العيب مش فيك والله، العيب في النظام! نشرة سرحان البريدية - العدد #2

في عالم كتابة المحتوى، فيه قانون غير معلن: "لو كتبت بسرعة، تبقى شاطر."  ولو خدت وقتك؟  "إنت بتهري، ومش productive، ومش multitasker زي باقي الفريق."

بس الحقيقة؟

المحتوى عمره مكان سلق بيض! كل ما كان فيه وقت أقل… الناتج هيكون أضعف، حتى لو شكله حلو من بره، اسألني أنا.

الواقع اللي عايشينه:

• بتستلم البريف الساعة ١٢… والمطلوب التسليم الساعة ٢.
• بتكتب بوستات حوالي 15 بوست في الشهر في ٣ أيام… وباقي الشهر كله مراجعات.
• بيجيلك تعديل، وبعده تعديل على التعديل، من غير ما حد يسأل:  هو أصلًا إمتى كان فيه وقت للتفكير من الأول؟

خلينا نواجه حاجة بسيطة:

الإبداع محتاج وقت… مش تكة زرار، + المحتوى هو الأساس لو ضعيف فكل سنة وانت طيب!

في دراسة من جامعة Harvard Business Review، قالوا إن:

"أكتر من 72% من الناس في الوظايف الإبداعية، لما بيشتغلوا تحت ضغط الوقت… بيفضلوا الحلول السريعة على الأفكار الجديدة."  [المصدر: HBR, 2019]

يعني ببساطة:  أنت مش قليل… أنت مضغوط.

طب ليه دا بيحصل؟

1. الـ planning فوضوي أو مش موجود أصلاً.  مفيش وقت للتفكير لإن الدنيا دايمًا ماشية بمبدأ "نلحق ننشر".
2. غياب التنسيق التنفيذ/الجدولة/التعديل المنظّم.  الكل بيشتغل في كل حاجة… فمفيش مساحات بين التسليم والمراجعة.
3. العميل دايمًا "عاوز الحاجة دلوقتي"، حتى لو هو مش جاهزة.  فالمحتوى بيتعامل كأنه عنصر لازم يتحل بسرعة مش قيمة بتتبني.

طب إيه اللي بيحصل لما بنشتغل كده؟

• بنعيد نفس الأفكار كل مرة.
• بنستخدم قوالب جاهزة… مش لأننا مقتنعين، بس علشان نخلّص.
• بنفقد الشغف… ونبدأ نحس إننا " شغالين في مصنع طوب"، مش "بنبدع أو نخلق شيء جديد ومميز".

طب نعمل إيه وإحنا عارفين إن الـ deadline لا يرحم؟

1. طالب بمساحة صغيرة للتفكير حتى لو ساعة.  ما تقولش "أنا هبقى تقيل عليهم"… بالعكس، ده اسمه شغل محترف.
2. خلي عندك draft templates للأفكار الجاهزة… بس عدّل فيها.  السر مش في تضييع الوقت… السر في استخدام الوقت صح.
3. ابدأ دايمًا من الهدف مش من الفورمات.  لما تعرف البوست ده ليه؟ بتكتب أسرع… حتى لو الوقت قليل.

أهم حاجة:

ماتقيسش نفسك من سرعة تسليمك… قيسها من تأثير كلامك وهل حققت الأوبجيكتيف بتاع البيزنس أو اللي انت راسمها ولا لأ!  لو كل شغلك بيتسلم بسرعة… بس مبيسيبش أي أثر  يبقى المشكلة مش فيك… المشكلة في السيستم.

طب الحل ايه؟

1- تعمل مشروع خاص بيك، وتجرّب وتروق عليه براحتك جدًا. وصدقني بجد هتستفاد كتير جدًا. 

2- تقبل شغل فريلانس لو المشكلة دي مع الوظيفة بدوام كلي ليك. وقتها هتحط شروطك وتطلع حاجة لوز اللوز. 

3- تشتغل بارت تايم وتعرفهم وضعك وتختارهم بناءً على شروطك. 

كده قادر انك تعيش بالوظيفة اللي بالدوام الكامل، ونفس الوقت بتعمل شيء محترم يستحق إنه يتضاف في البورتفوليو حجك. لو في مقترح تاني قولي عليه في الكومنتس.

🗓️ دي كانت تاني نشرة معانا، استناني السبت الجاي في موضوع: "ليه كل شغلك لازم يتراجع؟"  عن الخيط الرفيع بين الـ feedback البنّاء… والـ micromanagement. اه نسيت أقولك لو حسيت إن في فايدة بتلاقيها اكتب بوست ومنشني في لينكدإن أو شارك لينك النشرة مع من تحب ❤️