مع الخيل يا شقرا والـ UGC والهبه

يامراحب 

بدون مقدّمات طويلة بنسولف معك ونعلّمك فجهّز قهوتك الموضوع يحتاج روقانك وقلمك☕️

سمعت كثير عن إعلانات الـ UGC، وصناع المحتوى له صاروا بكل مكان فجأة وما تدري هل هو صحيح اللي يقولون عنه، ولا مجرد كلام فاضي وبيع وهم!

— معلومة بسيطة: ما نكتب إلا اللي من خبرتنا والدليل:

فيه من أعضاء زولية بنتين هبة ريح دخلوا المجال من أوسع أبوابه ولهم عملاء وأعمال كسروا الدنيا فيها 🔥

مبدعاتنا : ريانه و أفراح

عشان كذا وحده منهم قلنا لها اكتبي عنه ووضحي لجمهور زولية الجوانب المخفية وما وراء الستار > كبّي العفش بمعنى أصحّ🤯

 الـ UGC من أ-ي بكل التفاصيل لك وللعميل..

بسم الله الرحمن الرحيم نبدأ ونقول لك ⤵️

مصطلح الـ UGC هو :

المحتوى اللي يُنشئه المستخدم بنفسه مو العلامة التجارية، قد يكون على شكل صور أو فيديوهات أو مراجعات أو حتى منشورات على مواقع التواصل الاجتماعي، وبرضو ممكن كمدونات تُظهر تجربة المنتج أو الخدمة وتتكلم عنها👌🏻

— معلومات لك كصانع محتوى UGC

كيف تعرف أن هذا محتوى UGC ؟

ببساطة له خصائص وهذه أبرزها:

▫️طبيعي وحقيقي: يعكس آراء وتجارب المستخدمين.

▫️غير مدفوع مباشرة: مو إعلان مباشر؛ يظهر كشرح للمنتج بعد التجربة الحقيقية والإعجاب فيه.

▫️متنوع وسهل الانتشار ويتقبله الجمهور: بفضل وسائل التواصل الاجتماعي.

نجي لأنواع محتوى الـ UGC:

▪️التقييمات والمراجعات: مثل مراجعات العملاء على مواقع المتاجر الإلكترونية وتعليقاتهم.

▪️الصور والفيديوهات: صور العملاء أثناء استخدام المنتجات أو فيديوهات "فتح الصندوق" (unboxing).

▪️القصص الشخصية: مشاركة تجربة خاصة مع المنتج أو الخدمة.

▪️الميمز والإبداعات الفنية: محتوى فكاهي أو فني ويكون مرتبط بالعلامة التجارية.

▪️التحديات: مثل التحديات اللي تشوفها على الـ TikTok ولكن مرتبطة بعلامة تجارية معينة.

— وصلنا علم 🧐

أنك مبدع بالتصوير وتتساءل كيف تدخل هذا المجال ويصير عندك عملاء؟ تفضل الإجابة..

▪️حلِّل السوق واعرف وش المجالات الأكثر طلب.

▪️ما يمنع أنك تنشئ محتوى مجاني في البداية أو من منتجات عندك خاصة فيك؛ عشان تكوّن ملف أعمال قوي.

▪️استفد من منصات التواصل الاجتماعي، تابع صنّاع المحتوى فيها وابدأ نزّل أعمالك وتجاربك الخاصة ورحلتك وتفاعل مع الأشخاص من حولك

▪️تواصل مع الشركات الصغيرة واعرض عليهم ملف أعمالك، احتمال تكون فرصتك الأولى في العمل معهم بهذه الطريقة! جرّب✨.

▪️من أول عمل لك خلّك محترف بالتعامل لأن الالتزام بالمواعيد وجودة العمل تبني سمعتك.

وبالنسبة لأسس تصوير UGC فهي باختصار 3 تُعتبر المهم والأهم:

▪️احرص على الإضاءة، سواء كانت ضوء طبيعي مثل الشمس أو بإضاءة ممتازة لأنها تفرق في النتيجة بشكل كبير

▪️اختر زوايا تصوير تبرز المنتج بشكل واضح وترا تقدر تتعلّم هالشيء من اليوتيوب حتى.

▪️ركِّز على جودة الصورة ووضوح الصوت.

جااك العميل وبدأ الجد وعقلك يقول ياربي وش اسأله بالضبط،  لا تشيل همها زولية لعيونك تحلّها، اسأله التالي✋🏻

• أي نوع تبي من اليوجيسي؟ (تجربة، ترند...الخ)

•الفئة المستهدفة من؟

• نوع المُنتج أو الخدمة؟

• الهدف الرئيسي؟

• كم عدد المقاطع ومدتها؟

• وين بتستخدم المقطع؟ (إعلانات، سوشال ميديا..)

