نشرة ميما البريدية - العدد #8

ختام سنة 2025

وبما أن هالنشره بتكون الأخيره بإذن الله، من غير شر لهالسنه خلونا نتكلم عنها أكثر شوي.. السنه اللي مرت وأخذت منا عمر ما تعتبر أيام بس، هي دروس وهي رحلات، كل مره أخذنا مركب هالسنه برحله جديده، في رحلات نطلع منها مبسوطين ورحلات العكس. بالنسبه لي وكميما وأي شخص بيتكلم عن هالسنه قد ايش كانت معاه، أنا كانت معي سنه لطيفه.. صدق إني خسرت فيها شغلات كثيره ومنها اللي قدرت أعديه ومنها اللي باقي ضايعه فيه، بس بالمقابل كانت رحلاتها لي بجزء كبير جميله.

صدقوني الأيام مهما تعبتنا ربي ما بيحملنا ثقلها إلا إنه يعرف ومتأكد إننا قدها، وإن الشي اللي نتحمله بالمقابل بيجزانا خير عليه وبيفرح قلوبنا حتى لو زعلها طال، وبيعوضنا خير العوض, ربنا يقول: (أنا عند ظن عبدي بي، فليظن بي ما شاء) دائماً وأبداً أحسنوا ظنكم بربكم واحتسبوا مصابكم عنده أجر، سواء في الدنيا أو في الآخره.

تدرون زمان لما كنا نسمع كلمة "الأيام كفيله تربيك" كنت أحس فيها مبالغه.. وش تربي؟ الدنيا حلوه، نروح مدارسنا، نجلس مع أهلنا وأصحابنا وبابا يعطينا المصروف والدنيا سعيده! بس كل ما تمر الأيام وتكبر تعرف إن الأيام جالسه تاخذ منك اللي عطتك هو بالأول وتبدله لك بدروس، منها الصبر، الرضا، التحمل، التخطي.. والقائمة تطول، طول ما عمرك مديد وموجود بالدنيا بتتعلم لين ينتهي الكون.

دايماً الأيام والدنيا بشكل عام تختبرك بالامتحان وبعدين تعطيك الدرس، مثل إنها (تختبرك بالفقد وبعدها تعلمك الصبر والاحتساب) هذي هي الدنيا.. ولو جلس كل شخص بينه وبين نفسه وفكر بالأيام اللي مرت عليه هالسنه وكم اختبار دخله وكم درس تعلمه وكم درس باقي يتعلمه، بيعرف إن هو أكثر شخص طلع كسبان حتى لو عينه ما تشوف الربح الآن، مصيره يشوفه جواته هو.

كل شخص يحتاج قبل تنتهي منه هالأيام يوقف وقفه حقيقيه مع نفسه يحاسبها وين راحت وأيش سوت له بهالسنه، بأيش غلطت وبأيش كانت صحيحة.. هل أنتي كذا تمام لبداية سنه جديده ولا نحتاج نسوي بعض الرتوش والـ Rules لهالسنه؟ كل شخص عنده أمنيات يبي يحققها، أحلام يسعى لها وذكريات منها السعيده اللي يتمنى تبقى بذاكرته، ومنها اللي يتمنى إنها تتلاشى منه.

نصيحتي لكم.. رتبو حفل استقبال سنتكم الجديده مع أنفسكم، اعزِموا أحلامكم وأمانيكم وطموحاتكم، حتى فشلكم كمان اعزموه خلوا عنصر المفاجأة بهالحفله أنتو ؛ تفاجؤوا بكل إنجاز سويتوه وكل حلم حققتوه.. افرحوا بفشلكم لأنه كان بعد محاربة طويله وأنتو كنتو كسبانين فيه مو خسرانين، هو اللي بيخليكم أقوى وأصلب من قبل, صحيح ان الدنيا ما تجي على ما نتمنى بس بأذن نقدر نخليها تجي بالطريق الى نتمناه

ختام مني: يارب تكون عليكم بداية سنه مليانة انتصارات ورضا لكم.. وتهبط كل الرحلات اللي كانت وما زالت محلقه في السماء المليانه بأحلامكم  لمحطاتكم، وتفرحوا باستقبالها بين يدينكم.


أحبكم كثير وشكراً من القلب لقراءتكم بحب لي.. دمتم بكل الحب والخير.