أنت مش كاتب... أنت ATM محتوى - نشرة سرحان البريدية - العدد #5

تفتكر شغلانتك ككاتب محتوى هي التفكير، التخطيط، الإبداع، الصياغة، اللعب بالكلمات؟ ولا إنك تبقى ATM بيطلع بوستات؟

اللي بيحصل بجد: كل يوم فيه 3 بوستات، 2 إيميل، 1 إعلان، وCaption زيادة لو حد افتكر وشوية وصف منتجات.

والسؤال مش "الفكرة إيه؟"

السؤال بقى: "جاهز؟ مخلّصتش اللي قولنا عليه امبارح ليه؟"

النظام ده بيعمل إيه فيك؟

1. بيكسر علاقتك بالإبداع: لأنك دايمًا في وضع تنفيذ، مش تأمّل.
2. بيخليك تشتغل على السهل السريع مش الصح الصعب.
3. بيغذي وهم الشغلانة الإنتاجية… بس بيقتل القيمة.

خلينا نرجع خطوة ورا:

عيني عليك ياللي ماشي بدون دراسة جدوى!

يعني أنت شغال أكتر… بس بتكسب أقل. زي بالظبط شخص شغال على مكنة بتطلع فواتير فعلاً بس للأسف فاضية.

عارف الإحساس ده؟

لما تلاقي نفسك بتكتب نفس الجملة… بس بـ 5 طرق. أو لما تبعت نفس الرسالة… بس كل مرة بلون مختلف.

أنت مش مكرّر، بس الشغل هو اللي بيكرّرك. قلبي معاك والله.

طب نعمل إيه؟

• إعمل refuel أسبوعي: خد ساعة في الأسبوع تقرأ، تتفرج، تفكر… تعبّي مخك. شاطر إنك بتابع النشرة دي على فكرة.
• اقترح نظام batching: يوم تكتب فيه، ويوم تفكّر فيه. مش لازم كل حاجة تتحل في لحظتها.
• احسب الإنتاجية بالقيمة مش بالعدد. ممكن بوست واحد يجيبلك اللي 10 مجابهوش.

ودي جملة لازم تترسّخ:

"مش شغلتك تملأ كالندر..شغلتك تخلق أثر."دي كانت النشرة الخامسة واللي بنحاول فيها نصيح ما بعض ونفضفض عن وجع كل كاتب حاسس إنه بقى خط إنتاج مش إنسان.

استناني السبت الجاي في موضوع:  "اللي بيقولك: العميل دايمًا عنده حق؟ كدّاب."  عن لحظات الـ frustration مع clients مش فاهمين هما عايزين إيه… بس متأكدين إن اللي إنت كاتبه "مش عاجبهم". بتوجع بس بتحصلنا والله العظيم!