أنا مش إنسان أنا تاجرة عبايات

قولي لي كم مرة قمتي من جمعة أهلك أو صديقاتك عشان تردين على مكالمة أو رسالة متعلقة بالبزنس؟

وكم مرة ما قدرتي تستمتعين بالطلعة عشانك تفكرين بقائمة مهامك وتتذكرين هل فيه مهمة ما سويتيها قبل تطلعين وإلا لا؟

تعالي نتكلم عن هذا الموضوع أكثر ..

"كل شي يخلص إلا الشغل ما يخلص" مقولة سمعتها كثير من جدتي وخالاتي لما كان عمري ١٠ سنين وكل ما كبرت بالعمر أكتشف أنها واقعية جداً 💯

خلصتي مهمة؟ يلا ذي مهمة ثانية، رديتي على هالرسالة؟ جاك إشعار جديد..

كأننا في دوامة مالها نهاية ندور وندور لين نطيح وننهار إلا لو "خططنا من بدري".

وكتاجرة عبايات التخطيط من بدري مرة سهل عليك! 🥳

تعرفين متى مواسمك (العيد-رمضان-اليوم الوطني الخ..) وبالتالي تقدرين تصممين عباياتك وتشترين أقمشة وتتفاهمين مع الخياط قبلها بشهرين

وأول ما تخلصين تكلمين مصورة ومودل وتضبطين جلسة تصوير خورافية واللي يتبقى لك من الوقت يكون لتجهيز محتوى السوشل ميديا واللي يكون غالبا مأخوذ من جلسة التصوير.

يعني ما باقي لك إلا تكتبين محتوى وكابشن وهاشتاقات 🪄

شفتي كيف حولناها من مهمة ضخمة وصعبة إلى مهمة وحدة صغيرة؟

كل هذا صار بسبب التخطيط بدري، سويتي كل شي على رواق وأخذتي وقتك وما جبتي العيد في أحد 🫠

شعور حلو صح؟

لسى عندك وقت وتقدرين تلحقين عليه لو بدأتي تخطيط لكولكشن عيد الفطر من الآن

يلا سكري النشرة وجيبي أقرب دفتر وأبدأي اكتبي خطتك للموسم القادم مع كوب قهوة يروقك 💸

ونشوفك على خير في العدد القادم بإذن الله 🫡