نشرة فلفل وردي - العدد #1 ليش نحتاج فُسحة إبداع؟

مؤخرًا شفت فيديو على يوتيوب بعنوان: Why you need a mini creative project 

وكانت المتحدثة فيه تقول فكرة حسيت إنها وصلت لجزء مهم في داخلي وهو إن الإبداع ما له علاقة بالخبرة، ولا لازم نكون خبراء عشان نبدع.

صرت أفكر بعدها:

ليش طول الوقت أحط ضغط إني لازم أطلع بشي “كامل” أو “يستحق النشر”؟ ليش ما أسمح لنفسي أجرب حتى لو كنت أعرف مسبقًا إن النتيجة ممكن تكون عادية أو بسيطة؟!

اشتريت ألوان مائية وبدأت أولى تجاربي:

ما كنت أعرف كيف أبدأ، بس فتحت فيديو تعليمي وقلت لنفسي: خليني أمشي مع الدرس خطوة بخطوة.. حسيت كأن الوقت صار مرن أكثر حتى وأنا أشوف الألوان تتشابك بشكل طفولي، عرفت إن القيمة مو في الناتج، لكنها في اللحظة نفسها: لحظة انغماسك بالكامل بدون تشتت.

يمكن التجربة كلها ما استغرقت إلا نص ساعة، بس النتيجة أكبر من هذا بكثير.

استوعبت بعدها أهمية إن كل واحد فينا يحتاج مشروعه الإبداعي الصغير .. مو شرط يكون رسم أو تلوين: ممكن كتابة، خياطة، تصوير، أو حتى زراعة وردة، الفكرة هي إنك تلقى شي يذكرك بنفسك، ويطلعك من دوامة الإنجاز اللي ما تخلص.

صرت مقتنعة إننا نحتاج نرجع نبني علاقتنا مع الأشياء البسيطة: اللون، الملمس، الصوت... لأنها ترجعنا لجوهرنا: كائنات تحب تخلق وتحب تستمتع، حتى لو ما في شهادة تعلقها على الجدار.

ملاحظة: اللوحة معروضة للمزاد وستباع لأعلى سعر 😆

سؤال النشرة:

1. شنو مشروعك الإبداعي اللي ودك تبدأه، بس تظن إنك تحتاج “الوقت المناسب”؟