نشرة ميما البريدية - العدد #9

بدايات متأخرة

بالضبط زي نشرتنا الأولى لهالسنة اللي تأخرت خمس شهور، بس بإذن الله تكون لطيفة وممتعة لكم

وخلونا نبدأ هالمرة من غير تعريفات أول، حتى افتتاحية للنشرة

كلنا عشنا وأكيد نعيش شغف البدايات سواء في علاقاتنا الشخصية أو في حياتنا العملية أو حتى اليومية، بس بطرق مختلفة

مثل الحب، بدايات الوظيفة، بدايات كوب القهوة كل يوم صباح، بدايات العلاقات، كل شمس تطلع علينا بداية، لكن نوع البداية إيش هو؟

هذا الشي اللي نجهله، ممكن تكون بداية سعيدة ورايقة زي ما نقول، وممكن تكون العكس حزينة أو منطفئ شغفها

بس كيف لو كانت بداياتنا متأخرة شوي؟ مثلًا أشياء كثيرة في حياتنا

نحب متأخر أو نعيشه متأخر، تحسوا هالشي خطأ؟ ولا صح؟ طيب مو في مثل يقول كل تأخيرة وفيها خيرة؟ وفي التأني السلامة وفي العجلة الندامة؟ طيب إذا كان التأخير مطلوب، ليه بالمقابل الدفعة مطلوبة كمان؟ مثل:

البصمة بالوقت مطلوبة؟ المبادرة قبل فوات الأوان مطلوبة، المواعيد الدقيقة، تذكرة الطيارة؟ رنة الجرس

من وجهة نظري كميما، وشخص في نهايات العقد الثاني من عمره: تذكرون أنشودة عهد الأصدقاء يا جيل التسعينيات؟ بارت (وتهدينا الحياة أضواء في آخر النفق... وطبعا بترك تكملة الأنشودة عليكم) كذا أشوف البدايات المتأخرة، العلاقات المتأخرة، حتى الرزق المتأخر هو من ربنا أكيد، بس نشوف فرحته لما نكسبه ويصير لنا مثل الضوء في آخر النفق، إنك تسعى هذا من جهدك، وإنه يجيك سعيك هذا رزق ربي لك، وقيس على كل شي بحياتك

مو عيب نتأخر في نجاحنا ووصولنا، بس عيب إننا نوقف وما نوصل، مو عيب نتأخر ونستوعب، بس عيب يفوتنا إننا نستوعب

مو عيب ما نتوظف، بس عيب إننا ما نسعى للوظيفة، والقائمة تطول، مو عيب إني أسهر، بس عيب أنام عن سعي، كثير ممكن نعددها، بس قليل اللي ممكن نندم فيها على بدايتنا المتأخرة لأنها تاخذ من أعمارنا أكثر

بس الأكيد إننا بنسعى لها.. ونصيحة مني وحق لكم علي، اليوم ابدؤوا وبكرة ابدؤوا، كل يوم خلوه بداية أحلى من اليوم اللي قبله، ممكن تصحون مكسلين، تقوموا وتتأملوا السقف نص ساعة، بس والأكيد بنص التأمل بتفزون لأنكم تأخرتوا على بداية يومكم الجديد، بس بديتوه على كل حال

نصيحتي مهما تأخرتوا وتأخر فيكم الزمان والمكان، اوقفوا شوي وانطلقوا بسرعة أكبر وبقوة أعظم

صدقوني لو ما كان في شي اسمه بداية متأخرة، كانت كفة الفشل تساوي كفة الخسارة (فكروا فيها بعمق)

مجرد ما يدق منبهكم لبداية اليوم هذه بداية، ومجرد ما تبطلوا تحطوا للمنبه غفوات وتقوموا هذه بداية ولو متأخرة دقايق

وقيسوها في كل تفاصيل حياتكم وبتكتشفوا إن ما فاتنا إلا الشر، لا أكثر ولا أقل

ختامي لكم جملة بسيطة: قطاركم ما يفوتكم طول ما فيكم نفس للسعي، تأخرتوا بس لا تستسلموا انتفقنا؟

دمتم في حفظ الله 🌷