تعالوا أنتم بعد.. وسكروا الباب وراكم (وداعية🥹)

صباح / مساء الخير بتوقيتك ✨
يا رب تكونون بخير وبأتم صحة وأفضل حال 💖

ما أعرف كيف أبدأ هذا العدد والله، لأن أفكاري حاليًا تمكنت مني للأسف!
في كل مرة أبدأ أكتب، ولا أفكر في موضوع للكتابة.. أشوف أفكاري هناك تناظرني بنص عين، وتقول لي: تعالي تعالي يا ندى وسكري الباب وراك 😏.. وتبدأ موّالها بدون ملل:

أفكاري: ندى وش الفرق بين هالنشرة وبين تصنيف مساحة ندى في مدونتك؟!
أنا: ....

أفكاري: طيب، ما تحسين بإطلاق نشرتك إنك جالسة تتفرعين بدل ما تتعمقين؟!
أنا: ....

أفكاري: ليش أحسك تهربين من فكرة التعمق والتخصص بشي معين؟
أنا: ....

أفكاري: ندى.. هل تسمعينا؟! ألوو.. ألوو.. ندى
أنا: ....

ودي أتكلم بصراحة بما إنها ختامية:
الصدق؟!
ما أعرف لو كانت خطوة إطلاق نشرة خطوة صحيحة أصلًا، بس أحس إني تأثرت من الأفكار وأحسها منطقية شوي؛ يعني لو فكرت بهدوء.. راح ألقى إنه شي مكرر أسويه في المدونة 🤦🏻‍♀️..
يعني النشرة ما فيها فكرة أو قيمة مختلفة عن المدونة + فعلًا حسيت إني بديت أتشتت وأشيل هم كل عدد مع هجوم هالأفكار 💔 (على أساس إني ما أشيل هم التدوينات 🌚)..

لكن خلوني أكون صادقة معكم أكثر وأقولكم: إنه رغم الكواليس اللي أعيشها خلف كل عدد، إلا إن تجربة إطلاق نشرة بريدية جميلة من بدايتها وحتى هذه اللحظة..
من حماس الفكرة.. لاختيار الاسم وتنسيق ثيمها وشعارها (لا تقولون اسم مكتوب بس 😒، ترى نوع الخط ودرجة اللون مختارين بعناية، وحتى قراري إنه يكون بسيط أخذ مني وقت وجهد 🦦)..
الأعداد الأولى 🥹💖، وتدفق الأفكار والمواضيع اللي اكتب عنها كان عجيب ومذهل..
أسلوبي وطريقة كتابتي هنا، من أكثر الأشياء اللي حبيتها وأحس إن هذي نسختي اللي أحبها.. ما أحب التعقيد ولا الحشو ولا المثالية (أو يمكن طفشت منهم)..
الصدق ما كان همي أبدًا اشتراكات النشرة أو عدد المشتركين.. لكني والله أشكركم بعمق 💖، يعني وجودكم حتى وإن كان على الصامت 😁 إلا إنه كان يسعدني جدًا..

حاليًا.. ما أعرف لو كان هذا القرار اللي اتخذته (إيقاف هالنشرة) قرار صائب أو لا، لكني أحاول أتخفف وأركز على شي واحد في الوقت الحالي (أتمنى 🤥).. وأكيد هذا مو قرار لاعتزال عالم النشرات البريدية! لا تخافون ولا تشيلون هم..  يعني ممكن يكون لي نشرة ثانية مستقبلًا 💖..

شكرًا لكم مرة ثانية لأنكم كنتم أصدقاء هذه الرحلة القصير اللي امتدت لـ 9 شهور وأنتجت فيها 9 أعداد، أتمنى لكم حياة طيبة وعقل هادئ وأفكار تحترم حدودها 😁💖