ليش هم أقوياء؟!

السلام عليكم وأسعد الله وقتك بكل خير يا ..
يا رب تكون بأتم صحة وأفضل حال 💖

من المرات اللي جلست فيها أتابع مباريات كأس العالم مع أخواني، سمعت واحد منهم فجأة يصرخ ويقول: "أيوووه، هجمة مرتدة هجمة مرتدة.."، وبالنسبة لوحدة ما تعرف في الكورة ولا حتى في مصطلحاتها الشي الكثير، رحت أدور الهجمة المرتدة اللي يتكلم عنها أخوي وابحث عن معناها في عقلي اللي حاسم الموضوع من زمان:‏ إن كرة القدم بكل فعاليتها (يعني حتى كأس العالم 2026 نفسه) جزء مُصغر من لعبة كابتن ماجد في كمبيوتر العايلة 🤓..

علشان كذا شعاري:‏ كابتن ماجد وبس والباقي خس 👯🏻‍♀️ (ومع ذلك ما كنت أفهم فيها كثير؛‏ لأني كنت أضطر أجلس وأتابع أخوي علشان دوري في الكمبيوتر كان بعده، وكنت انتظر الفرصة اللي يخسر علشان يقوم ويجي دوري 🦦)..

المهم خلني أرجع لمصطلح الهجمة المرتدة اللي كنت أحسبه: الكرة لما تضرب في حافة المرمى أو لما تضرب أحد اللاعبين وتعكس اتجاهها (ركلة الكرة = هجمة، ارتطامها في حافة المرمى أو في أحد اللاعبين = ارتداد = انعكاس = يعني مرتدة؛ لا تسألني عن هالتفسير أبدًا، ولا تحاول أرجوك)..

لما جيت أبحث في المباراة اللي كنت أتابعها مع أخوي ما لقيت الهجمة المرتدة اللي أعرفها 😕!
وكل اللي لقيته لاعب يكاد يكون لحاله رايح لمرمى الخصم (في تكدس لاعبين في طرف الملعب الآخر علشان كذا اللاعب كان لحاله، يعني في حال إنك تساءلت عن بقية اللاعبين)..
سألت أخوي وين الهجمة، قال لي اللاعب.. قلت وش معنى هجمة مرتدة؟ وشرحها ع السريع لأني مسوية له أزمة بأسئلتي وهو يتابع 😅!

أذكر إنه قال لي:‏ اللاعب لما تجيه الكرة في جهة مرماه وينطلق بسرعة لمرمى الخصم؛‏ وهنا فهمت إن الهجمة المرتدة هي الكورة لما تروح من مرمى لمرمى بواسطة لاعب 💁🏻‍♀️ (جا ع بالي سؤال، وش تسمى إذا شاتها الحارس من مرماه لمرمى الخصم وصارت قووووول؟ هل قد صارت أصلا؟! 🤔)

وبصراحة؟

مستوى هالمباراة اللي تابعتها ما أعجبني كـ متفرجة موسمية مزاجية؛‏ يعني ما كان فيها ذاك الحماس لأن الفريق اللي خسر ما كان يلعب بشكل جيد أصلا (يعني تحليلي المتواضع:‏ الفريق اللي فاز ما تعب كثير).. ومع ذلك جا في بالي سؤال ليش هم أقوياء؟! وما راح أتعبك في الرد لأني سألت أخوي وقال لي:‏ لأنهم يلعبون ويتدربون!
قلت له:‏ طيب وذولاك وش يسوون 😒؟! يقشرون بصل مثلًا؟! ترى كلهم يلعبون ويتدربون 🙍🏻‍♀️..
بس ليش هذولاك أقوياء؟!

الزبدة ما أقنعني كلامه! بس قررت إني ما أوقف عند الموضوع كثير؛‏ لأنه في النهاية كرة قدم وخارج نطاق اهتماماتي وأولوياتي 🤷🏻‍♀️.. لكني أذكر إني دخلت اكس، وقادني فضولي لتصفح أراء الناس في هشتاقات المباراة والحدث نفسه، ووقفت عند تغريدة لشخص (ما انتبهت لاسمه، ولا جا في بالي آخذ لقطة شاشة لها!) يقول في معناها:‏ فيه فرق بين اللي يلعب كورة القدم على إنه هاوي فقط وبين اللي يلعبها وهو هاوي وجاد في تحسين نفسه بكل الأشكال 💡..

وأنا أتأمل هالعبارة في داخلي وأقرأ التعليقات الأخرى.. إلا تجيني هجمة مرتدة غير متوقعة من حِكمتْ أبلا ⚽، تقول فيها: "ترى نفس الفكرة يا ندى في الكتابة.. شفتي لما تسألين كيف وصل الكاتب لهالمستوى بعد ما تقرين مقال معين؟ لما تتساءلين بينك وبينك نفسك:‏ كيف صار كذا؟ هي كذا.. فيه فرق بين اللي يحب الشي، وبين اللي يحبه ويتدرب عليه"

ويبدو إني الآن تأكدت من معنى الهجمة المرتدة، وفهمتها حتى خارج الملعب مو بس داخله 🦦؛‏ بعد ما بديت بسؤال تأملي بسيط من زاوية كروية "ليش هم أقوياء؟!"، ثم ارتدّ عليّ وعلى تساؤلاتي الخاصة بيني وبين نفسي واللي ما لها دخل بالكورة (الصدق؟ ما تفشل حِكمتْ أبلا أبدًا في إبهاري بطريقة ربطها لأي موضوع بأي محور تائه في عالمي)..

أحب أقولك الآن: إني فهمت اللحين ليش هم كانوا أقوياء..
لأنهم ما اكتفوا بفكرة: "أنا أحب هالمجال"، ولا بفكرة "أنا عندي موهبة"..
هم صاروا أقوياء لأنهم تعاملوا معه بجدية.. بكل بساطة يعني..