شهر يناير ... بداية جديدة!

بهذا اليوم ينتهي شهر يناير .... حرفياً شهر عدى في ثواني بسبب الفاينال والمذاكرة اللي قطعتني عن العادات اللي كنت بعملها ... لكن ده مش معناه إني قطعت فعلاً عن كل حاجة لا أنا مازلت بقرأ لكن بشكل أقل من اللي كنت فيه ، والنهاردة هتكلم بشكل مبسط عن رحلتي في أني أخلص اهداف شهر يناير مع رؤية لشهر فبراير وأهداف شهر فبراير

كان فيه مصطلح بدأت أسمعه كتير خصوصاً في المواقع والمقالات الأجنبية وهي فكرة إنك تقسم أهدافك لأجزاء تخدم جزء معين منك ولما دورت وقعدت أدور كتير لقيت فعلاً اللي كنت عايز أعرفه وهو إن الجسم يحتاج مننا إننا نخدمه عن طريق 3 أشياء ، أهداف بدنية تتعلق بالجسم فعلاً وجزء عقلي ، الجزء العقلي هو جزء متخصص بكل ما أقدر أنمي العقل والفكر بيه سواء كان في العمل أو المعلومات العامة وغيرها ، وآخر جزء ه والجزء الديني وهو المختص بخدمة الروح ، الجزء ده عند الأجانب كان متمثل بشكل كبير جداً في التأمل والتفكر لأنهم مش بيضعوا الدين قيد الحسبان لكن ولإن ديننا لازم يكون جزء مهم من حياتنا فكان لازم أضع ليه ركن كامل أقدر فيه في سنة 2023 إني أوصل لمرحلة كبيرة من المعرفة اللي أتمني أني أقدر أحققها.

دي كانت وجهة نظري في سنة 2023 فمع فكرة التجزئة وهو إني أعامل الأهداف على إنها حاجة كبيرة جداً تتجزأ لحاجات اصغر فأصغر وغيره فبتخليك نوعاً ما متيقن إنك مقترب من الهدف اللي حابب توصله . حاجات كتير جداً حابب أتكلم عنها وياريت أعرف أحققها :)

أهداف شهر يناير

اهداف شهر يناير كانت البداية القوية والحماسية لأني كنت فيها منظم بالفعل اللي عايز أعمله ، مع فكرة خدمة الجسم من التلات جهات بقيت فعلاً عارف أنا بتجه لأيه من غير أي تشتت ! فكان الموضوع كالآتي ... علشان أخدم كل الجهات في شهر يناير كنت لازم اعمل كده :

• الجسد : تمرين 3 ايام في الأسبوع

• العقل : قراءة كتابين في الشهر مع الكتابة عنهم

• الروح : الإنتهاء من فهم جزء كامل من القرآن/ المواظبة في الصلاة بقدر إستطاعتي

دي كانت الحاجات اللي شايف إنها كبداية ممكن تعمل معايا فارق كبير لأن أولاً أتكلمت قبل كده عن قد أيه انا مهمل فيما يتعلق الموضوع بالدين ومعرفتي في امور الدين والأسلام وأن ده لازم يكون حاجة أساسية ليا ولمستقبلي ! أمر تاني وهو أني مازلت مهمل وبشكل كبير بالرياضة ... صحيح إنها قد تكون مهملة من المعظم لكن ده لا يمنع أنها مهمة ومحتاج أني أعطي ليها أهتمام بشكل أكبر وطبعاً القراءة ودي هي الجزء الوحيد اللي مدرك أهميته وشغال عليه بقالي 3 سنين!

لكن وحتى مع المعرفة دي يظل وقف معايا بعض المعوقات فمثلاً الفاينال ده خلاني معنديش وقت أتمرن أو أقرأ كتاب بالشكل اللي كنت عايزه ، شهر واحد كان للأسف شهر ملئ بالدراسة اللي منعتني أعمل حاجات كتير كنت حابب أعملها فكانت النتيجة الأخيرة هي النجاح في :

• - المهمة العقلية فقط!

كانت مشكلة إني وفي أول شهر مقدرتش أعمل اللي كنت فعلاً مخطط ليه وبسبب الدراسة مكنش فيه حاجة أقدر أعملها غير قراءة الكتب! لكن الجانب الإيجابي هو أني في هدفي لسنة 2023 وهو إني أقرأ 10 كتب أنا أصلاً قارئ كتابين زيادة عن الكتابين بتوع الشهر ده فكانت المحصلة 4 كتب في شهر يناير !!! والكتب هي :

• لغات الحب الخمسة (سبق إتكلمت عنه قبل كده هنا)

• عن النبي

• تاريخ شكل تاني

• يسمعون حسيسها

وصدقني بسبب التقسيمة وفكرة أني مش طالما هقرأ كتاب عن موضوع معين فمش هقرأ عن اي كتاب تاني من النوع ده بيضع ليا فرصة أني أكتشف كتب جديدة من نوع غير مألوف تماماً ! حاجة مكنتش حاسس بيها قبل كده لأني كنت دايماً منغلق على نفسي بنوعية كتب محددة من غير ما اركز في حاجة تانية خالص ، بالعكس شهر يناير أفادني بشكل كبير وحاسس اني هتعمق أكتر في أمور جديدة عن المواضيع اللي قرأت عنها في الكتب دي!

شهر فبراير!

بما إني خلصت فاينال فالأمور هدت شوية وأخيراً هقدر بالفعل أعمل كل اللي كنت عايزه من غير أي مشاكل ، فهتكون الامور نفس الحاجة بما أني مش مقدرتش أعملها في يناير! وهنتقابل في شهر 3 هل فعلاً هكون عملتها ولا لا :)