الكتاب باين من عنوانه! - العدد #13

دائمًا نسمع جُملة "الكتاب باين من عنوانه"

واللي تعني إن الشكل الخارجي، أو المظهر الواضح أمامنا، أو الإنطباع الأولي اللي ناخذه عن شخص "كافي" عشان نحكم عليه وعلى حياته من نظره أو إيماءه أو حتى كلمة منه، وبدون مانعرف الخفايا الغير ظاهرة لنا! ✨

وهنا ودي أخذكم بالسالفة لزاوية مهمة تتكلم عن المُقارنــــــة!

وما أدراك ما المقارنة

المقارنة صفة مذمومة لكنها موجودة على مايقولون رغمًا عن أنوفنا ولا إراديًا

• بتلاقي نفسك تقارن حياتك بحياة شخص ماتعرف عنه إلا منشور في منصة اكس وظهر لك من خلاله إنه عايش حياة وردية

• ⁠تقارن عائلتك بعائلة صديق لك ما علمك إلا أفضل محاسن عائلته وترك المساوئ على جنب وتوقعت إنه مُرفّه

• ⁠تقارن مشوارك اليوم للوصول لأحلامك وكيف إن الطريق مو مُمهد، بمشوار شخص بنفس مجالك بس سبقك! ولاحظت بنظرتك الثاقبة من صورة شاركها على منصة سناب ولا انستقرام إنه ما عانى أبدًا أبدًا ووصل بسهولة؛ بس لأنه أختصر مشوار الرحلة بمقطع مدته دقيقة وحط صوت لحمود الخضر.

• ⁠تقارن كتاباتك بكتابة صديق لك بالمجال وتقول والله أنه أفضل مني وتبدأ تمقته في نفسك بدون سبب من أبليس بس وتحس إنه منافسك طيب ليه؟ والله قارنت وحسيته أحسن مني.

• ⁠تقارن أسلوب حياتك بحياة صانع محتوى دائمًا يختار أفضل الأشياء في يومه ويعكسها للعالم الإفتراضي بطريقة جميلة ومرتبة، وقلت في نفسك ياحظه يقدر يلاقي وقت، عنده متابعين مُهتمين له، أنا مارح أصير مثله لأن ماعندي أفكار ماعندي مكان مرتب أصور منه، جوالي ياشيخ إصدار قديم… بالمُناسبة هالشخص بنسبة كبيرة اختار زاوية جميلة من مكانه وحب يظهرها للعالم ويمكن وراه على مايقولون دعثه قائمة والوالدة تصارخ تعالي ساعديني بسرعة، والأخ الصغير يبكي بدون سبب، وهو في داخله شخص يشوف الحياة جميلة رغمًا عن كل شيء وأنت تشوف جماله وماتعرف الخفايا.

لو بكتب في المقارنة اللي نعيشها اليوم مارح أوقف لأنها حولنا وحوالينا وفي أنفسنا موجودة، لكن مين اللي يقدر يضبط نفسه ويتفكر شوي في حياة الآخرين، وإن الله مقسم الأرزاق بالتساوي علينا، وكل شيء نشوفه من حياتهم هم مُدركين له وراغبين في أنك تشوفه..

وخليني أقولك بعض الأشياء اللي مستحيل تشوفها ولعلك تتفكر في هذا الأمر كل ما نفسك دعتك للمقارنة🤍.

• فيه مشاكل نفسية لو تعافر مارح تعرفها، لأن هالشخص يعرف يخليك تشوف الزين من حياته بس.

• ⁠فيه مشاكل عائلية مستحيل تتجسد لك في صورة شفتها على أي منصة.

• ⁠فيه دموع خلف تغريدة مُلهمة وأنت توقعت إن حياته وردية.

• ⁠فيه شغف منتهي خلف مقطع يختصر مشوار الرحلة ويحتاج كلام يرجع له شغفه عشان يكمل.

• ⁠فيه أفكار دورية بالتوقف والإنسحاب من كل شيء خلف حياة صانع محتوى مُحفز.

• ⁠فيه وساوس سيئة، فيه أفكار قاتلة، فيه معتقدات خاطئة، فيه توقعات سلبية فيه وفيه أشياء كثيرة في حياة الناس من حولنا والله ياصديقي محد كامل بس الجميع يحاول يكون أفضل من نفسه أمس وقبل ساعة، يحاول يكون الغيمة الماطرة بالعطاء رغم مايعاني منه، يحاول يكون الجزء الجيد من الحياة للآخرين كتعويض عن اللي صار له..

هل الآن بتقول عن الآخرين "الكتاب باين من عنوانه"؟!

وهل معانا الحق للحكم على أشخاص مانعرف عن حياتهم أي شيء وكأننا ننظر لهم من ثقب إبرة!

شايفين ثقب الإبرة كيف أصغر منه مافي؟ يعني حتى لو تناظر من داخله مابتشوف كل شيء واضح والدقة ماهي Full HD

خلونا نقول الكتاب باين من عنوانه بالأدب والأخلاق والرُقي، خلونا نربطها بالقيم والمبادى وماخفي عنا يظل خافي، و زي ما إن الكتاب باين من عنوانه ترا برضو الحياة لا تُرى من ثقب إبرة!🤍

وتقول الكاتبة ماريّة في كتابها لحظة إدراك:

كلٌّ منا في هذه الحياة في طريق اختاره الله له، وفي رزق اختصه الله به، طريق تخوضه وحدك أنت وتعيش كل ارتفاعه وانخفاضه به، لن تسبق أحدًا ولا أحد بسابقٍ إياك.

وفي موضع أخر قالت بإن الشخص الوحيد الذي يستحق أن تقارن نفسك به هو أنت!

قارن نفسك بالعام السابق، الشهر السابق، وباليوم القريب. ♥️

وإلى نشرتنا القادمة كونوا بخير واهتموا بقلوبكم ولا تسمحوا بإن يمسّها أي سوء من الخارج، حافظوا على أنفسكم وعاملوها كشخص مُحب♥️♥️