ليست مجرد شعشرة 💖

السلام عليكم، وحياك الله مرة ثانية..

مر على العدد الأخير شهر وأسبوع تقريبًا.. وبيني وبينك؟!

أصلًا ما مر أسبوع واحد بعده (أقصد العدد الأخير) إلا وأنا أحس بندم كبير؛ علشان قراري اللي اتخذته في لحظة ضغط مع شوية محدودية في الرؤية..

أنا اعترف إني طحت في فخ التفكير الأسود والأبيض 🦦..

وبصراحة.. أخذت وقت علشان أقدر أكتب هالعدد؛ لأني مستحية أرجع بعد ما قررت أوقف 🌚.. بس خلني أزيدك من الشعر بيوت مو بيت.. لو صار هالموقف مع أي شخص كنت راح أكون أول الداعمين والمساندين له حتى يرجع وينشر.. ويمكن حتى أكون معه لأول ثلاث أعداد بعد هالموقف!!
وهنا زعلت أكثر منّي وعليّ 💔، لأني ما عندي مشكلة أبدًا في الاعتذار وتصحيح الأخطاء وحتى التوضيح في المواقف اللي تصير بيني وبين الآخرين.. لكني مع نفسي الموضوع مختلف تمامًا في كل شيء تقريبًا..

والموضوع مو اكتشاف جديد.. هو شي أعرفه من زمان وكنت أحاول حله واحتوائه بألطف الطرق لكن التقدم فيه لا يُذكر مقارنة بطول المدة، أما الآن أنا عازمة على حله بإذن الله ومعونته خصوصًا بعد عدة مواقف حصلت لي مؤخرًا أثبتت لي (رغم إنه بديهي) إنه يجب على الانسان إنه يكون أولوية نفسه في كثير من الأحيان..

مالك بالطويلة..
أنا رجعت الحمدلله، وبأستمر في هالنشرة إن شاء الله؛ لأني اكتشفت إنها ليست مجرد شعشرة 💖!
ولأني ما توقعت إني بأحس بالفراغ والضيقة اللي حسيتهم بعد قراري العدد الأخير..
ولا حتى توقعت إنها ممكن تساعد في تصحيح فكرة أو معتقد عندي!

الفكرة الوحيدة اللي كانت في بالي عنها.. إنها مساحة أسولف فيها براحة وأشارك بنات أفكاري وأحفادهم ومن يعزّ عليهم (وأحيانًا من يعاديهم من الأفكار الشريرة)..

أنا رجعت اليوم وكلي امتنان لدعم أعضاء رديف أذكر منهم: أ. بيان، أ. عاليا عبدالله، أ. مريم الهاجري..
وما أنسى أبدًا الأستاذ الفاضل: يونس بن عمارة على عبارته اللي قالها لي؛ هالعبارة اللي زرعت بذرة  سحرية من جمالها تبرعمت  في داخلي.. وأيضًا الأستاذ الفاضل: طارق الموصللي على تدوينته؛ اللي كانت سبب (بشكل من الأشكال) في كتابة هالعدد  في هاليوم بالذات..

وأكيد ما راح أنسى إني أشكرك أنت.. لأنك استقبلت هالعدد بالذات وقرأته 💖
شكرًا لك، وأشوفك إن شاء الله على خيير 💖