ان الكتاب بيتكلم عن الفلوس، وطالما بيتكلم عن الفلوس فهيقول حاجات قد لا تبدو سهلة لما يتم شرحها للمرة الأولى ، أساساً أغلب الكتاب بيتكلم عن الرجل الغني والرجل الفقير من حيث الفكر والشغل وغيره، كمان بيتكلم عن الضرايب والمحاسبات وحاجات كتير تخص الفلوس بشكل خاص وعلشان كده هحاول أتكلم عن الحاجات الأساسية قبل ما أبدأ في العناوين الرئيسية

Asset VS liability

من أهم المصطلحات اللي بيتكلم عليها الكتاب هو الفرق بين الأصول والإلتزامات وإزاي تفرق بين شخص والتاني ، وخلينا نتعامل مع كل شئ على حدى

الأصول كما يقول الكتاب هو أي قيمة مالية تُضاف إلى راتبك وشوف على كده أمثلة كتير مثل العقارات والمشاريع أو حتى إستثمار في الاسهم وغيرها من الحاجات اللي بتدخلك فلوس وأنت قاعد في بيتك، مشكلة الأصول أن إمتلاكها يحتاج إلى وقت طويل جداً ومجهود حتى توصل لمرحلة أن الأصل موجود يجيبلك فلوس بدون التدخل أبداً

وعلى عكس الأصول الإلتزامات هي أي قيمة مالية تُخصم من راتبك وعلى عكس الأصول هنلاقي الإلتزامات تترواح في النفقات وشراء الأشياء بالتقسيط او القروض وغيرها ، أشياء من السهل أنها تكون موجودة عند الكثير لكنها عبئ على صاحبها لأنه ملزم بدفعها

بما أننا فهمنا المصطلحين دول خلينا نتكلم عن تفكير كل شخص من أقل طبقة للطبقة الغنية، لو بدانا بالطبقة المتوسطة هنلاقي أن الراتب = النفقات فبيوصل لمرحلة أن الراتب مكفيه بالضبط بدون أي زيادة أو نقصان لكن اللي يخلي الموضوع أسوأ هو وجود إلتزامات تُلزم على الشخص أنه يدفعها، وكمان بالرغم من كده مفيش أصول أو دخل تاني يعلي من الفلوس فبيكون في موقف أنه مش قادر انه ينتظر لحد بداية الشهر علشان يسدد اللي عليه

ولما نيجي بقى للطبقة الغنية هنلاقي الموضوع مختلف تماماً ، أولاً والأكثر أهمية هو وجود دخل آخر غير الراتب يوصله "من غير تدخله" ودي مهمة جداً لأنها مش بتستنزف منه أي شئ وحاجة موجودة علشان تجيب دخل فقط ، والشئ التاني أن الإلتزامات مش كتير على عكس الطبقة المتوسطة فبيوصل الغني أنه عنده فلوس أكتر وأكتر لأنه مش مُلزم بدفع شئ

كل المصطلحات دي والرسومات الأساسية دي شئ أساسي في الفلوس لأن فيه قاعدة مهمة جداً في فكرة الغناء والفقر "الوظيفة ليست السبيل الوحيد لكسب المال" لأن فيه الكثير والكثير من الفرص علشان تكسب دخل إضافي غير وظيفتك ، حاجة كده لو وصلت ليها بتوصل أنك بتطلع من حاجة يسميها الكاتب "سباق الفئران" وهو مصطلح عن العالم اللي عايشين فيه دلوقتي.

وهنا بقى خلينا نتكلم عن العناوين الرئيسية وأيه اللي قدرت أفهمه منها!

الفقير يعمل من أجل المال أما الغني فالمال يعمل لديه

أنا عارف أن الكلام اللي هقوله دلوقتي قد يبدو كلام أفلام ومش هتطلع منه بحاجة لكن لو فكرت في الكلام ده هتلاقي أن اللي بيقوله الكاتب صحيح تماماً

لو جينا نتكلم عن الفلوس فأغلب الناس هتقول أن دخلها الأول والأخير هو الوظيفة، الشئ اللي بيوصل ليه الشخص سواء من اللي أتعلمه من الجامعة والمدارس أو حرفة قدر يوصل لمرحلة كبيرة فيها وده مش غلط ، الغلط هو عدم وجود دخل تاني يضيفه لراتبه خصوصاً لو اللي بيتكلم ده دخله قليل ، لو سألت نفس السؤال للغني هتلاقي الموضوع مختلف تماماً ، أولاً هنلاقي أن الدخل عنده ليه أكثر من منفذ وفكرة الوظيفة مش هتكون بالشئ العالي بالنسباله ، فهتلاقيه بيتكلم عن أملاك وأصول ومشاريع وحتى حرف تانية غير شغله الأساسي، ده اللي بيميز الشخص الغني عن الفقير أنه بيستغل قدراته في عمل حاجة تساعده وتسنده عن الوظيفة وعن الراتب الأساسي.

