رحلتي في تعلم اللغة الإنجليزية!

من الحاجات الجميلة للي دايماً أحب أتعلمها هي اللغة، لأن اللغة بالنسبالي هي مفتاح أقدر أوصل بيه لأبواب كتير جداً سواء كان للتواصل مع الناس والسفر ولحد ما نوصل للثقافة و التعلم باللغة دي ومعرفة الحضارات والثقافات🤓، لكن لو قدرنا نجمع كل المزايا دي وكمان نقدر نعرف حضارات مختلفة كتيرة جداً من حول العالم هنلاقي أن مفيش لغة غير لغة واحدة بس قادرة تجمع الكل في مكان واحد وهي اللغة الإنجليزية، في المقالة دي هحكي عن رحلتي في تعلم اللغة الإنجليزية وإزاي تقدر أنت كقارئ تتطور فيها وتقدر تتعامل بيها مع الناس.

بداية رحلتي مع اللغة

بداية رحلتي لم تكن بالشئ المألوف عند الكتير ، أنا إستغربت فعلاً لما لقيت قصص ناس كتير بدأت في اللغة الإنجليزي كانت تعتمد بشكل كبير على الأهل والمناهج وغيره، وحتى كده مظنش إن أنا الوحيد اللي بدأ إنجليزي بالشكل ده ، بداية رحلة الإنجليزي بالنسبالي كانت الأفلام الأجنبية.

أيام MBC 2 وإعادة الأفلام القديمة مليون مرة كانت القنوات دي الأفضل وقتها، أفتكر أيام مكناش نطلع من البيت أنا وأخويا الصغير لما نعرف إنهم هيعرضوا فيلم Fast & furious في إم بي سي 2 مع أني شفت الفيلم أكتر من مرة لكن برده لأن بمجرد ما الفيلم يتعرض مش هتشوفه تاني إلا بعد فترة كبيرة جداً فكان لازم تنتهز الفرصة، ومش بس الفيلم ده لكن أفلام كتيرة أخدت جزء من ذكرياتي وأنا صغير وبقت في قلبي لن تتزحزح من مكانها ، من بوابة الأفلام عرفت الإنجليزي وبقى عندي فضول أعرف إزاي بيتم نطق الكلمات والحروف ، إزاي أصلاً أقول وأتعامل زيهم ، صحيح إن الفضول ده كان بِدائي وبسيط لكنه كان محفز مستقبلي أعرف من خلاله اللغة.

بعد سنين وسنين من مشاهدة الأفلام قدرت أجمع أكتر من جمل محفوظة في دماغي ، بدأت أفهم إيه اللي بيتقال من غير ما أشوف الترجمة حتى ، والأفضل هي فكرة الكتابة وإزاي بدأت أكون الجمل علشان يظهر اللي أنا عايزه ، صحيح إن المهمة دي أصعب شوية بالنسبالي عن الإستماع لكني شغال فيها حتى الآن ، أقدر أقول وحتى الآن إن مستوايا في حدود فوق المتوسط فأقدر أتكلم بأستفاضة عن إزاي قدرت اوصل للمرحلة دي.

ميزة اللغة الإنجليزية عن غيرها

أكيد فكرت في سؤال زي السؤال ده ، ليه اللغة الإنجليزية بالذات منتشرة أكتر من أي لغة تانية؟ ليه مش اللغة العربي مثلاً؟ أو حتى الصيني؟ أظن إن جعل اللغة الإنجليزية هي لغة تواصل العالم شئ إيجابي النسبالي، أولاً اللغة الإنجليزي سهلة مقارنةً باللغات التانية زي العربي والصيني اللي هما بالمناسبة صعب جداً تتعلمهم ، حاجة تانية غير كده إن مش من السهل إنك تلاقي لغة تجمع الناس دي كلها من حول العالم ، صحيح هتلاقي الفرنسية أو الأسباني أو الإيطالي اللي بيتكلم بيها شريحة كبيرة من الناس لكن دايماً هيكون الإنجليزي متفوق في العدد ، ده جميل لأن بمجرد تعلمك للغة الإنجليزية هتلاقي إنك على مقدرة على التواصل مع الكل من جميع الطبقات والثقافات لأنك بيشترك معاكم حاجة واحدة بس هي معرفتكم باللغة الإنجليزية.

