بدايـة المعرفة..غلطة!.

ياهلا ويالله أنك تحييهم وتبقيهم، ايه أنا نفس الشخص اللي كتب لكم النشرة السابقة وقرأت تعليقاتكم اللي أسعدتني كثيـر فلا تقطعونها عادة ♥️..

يقولون..

"كل صبح يقدّمك للمجد خطوة"

يعني اللي عليك ⤵️

"كبّر أحلامك على كيفك .. وكاااااااافح"

— خلِّنا نرجع وراء لـ 11 سنة وأكثر 🔀

سنة أولى بالمرحلة الابتدائية تحديدًا، ما كنت تفقه شيء بهالدنيا، لا تعرف تكتب اسمك ولا تقدر تشكّل عمرك بأصابعك الصغيرة ولا تدري ايش يعني حصد زرع!.ولا أنت يمكن من جيل لغتي ومالك بهالشغلة كلها!🌞

المهم أنك مهتم بايش تفطر ذيك الحزَّه، وايش تشتري شنطة آخر موديل من لولو كاتي أو حتى يونيكورن

< نسدِّد ونقارب باختلافات الأجيال ههه يعني صايدين الجو✋🏻

لكن هل تتذكر أول مرَّه طُلب منك تكتب؟! سواءً اسمك الثلاثي ولا الحرف الفلاني!

تتذكر أول مرَّه كان عندك واجب نسخ؟! أكيد أنك تخبر كم مره عدت الحرف وكم مره بكيت لأن يديك أوجعتك وكم مره قالوا أنه غلط ولازم تعيده!

طيب خلِّنا من هذا كله

— تتذكر أول يوم طلبتك المدرسة تجيب قلم؟!

ايه ايه ما تتذكر إلا شعور الفرح والفخر أنك كبرت وصرت تكتب بقلم رغم أنك للحين ماتعرف تكتب صح بس تبي تكتب وبتحاول عشان خاطر القلم..🥹

طيب آخر شيء، تتذكر يوم أخذت الشهادة من أولى وبتنتقل لمرحلة جديدة؟ فرحة عائلتك ومشاعرك اللانهائية ولبسك الجديد كله عشان سنة ثاني ابتدائي!

كل هالخيال اللي أخذتك فيه معي عشان أبيك تتذكر اللحظة وتسترجع كل مشاعرك ومحاولاتك وقتها عشان أبي أوصل معك لنقطة أن -بداية المعرفة.. غلطة-

▫️غلطـة وغلطتيـن وثلاث بس وين وصلنا اليوم؟ وين حنا من الحياة الآن، ووش سوت فينا هذه الأغلاط والتجارب والدموع والضحكات؟

- غلطة صقلتنـا

- غلطة قوتنـا

- غلطة علمتنـا

- غلطة أسستنـا

وأنت اليوم ككاتب محتوى ترا ياما غلطت وأهلك مشّوها لك والمعلمين مشّوها لك ويوم جاء الوقت أنك تمشيها لنفسك مابتمشِّيها؟

ليه صارحني بس ليه؟

- عشان كبرت عمرًا ❗️

- ولا زعلان عشان الناس سابقتك ❗️

- ولا يمكن صوتك الداخلي قاعد يقول لك إذا غلطت أنت مب كفؤ❗️

جعلها تكثر غلطاتـك المهم أنت..

— ككاتب محتوى توك بالبداية ترا عادي تبدأ وأنت ما تفقه شيء مثل يوم أنك بأولى ابتدائي؛ ركَّزت بتعليمك وحاولت تطبِّق النصائح والواجبات من الصفر، قالوا لك غلطت وعرفت من غلطك وش الصح، حبه حبه وصرت متميز بفصلك.

وبفضل الله وجهودك وصلت للمرحلة اللي تطلع للصف اللي بعده وتبدأ مرحلة جديدة من التعلُّم والممارسات، وحتى أنك قادر على توجيه زملائك وتعطيهم بعض معلوماتك وصرت مع الوقت تكتب بقلم، وهذا يعني أنك وصلت لمرحلة الـ VIP، حتى زملائك يستعيرون أقلامك!✨

وكتابة المحتوى مثل كذا، بتبدأ خطوة وراء خطوة وكل مرحلة تحتاج منك تعطيها وقتها من التعلم والأخطاء وتسمح لنفسك بالسؤال من اللي سبقوك وتتقبل أن اللي وصل لمرحلة القلم أنه يعطيك قلم من أقلامه ترا ما فيها شيء✔️.

الحياة ياصديقي أخذ وعطاء وما هي دائمًا ورديَّة وبدون أخطاء، بأقلامنا نلونها وبحبنا لأنفسنا يظهر إبداعنا لغيرنا..🎨

— دامك وصلت لهنا؛ بقول لك لا ينثني لك عزم ولا توقّف دام الأمل موجود، قوِّي عزومك وشدّ حيلك، وبتوصل إن قالها الله لكلّ المواصيل اللي بخيالك، وأحلامك بتصير واقع أمامك ♥️

إلا بقولك بو عبدالعزيز < (رياكشن لازم تفهمونه) ترا النشرة الجايه بتاريخ ٢٠ ميلادي فيها مفاجئة ومجانيَّـة بعد.

والله إن علومنا كل أبوها غانمة، حبيتنا زيادة وأنا أكتب لأن لو شفت النشرة والقالب المجاني وعرفت بيساعدك بايش بتدعي لنا بكل وقت إجابة.

ومثل ما قلت لك ترا صرت واحد من مجموعة نقالين العلوم ومبروك عليك العضويَّة🌟

لا تنسى تشاركنا انطباعك عن النشرة وتصوِّر جزء بسييط منها على الاكس ، وهذه أحد مهامك كنقال علوم ثقة على ما يقولون، وتجيب لنا مشتركين طمعانين بالعلوم الرهيبة والرسائل اللي تتكلم عن لسانكم✨.

— إلى نشرتنا القادمة خلِّك بخير وتعلَّم كيف تحب نفسك وتوصل لحب الذات الجميل المحمود لأن وقتها كل شيء بيصير يحبك بإذن الله♥️.