رمضان شهر الخير -حرفيا-

وبما أننا في البزنس نطبق مقولة "الوقت كالسيف إن لم تقطعه قطعك" راح أحكي لك عن البزنس في رمضان 👀

قبل ٣ سنين كان أول رمضان لي في البزنس ووقتها قريت إحصائية تقول أن رمضان هو أكثر الشهور مبيعاً فقررت استغله بأقصى ما عندي

بس لما جت لحظة الحقيقة ما عرفت بأي وقت اشتغل وأخلص مهامي فقلت خلني أمشي وأجرب

أول يوم اشتغلت بعد ما رجعت من الدوام مباشرة

ثاني يوم اشتغلت الفجر بعد ما هدأ البيت

ثالث يوم اشتغلت بعد التراويح وأنا فيني خمول من الأكل

ورابع يوم ما اشتغلت أبداً

حرفياً كنت ضايعة ومنحاسة بشكل ما تتخيلينه ابي استغل شهر رمضان وأرفع مبيعاتي بس ما قدرت من كثر الحوسة والتسويف!

تجيني رسالة واتساب العصر أقول برد بعد الفطور وأنساها وما يذكرني إلا رسالة من العميلة المعصبة على التأخير 🫠

تجي حلقة مسلسل حلو وأجلس أتابعها وأقول بسوي شغلي بعد ساعة ...

وفجأة ما أحس إلا والساعة صارت ٢ الفجر ولازم أبدأ أسوي السحور

اليوم متى خلص؟ كيف مر كذا بسرعة وأنا ما حسيت!

ضاع مني أسبوعين وأنا حايسة بنفسي لين قررت أسوي لي روتين والتزم فيه عشان أنجز وأبيع مو معقول الكل يبيع ويستفيد وأنا قاعدة بمكاني!🪫

سويت لي جدول وكتبت فيه كذا👇🏻

الساعة ٤ م رد على العملاء

الساعة ١٠-١١ م تنفيذ وتغليف طلبات

الساعة ١٢ ص رد على العملاء

الساعة ١ ص رد على رسائل الانستغرام ونشر ستوري

الساعة ٢ ص ترتيب الطلبات اللي بتطلع للشحن بكرا

الساعة ٥-٥:٣٠ ص الرد على العملاء

وصار هذا هو روتيني اليومي للبزنس كل يوم ألتزم فيه حتى انتهى الشهر🔋

وأبشركم مبيعاتي ذاك الشهر كانت رهيبة حتى أني أخذت إجازة بشوال أسبوعين كمكافئة لنفسي😆

الزبدة: رمضان شهر الخير

كل تاجرة عباية تقدر تكسب فيه إذا كان شعارها ⤵️

"نظمي وقتك ولا تخلين المهام تنتصر عليك" 🤝🏼

نشوفك على خير في النشرة الجاية😌