فخلينا نتفق إنك لو حابب تتعلم لغة توصلك للعالم كله فهيكون الإنجليزي هو الحل!

المنهج الخاص بيا في التعلم

تمام بما إننا فهمنا قد إيه اللغة الإنجليزية مهمة حابب أخصص جزء بسيط من المقالة عن إزاي أنا بتعامل مع اللغة الإنجليزية، محتاج تعرف إن الكلام اللي هقوله دلوقتي قد يكون عشوائي جداً لأن أنا مش هقدر أنظم الموضوع جداً نظراً لأن فيه حاجات مهمة تانية غير الإنجليزي ... لكن ده ببساطة طريقتي في التطور في الإنجليزي! 

لو قدرنا نقسم اللغة هنقدر نقسمها لأربع حاجات مهمين جداً:

• القراءة أو الreading
• الإستماع أو الlistening
• التكلم أو الSpeaking
• الكتابة أو الwriting

بتختلف الأجزاء دي كلها من شخص للتاني، يعني مثلاً تلاقي واحد يسمع مقطع إنجليزي ويفهم كل حاجة فيه لكنه مش عارف يكتب جملتين مفهومين على بعض، نفس الحال في الباقي فهتلاقي تفاوت في احتراف كل جزء من أجزاء اللغة ، في المقالة دي هقولك على اللي بطبقه بالضبط 

الإستماع

الأستماع هو الأسهل حتى الآن ، لأن الجزء دي يعتبر جزء "Passive" يعني مش بيحتاج جهد علشان تعرفه بعيداً عن حاجات زي الكتابة أو التحدث واللي ملزم بيها تجمع كلمات وتحطها في جمل ، بتقدر تعرف مستواك من مجرد قدرتك على فهم الناس اللي بتتكلم من غير ما تشوف الترجمة ، جرب تحاول تسمع لبودكاست أو فيلم أو حتى مقطع على اليوتيوب وشوف هل فعلاً هتفهم اللي بيتقال من غير ما تلاقي صعوبة، لو عرفت يبقى أنت كويس في الأسمتاع فمش هتحتاج حاجة غير تطوير نفسك وخلاص ، أما لو لا فحاول تعمل اللي هقولك عليه ده دلوقتي:

• لما تسمع لفيلم حاول بنفسك تفهم اللي بيتقال ، يا سلام لو الفيلم ليه ترجمة عربي وإنجليزي في نفس الوقت هيكون رائع جداً ، بعد ما توصل للمرحلة دي أسمع الفيلم مرة تانية من غير ترجمة بحيث تعرف هل فعلاً لقطت كل الكلمات والجمل بطريقة صح ولا لا.
• اسمع دايماً لفيديوهات يوتيوب أجنبية وحاول يكون ليها ترجمة إنجليزي لو مش فاهم أكتر، متابعة معرفتك للمحتوى الأجنبي هيخلي الموضوع أسهل في قدرتك على إستقبال الكلمات ومحاولة فهمها من سياق الجملة
• أسمع بودكاست!! ... دي قد تكون الأعلى من بين الباقي لأن ولا ليها ترجمة أنت بس بتستقبل المعلومات من الصوت، لكن صدقني أنا شايف أن البودكاست شئ في منتهى الأهمية لأنه بيختبر جزء الأستماع بطريقة ولا أروع

بعض الناس اللي بحب أسمع لهم شخصياً

Better Ideas - YouTube

JRE Clips - YouTube

Jordan Peterson Fan Channel - YouTube

Thomas Frank - YouTube

القراءة

القراءة انا بعتبرها نقطة فاصلة بين أنها تكون سهلة أو تكون صعبة وده بسبب إن مش كتير اللي بيقرأ محتوى أجنبي بشكل مستمر ،غالبا لما تكون جمل بسيطة او موضوع بسيط في الأسبوع مش شئ مستمر ، علشان كده دايماً هتلاقي الأغلب ممكن يخطئ في القراءة لأنه مش متعود وعندي كام نصيحة ليك بحيث لو قدرت تطبقهم هتلاقي نفسك مش بس عندك سرعة في القراءة لكن سرعة في الفهم (من تجربتي)

