خيانة المحتوى بتوجع نشرة سرحان البريدية - العدد #7

كتبت، راجعت، راعيت النبرة، فهمت البزنس، وصلت الرسالة…وفجأة تلاقي البوست نزل مختلف تمامًا. أو الإيميل اتبعت بعد ما اتقطع حتت واتلضم تاني بطريقة غريبة أو تكتشف إن حد عدّل في شغلك من غير ما يرجعلك أساسًا.

عارف الإحساس؟

زي ما تكون طباخ محترف، حضّرت طبق متعوب عليه ولما جيت تقدّمه… حد رش عليه كاتشب وقالك: "كده أحلى".

طب ليه ده بيحصل؟

• عشان السرعة دايمًا أهم من الجودة.
• عشان مافيش ownership حقيقية ولا احترام للدور.
• وعشان في ناس شايفة إن المحتوى "أي كلام بيتكتب"، مش expertise.

وده بيعمل إيه فيك؟

• بيهد ثقتك في شغلك.
• بيخليك تشتغل أقل من طاقتك.
• وبيخليك تفكر 10 مرات قبل ما تتحمّس لحاجة.

طب نعمل إيه؟

• طالب إن شغلك يرجعلك قبل ما يتنشر. ده مش ترف، ده احترام للـprocess.
• اكتب ملاحظاتك مع الشغل. خليك إنت اللي بتوجه النقاش بدل ما تسيبه عايم.
• واجه التعديلات اللي مش منطقية. ولو اضطرّيت، اعمل نسخة قبل وبعد… وخلي الفرق يتكلم.

افتكر دايمًا:

"الناس اللي بتشيل شغلك من غير إذنك، مش بس بتبوّظ الناتج… دي كمان بتسحب منك احترامك للي بتعمله."

أما لو رامي طوبة المكان، فإتس اوكي كمرحلة من المراحل والله يعينك يا فنان.

🗓️ دي كانت النشرة الـ 7  لو عدّى عليك الموقف ده، اعرف إنك مش لوحدك…  وإنك ليك حق تطلب احترام شغلك ووجودك في كل خطوة. استناني السبت الجاي في حلقة: "سيبلي مساحة أبدع – مش كل حاجة بالـ brief" (عن الاحتياج لحرية ومرونة في التفكير… مش تنفيذ أوامر والسلام).

سلام يا حبيبنا ❤️