ثانية واحدة كل يوم!

السلام عليكم! ... ازيك يا عزيزي المشاهد أخبارك؟! هل تصدق أن انا موجود حالياً بكتب على المدونة اللي بحاول كل مرة التزم بالكتابة ومش عارف ... لكن صدقني أنا سعيد سعيد جداً أني رجعت أكتب وسعيد أني أديت لنفسي وقت في أني أكتب عن حاجات انا كنت عايز اتكلم عليها من فترة ومعرفتش. اكيد أنت مستني مني سبب على القطعة الطويلة دي صح؟ صراحة هو كله بسبب الكلية اللي مقفاني ومقفة حال كتير من الشباب. لكن اللي لازم تعرفه أني مش هوقف ابداً عن الكتابة على الأقل في المكان ده ولو انا منشرتش فهتكون بسبب مشاكل بسيطة.

النهاردة هتكلم عن حاجة جديدة ، حاجة أنا شايف أنها ممكن تعجبكم ولو أخدتوا بفكرتها ممكن تحبوها جداً. النهاردة هتكلم عن فكرة وعن تطبيق بيحقق الفكرة دي بشكل فعال وقرار أنا أخدته مع نفسي اني أعمله في الترم ده! النهاردة هتكلم عن ثانية واحدة كل يوم وعن تطبيق 1SE

ايه هو تطبيق 1SE؟

تطبيق 1SE هو تطبيق بيخليك من خلاله تصور ثانية واحدة من يومك كل يوم. الفكرة دي في الأول مش هتكون واضحة لكن بعد ما يمر عليك وقت كبير زي شهر او سنة او أكتر بيكون عندك فيديو طويل يلخص كل اللي صورته والثواني اللي صورتها بتتجمع كاملاً في فيديو واحد.

الفكرة دي كانت في بالي وقت ما كنت شغال في التدوين لأنها لو فكرت فيها هي زي التدوين بالضبط لكن على هيئة فيديوهات صغيرة خالص. والشئ ده اللي خلا الموضوع قريب وسهل الحصول عليه من الكل لكنه الأصعب في الأستمرارية.

ليه بدأت الفكرة؟

بدأت الفكرة علشان كنت حابب استغل فرصة وجودي في بداية الترم التاني وأصور كل ثانية في الترم التاني عموماً. لو قدرت تحسبها هتكون تقريباً 4 أو 5 شهور فالفيديو هيكون في حدود 3 دقائق أو أكتر. فتخيل أنك بتصور كل ثانية من حياتك وبتتحط في فيديو فائق الروعة وجميل جداً .

أنا عملت فيديو كان في شهر فبراير اللي تم وشغال حالياً على شهر 3. أتمنى تكون الفكرة عجبتكم وممكن في يوم من الأيام تبدأوا حركة زي دي وأنا واثق أنك مش هتندم أبداً