• أقرأ كتب أو روايات بالأنجليزي ... قراءة الكتب بشكل عام شئ مثمر فما بالك لو اللي بتقرأه ده بالإنجليزي هيحسن مستواك بشكل ملحوظ ، الجدير بالذكر إن الكتب الإنجليزية ليها صعوبة معينة فتأكد إنك لما تقرأ كتاب تتأكد إن الكتاب هيكون مناسب لمستواك في الإنجليزي ومش هيتعبك في القراءة
• قراءة المقالات أو الARTICLES عن مواضيع تهمك أنت شخصياً سواء كورة أو كتب أو أفلام ، صدقني فيه محتوى أكتر من رائع ومتاح لكتير جداً من المجالات في نفس الوقت.

بعض الكتب اللي شايفها كويسة جداً للقراءة في حدود المبتدئ لو حابب تبدأ !

Wonder (Wonder, #1) by R.J. Palacio

Introduction to the Short Story by Robert W. Boynton

Rich Dad, Poor Dad by Robert T. Kiyosaki

الكتابة

نيجي بقى للأسوأ بين الكل، الحاجة اللي انا شخصياً لو قدرت عليها سنين مش هتتطور أبداً ألا وهي الكتابة ، الكتابة بشكل عام تنقسم لحاجتين أولاً وهي الكتابة الرسمية واللي بتُستخدم في الإيميلات والمحادثة الرسمية بين العملاء وهكذا أما النوع التاني هي الكتابة العامة وهي الدردشة بينك وبين العامة واللي مش بيتطلب منك الرسمية وأنك بس لازم يتم فهمك من الشخص الثاني. لو سألتك أنهي نوع هو الأفضل بالنسبالك هيكون 99% من الناس هتفضل الكتابة العامة لأنها أسهل ولو غلطت مش هيكون بنفس التأثير على عكس الرسمي اللي لازم تبان فيه بأحسن طريقة ، هنا أنا شخصياً بستخدم كام حاجة شايف أنهم ممكن يفيدوك في حاجة زي كده:

• حاول تتعرف وتتكلم مع ناس بالإنجليزي دايماً، ده هيخليك في تأهل دائم للكتابة العامة وفيه أماكن بتوفر الفرص دي كتير جداً زي Discord أو Reddit
• حاول تعرف كلمات أكتر وأكتر في رحلتك علشان متقعش في موقف أنك بتفكر في كلمة وأنت مش عارف معناها، علشان كده بقول أن الكتابة مرتبطة إرتباط كامل بالقراءة!
• حاول تكتب مقالات او يوميات او حاجات تقدر تستمر عليها بشكل يومي وتبعتها لمكان يقدر يصححلك الكلمات دي بشكل أحسن أو شخص مدرس يصححلك الغلطات

المحادثات

المحادثة أو الspeaking يعتبر مش من السهل التطبيق أو معرفة مستواك فيها نظراً لأنك عايش في مكان نادراً ما يتم إستخدام الأنجليزي فيه فدايماً تلاقي ناس كويسة جداً في الأغلب لكن لما يتكلم مع حد تلاقي نطق ضعيف أو جمل مش متركبة مش علشان إنه مش عارف لكنه علشان مختبرش نفسه إنه يستخدم كل اللي إتعلمه في مكان واحد! ... لو أقدر أتكلم عن المحادثة فأقدر أقول على نصيحة واحدة "أهبد لكن بشياكة" والمقصود من الهبد إنك تحاول على قد ما تقدر ومتعملش حساب الغلطة تماماً لأن كمبتدئ إنت محتاج تكسر حاجز الخوف والمواجهة عن طريق الهبد وصدقني الناس اه ممكن تستغرب من طريقتك في الكلام لكن مش للدرجة لأنهم عارفين إنك في البداية مش أكتر!

محتوى تقدر تنتفع بيه!

هنا هتلاقي محتويات وقنوات يوتيوب وناس لو تابعتهم بشكل دوري هتلاقي إن مستواك إتحسن بشكل تدريجي ، حتى النصيحة منهم أحسن مني لأنهم أعلم🤡

دروس إنجليزي بالترتيب¨ - YouTube

zAmericanEnglish - YouTube

دليلك للأيلتس - YouTube