اكتب محتوى ما يبيع...!

يامرحبااا بصديق زوليتنا اي والله مرحبا مليون♥️

ندخـل مباشرة في العميق! -سمعناك تقول تم-

— بسم الله نبدأ -ملاحظة؛ النشرة يبي لها كوب كبير من مشروبك المفضل عشان تطلع بفائدة تثبت بعقلك🤭-

اكتب محتوى ما يبيع؛ تضيع.

بدايةً عشان ما تضيع صديقنا بنقول لك وش هو هذا المحتوى أصلًا وفي النهاية بنعلمك كيف تكتب محتوى يبيع✨

المحتوى اللي ما يبيع:

هو أي محتوى ما يوصّل شعور ولا فكرة ولا يقدر يحرِّك العميل بأنه يتخذ الخطوة النهائية مثل الشراء أو التفاعل..الخ

قد مرّ عليك إعلان أو قرأت محتوى وطلعت منه متسائل وش المطلوب مني الحين وايش بستفيد؟

- مبهم

- مكرر وممل

- يتكلم عن المميزات بشكل ما يعرض فائدتها

- ما يستهدف العميل والقارئ ولا يلامسه؛ كأنه غير موجه له

— باختصار هذا المحتوى خالي من أهم عنصر في التسويق (القيمة اللي تهم الفئة المستهدفة)

—💡

•عدم التأثير بالفائدة = عدم وجود نتائج

•عدم الإقناع ولفت الاهتمام = عدم وجود مبيعات

قلنا لك المشكلة فوق صح؟ اييوه بالضبط هذا اللي بنتكلم عنه بتفصيل وخلنا نعتبرها أنواع أو أشكال المحتوى اللي ما يبيع🫢

١- المحتوى العام والمبهم

بمعنى أنه دائمًا ما فيه تحديد مثل لما تقول "منتجنا الأفضل"، طيب وضّح ليش أفضل؟ وش المميز فيه وبيفيدني؟

٢- التركيز على المُنتج ونسيان العميل

كثير من الشركات وحتى احنا كأصحاب خدمات نطيح بهالمشكلة نتكلم عن المميزات اللي عندنا وننسى نربطها بالفائدة اللي تهمّ العميل المستهدف

لنقول جات شركة الكترونيات وكتبت "جهاز..فيه أحدث التقنيات" أنا وش بستفيد وش هالتقنية الحديثة وكيف بتكون بحياتي؟

٣- المحتوى المكرر -صار ممل-

بعض الكلمات انتهى تأثيرها وصارت مملة فتجيبها بدون أي إضافة شيء جديد عليها يجذب اهتمام العميل ويحفزه على اتخاذ إجراء؛ مثل: "لا تفوت الفرصة"

دائمًا أضف قيمة للمحتوى ولا تكتب لأنه شيء معروف وخلاص! اكتب عشان تُقنع وتؤثر

٤- المحتوى بدون هدف

تكتب محتوى متعوب عليه ومفيد سواء طويل أو قصير بس ينتهي العميل من قراءته ولا يدري وش مفروض تكون الخطوة الجايه أو وين مكانها!

—— تحس باقي ما فهمت؟ ازهل بنعلمك أساليب المحتوى اللي ما يبيع بالتفصيل🤌🏻

١- الكلام المتكلّف (وبدون قيمة)

زي استخدام مصطلحات منمقة ومعقدة بدون سبب وصعب فهمها لفئتك، بس تبي تضيفها في المحتوى مهما كان مجالك؛ بنظرك أن المحتوى بيكون مُبهر بس في النهاية العميل ممكن يقول (هذا وش فيه يتفلسف)

٢- الوعود الفارغة

تقول منتجك يغيّر حياتي؟ طيب علمني كيف، عيشني الشعور والتجربة، أعطني دليل..لا تقول كلام كذا بدون معنى

٣- التقليد

أعجبك محتوى براند ناجح ورحت تقلده، وطلعت النتيجة مو مثل المتوقع ومن أصلها غير مقنعة لجمهورك، وش السبب؟ لأنك قلدت فقط..ما حللت وفهمت السبب اللي خلاهم ينجحون وشفت هل يناسبك أو لا

٤- عدم فهم الفئة المستهدفة

تكتب للكل بشكل عام، الصح أنك تخاطب فئتك واحتياجهم (تخيل شخصية عميلك وحللها وتكلم معه كشخص واحد بالنقاط اللي تأثر عليه)

-قلة مبيعات

-ضعف التفاعل

-تأثير سلبي على اسم البراند وإهماله

-هدر الموارد من كتابة واعلانات وتصميم...الخ

— نجي لوقت الحلول💡

١- حدد فئتك المستهدفة؛ اسأل نفسك عن > مثلًا⤵️:

•من اللي بيشتري المنتج؟

•وش مشاكلهم؟

•وش اللغة اللي يفهمونها؟

٢- ركّز على الفائدة (عندك ميزة حولها لفائدة)

بدل ما تقول "سرعة الانترنت تصل إلى ٢٠٠ ميجا"

قول "تصفّح، حمّل، العب بالساعات بدون تقطيع..سرعة ٢٠٠ ما تضيع وقتك"

٣- اكتب بلغة صريحة وواضحة

لا تعقدها

٤- ضمّن طلب إجراء واضح

٥- اكتب قصص وتجارب حقيقية تدعم الفوائد لمنتجك أو خدمتك

-ابدأ بجذب الاهتمام -خل عنوانك لافت-

-اعرض حل مشكلة يعاني منها عميلك

-خاطب بأسلوب المفرد

-ضمّن إثباتات تقنع عميلك (آراء، أرقام...)

نكتب مثال ونحلله؟ يلا🫡🔥

🔻تطبيق للتوصيل من المطاعم

(جوعان؟ طلبك عندك خلال 15 دقيقة مع خصم 10% على طلبك الأول؛ حمّل التطبيق الآن!)

▪️ليش يبيع؟

- يبدأ بسؤال بسيط ومباشر يخاطب شعور فوري (الجوع).

- يحدد ميزة وفائدة اختصار الوقت (التوصيل السريع خلال 15 دقيقة).

- يقدم حافز للزبائن الجدد (خصم على أول طلب).

- يحتوي على دعوة إجراء (حمّل التطبيق الآن).

السر هنا هو أنك:

▪️تخاطب احتياج واضح للعميل ورغبته

▪️تعطي حل سريع ومباشر

▪️تقدّم حافز يقنع العميل (خصم، شحن مجاني، تجربة مجانية)

▪️تتضمن طلب إجراء (CTA) واضح وسهل التنفيذ

▪️الرسالة محددة ومختصرة، ما تضيع وقت العميل في وقت حاجته

في النهايـة؛ شاركنا رأيك على الاكس والانستقرام وبالمرّه شاركها غيرك يستفيد..رسالتنا لك (أنت تقدر بس كل شيء يحتاج وقت)❤️‍🩹