لين متى تنتظرين؟

  قبل كم يوم شفت أن "زد" نزلوا تقويم تسويقي خاص لهالسنة فيه كل الأيام العالمية والمناسبات المهمة

لك كتاجرة عبايات عشان تفعلينها وتنشرين عنها بحسابك

أول ما شفت التقويم طلبته مباشرة والصراحة متحمسة لوصوله بس هذا التقويم خلاني أفكر

"إلى متى الانتظار والتسويف؟"

ننتظر وقت مثالي

نسوي منتجات مثالية

نطلب خدمات مثالية

أعرف أن حامت كبدك من كثر ما قريتي كلمة "مثالية" بس الصدق كلمة غثيثة جدا وتخلينا نسعى نحو أشياء

محد مهتم لها ولا حتى بناخذ جائزة عليها

فتحتي متجر في ٢٠٢٢؟ طيب عادي

صممتي عباية ما تلقين منها ثنتين في العالم ؟ طيب عادي

ما فيه جائزة على قلة الأخطاء أو قلة التعديلات بس الفرق بينك وبين اللي تخطت فكرة "المثالية" وحاولت وغلطت

أنها تعلمت وطورت من نفسها وعرفت وش ينفع ووش ما ينفع وكيف ممكن تحسن من متجرها وعباياتها أكثر حتى

تجذب العميلات

بينما أنتي -واسمحي لي على صراحتي الحادة شوي- زي ما رحتي جيتي لا تعلمتي ولا تطورتي ولا أنجزتي شي

ولكذا أعيد سؤالي من جديد "لين متى تنتظرين؟"

لين تكبرين في العمر وما عاد يصير فيك حيل للشغل؟

لين يصير السوق مليان ويكتفي بالمتاجر الموجودة ويصير دخولك له شبه مستحيل؟

لين تخلص فلوسك وما عاد يمديك تدفعين للخياط والأقمشة؟

أو لين يطيب خاطرك من الفكرة وما عاد ودك تسوينها؟ هذا سؤال أتمنى منك تفكرين في إجابة له حتى

ما تندمين مستقبلا.

وبس والله وصلنا لنهاية عدد اليوم وأتمنى لك يوم سعيد