الموضوع مش أنت تنفق قد أيه لكن أنت تدخر قد ايه

علشان أكون صريح معاك الفصل ده كان صعب عليا أن أنا أفهمه، الفكرة وببساطة أن الشخص بدل ما يتجه للأنفاق يتجه للإدخار بحيث ينفق الإدخار ده في حاجة مفيدة، الشئ اللي قد يبدو للوهلة الأولى أنه كويس فكون لو فيه حد بياخد راتب 5000 جنية فهيكون فيه قدر من الفلوس بيتخزن لحاجة تقدر ترجعلك الفلوس دي أضعاف ، الفكرة الوحيدة أن الشئ ده صعب جداً يكاد يكون مستحيل لبعض الناس ، أولاً لفكرة الإنفاق نفسها أن فيه ناس وراهم مصاريف كتير وراتبهم مش بيكفي متطلباتهم فهيكون فكرة الإنفاق فكرة مش سهلة بالنسبالهم أبداً

لكن بعد وقت ادركت أن فكرة الإدخار قد لا تبدو بالشئ العالي ، طالما أنت فهمت فكرة أنك لازم تلاقي دخل مختلف غير الوظيفة وحققت الشرط ده مش من الصعب إنك تلاقي مساحة تقدر تخزن فيها فلوسك بأمان وسهولة.

أنا في يوم هتكلم بشكل مفصل عن إزاي تقدر تكسب فلوس من الكلية من خبرتي الشخصية في النشرة فتأكد إنك عامل إشتراك علشان يوصلك كل جديد

طريق الوصول للدخل الزائد

دلوقتي عرفنا أننا محتاجين دخل إضافي غير دخلنا العادي لكن السؤال إزاي ، المشكلة تكمن في الشخص اللي مشتغلش ولا مرة حتى الآن إزاي يجيب دخل إضشتغلش ولا مرة حتى الآن إزاي يجيب دخل إضافي ... هنا هنلجأ للشئ المفضل واللي لو عرفت تكون كويس فيه هتلاقي دخل إضافي حسب شغلك ألا وهو "المحتوى"

هنا أنت مش محتاج تعمل حاجة غريبة، مجرد أنك بتعمل صفحة بأسم غريب ومبتكر وتشوف أيه هيا الموهبة أو الهواية اللي تفضلها دايماً عن الباقي ، هواية أنت لو أتكلمت عليها مع حد هتلاقي أنك بتقعد ساعات وساعات في الموضوع ده ولنقل مثلا الكورة ، القراءة وحتى لعب الألعاب ... بمجرد ما تلاقي الهواية لاقي المنصة اللي تقدر تقدم فيها المحتوى بأحسن طريقة وتبدأ !

مشكلة الطريقة دي إنك مش هتلاقي النتائج إلا بعد وقت طويل جداً لأنك بتبني في الحساب أول بأول والمشكلة الرئيسية الأكثر أهمية هو مدى حماسك إتجاه المحتوى اللي بتقدمه وهنا هقدملك الشئ اللي أنا شايفه نصايح مهمة جداً في البداية ككاتب في نشرة أسبوعية

الثلاث أشهر دون المقابل

ببساطة شديدة أشتغل على المحتوى اللي بتقدمه ده فترة لا تقل على التلات شهور لكن بشرط إنك لا تنتظر الفولوز أو المتابعين بأي طريقة ، من الآخر خليك شغال مع نفسك وخلى الإنتشار بعدين ، مفيش مانع تنشر عملك للباقي لكن إنك تفتكر إن الشغل بتاعك هتلاقي ليه متابعين كتير مش سهل أبداً، فخلي دايماً إنك شغال مش للناس لكن لنفسك ولأنك حابب إللي تعمله وصدقني مع الوقت هتلاقي اللي يحب محتواك وشغلك!

حاول تتفهم الفكرة دي بشكل كافي لأن دايماً في البدايات مش هتلاقي المحفز الكافي اللي يخليك تتقدم ، أولاً مفيش متابعين على قد تعبك أو حتى الإهتمام اللي أنت كنت محتاجه من شغلك ، علشان كده حاول تشتغل أول 3 شهور من غير مقابل وبدون إنتظار أحد ، هي بس مشكلة وقت لحد لما تخلص الثلاث شهور ولو فعلاً واظبت على العمل الحلو والمحتوى الكافي هتلاقي المتابعين وكمان الدخل