بعيداً عن السوشيال ميديا لمدة شهر !

الجمعة 2 ديسمبر كان اليوم اللي قررت فيه أتكلم عن السوشيال ميديا وقد ايه كانت موقفاني في حاجات كتير سواء كانت في الدراسة او بشكل عام في الحياة اليومية، لكن النهاردة وبعد إنقطاع اكتر من شهر كمان على مواقع التواصل بقت رؤيتي للمواقع دي مختلفة تماماً والنهاردة بأذن الله هتكلم عن ايه اللي قدرت أستفيد منه بعد شهر إنقطاع عن السوشيال ميديا

ايه اللي السوشيال ميديا بتحاول تقدمه؟

منذ زمن كان السوشيال ميديا مكان يُسمى بالفعل مكان تواصل إجتماعي فتقدر تشوف صحابك واهلك بيعملوا ايه وبنشروا سواء صور او بوستات أو غيره ولما انت بتنشر بتشوف تعليقات الناس اللي حواليك وغيره. ده وقتها كان في حد ذاته حاجة في منتهى العظمة ففكرة أن فيه منصة او مكان أبعت فيه صورة فكل أصدقائي وأهلي يشوفوها ده شئ يبان أنه كويس لكن المشكلة أن الوضع الحالي ومع تقدم السوشيال ميديا بدأ الموضوع بتخد جزء مختلف تماماً. بدأنا نلاحظ على الناس آثار الإكتئاب المستمر وكان السبب الدائم هو السوشيال ميديا لأنها ببساطة بتوريك اللي هو أحسن وأفضل منك بأستمرار فبتكون في حالة من الحزن إنك مش قادر توصلهم، حتى أن فيه كام بحث فعلاً لقى ربط مهم جداً بين السوشيال ميديا والأكتئاب والحزن المستمر.

Social media and mental health

أتكلمت قبل كده عن اسبابي في ليه قررت أسيب السوشيال ميديا لمدة شهر وإزاي إنها قللت من الإنتاجية والشغل الخاص بيا في الكلية ده غير القلق المستمر وغيره وبالفعل عديت الشهر وزيادة كمان وهنا حابب أتكلم وبشكل مختصر عن ايه اللي أستفده من خلال إنقطاعي عن السوشيال ميديا !

انا أعمل ايه بقى؟

من الحاجات اللي كانت قلقاني دايماً هو "انا هعمل أيه في الوقت الفاضي؟" لان يعتبر أغلب الوقت الفاضي بتفرج فيه على السوشيال ميديا كنوع من التسلية لكن بعد ما مسحتها أنا فعلياً معنديش حاجة خالص أعملها ، لكن صدقني ياع عزيزي المشاهد ده يعتبر أحسن حاجة حصلت بعد ما شلت السوشيال ميديا من دماغي. أنا فعلاً فضيت لكل حاجة انا كنت عايز وحابب أعلمها لكن بسبب السوشيال ميديا وقفتها فمثلاً رجعت للقراءة تاني وبشكل أحسن ، بدأت أتعلم المونتاج وأزاي أقدر أعمل فيديوهات وغيره وغيره من الحاجات الجديدة. مع عدم وجود السوشيال ميديا هتدرك قد أيه أنت بتضيع وقتك في حاجات توهملك انها مهمة لكنها في الحقيقة غير مهمة تماماً

فيه حاجة اتعلمتها من الوقت ده هو ان فيه حاجة اسمها "FOMO" او "fear of missing out" وهو ان الفكرة اننا كبشر خايفين إننا منعرفش الجديد ، قلقانين دايماً أن فيه حاجة تفوتنا أو منعرفهاش والسوشيال ميديا طورت الموضوع لدرجة أن فيه ناس بتخاف أنها يفوت عليها تريند أو ايه اللي حصل لشخصية معينة وهكذا. بمجرد ما تشيل السوشيال ميديا من حياتك هتلاحظ في الأول شوية صعوبات لكن بعدين كل التفكير والقلق بيتحول لهدوء ومش هتلاقي نفسك بتفكر في التريندات تماماً.

التركيز لما هو اهم

التركيز على النفس هو اهم حاجة هتقدر تكتسبها بعد ما تشيل السوشيال ميديا من دماغك. السوشيال ميديا ممكن تلاقي ضررها مختلف من شخص للتاني لكن بالنسبالي أنا كانت الأهم لأنها كانت بتؤثر في دراستي وحياتي بشكل عام. لكن لما تخلصت منها بلاقي نفسي كويس بشكل عام. تركيزي مبقاش على موبايلي خلاص فبدل ما كان عدد ساعات فتح الموبايل 7 او 8 ساعات بلاقيها يمكن 3 او 4 ساعات أو ممكن كمان ساعة واحدة بس! واخيراً حاجة مهمة جداً كانت فايتاني !