• في بالك فكرة معينة أو نموذج مشابه لها؟ (هنا لو حسيت بضياعه حتى هو فيعطيك شيء واضح يعكس الصورة اللي بباله)

—✨

بنقول لك موقف بسيط > جاء عميل يطلب هالمحتوى ولمّا بدأنا نسأله الأسئلة المعتادة قال: ترا ما أفهم الصدق وش معناه اللي أعرفه أنه يؤثر في المبيعات

فقررنا نحن آل زولية نعطيك ⤵️

—— معلومات تفيد بها عميلك إذا صرت بهذا الموقف عشان توعّيه وتثقفه وتكسبه😉

5 فوائد لصناعة المحتوى باستخدام UGC وهي الزبدة:

▫️زيادة المصداقية: يحس الجمهور وتحديدًا الفئة المستهدفة بأن المحتوى حقيقي، وهذا يعزز الثقة.

▫️خفض التكاليف: يصير عند الشركة محتوى تسويقي تكلفته أقل من أي آداة تسويقية ثانية.

▫️انتشار واسع: المحتوى بهذه الطريقة وخاصةً إذا كان معروض كتجربة حقيقية أو مواكب لترند ينتشر بسرعة عجيبة.

▫️تعزيز ولاء العملاء: يحسّ المستخدم بأنه جزء من العلامة التجارية وأنك تتكلم معه بشكل خاص وواقعي.

▫️زيادة التفاعل: محتوى UGC غالبًا يحقق معدلات تفاعل عالية مقارنة بالمحتوى العادي.

وش يميّز الـ UGC عن غيره من المحتوى؟

▪️أصالة التجربة: يعرض آراء صادقة بدون تصنع.

▪️سهولة الوصول إلى الجمهور المستهدف: لأن المحتوى جاي من شخص نفسه نفس أي شخص ثاني

▪️توفير الوقت والجهد: ما يحتاج لتخطيط معقَّد مثل الحملات الإعلانية.

وطبعًا له علاقة كبييييرة بالتسويق:

فمحتوى المستخدمين (UGC) أو User Generated Content هو من أهم أشكال التسويق الرقمي الجديدة لأنه:

▫️يدعم الحملات الإعلانية: ممكن يكون جزء تكميلي لحملة تسويقية أكبر.

▫️يزيد المبيعات: العملاء يثقون بتجارب الناس أكثر من إعلانات الشركات.

▫️يبني المجتمع: يبني علاقة أقوى بين العلامة التجارية وجمهورها.

نصائح ضروري تقولها لعميلك إذا جاك لصناعة محتوى UGC

وترا موجهه من أم بليهان يعني من واقع خبره😎:

▫️افهم جمهورك: قدم محتوى يناسب اهتماماتهم وتطلعاتهم.

▫️شجع الناس على المشاركة بمعنى استخدم الهاشتاقات أو اطلب منهم مباشرة يشاركونك تجاربهم.

▫️خلّك طبيعي وابعد عن التكلف والترويج البحت.

▫️قدم مكافآت: مثل خصومات أو هدايا مقابل مشاركة المحتوى.

▫️احترم حقوق الملكية: احصل على إذن المستخدمين قبل استخدام محتواهم (مثلًا لو أنت مقدم الخدمة ما ترضى استخدام الموسيقى ويروح العميل يضيف عليه! فلازم توضح له هذا الأمر).

محتوى الـ UGC مو مجرد أداة تسويقية

هو فرصة لبناء براند شخصي قوي؛ بالاستفادة من طبيعته الحقيقية وقدرته الجبارة على التأثير، بتحقق نجاح كبير سواء كصانع محتوى أو كعلامة تجارية.

والسؤال المهم:

هل فعلاً اليوجسي هبة ولا والله له نتائج حقيقية مثلما يقولون؟ لا طبعًا لا تدخله مع الهبة هو مجال يحتاج شغل وجهد وخطوات عشان يحقق النتائج المطلوبة

—— في الأخير نقول: لا تكون مع الخيل ياشقرا خلّك على قولتهم من يمسك زمام الأمور ويسيطر عليها مثل ما يبي وافهم يا فهيم😉.

نشوفك على خير بنشرة جايه، لا تنسى تشاركنا رأيك على منصة X وهل استفدت من النشرة؟ < نحسّ أكيد🌞

وترا صار عندنا حساب بالانستقرام ودّنا تقلط وتشرِّفنا♥️

حساب الانستقرام