أول صلاة بخشوع بعد 5 سنين

السلام عليكم ... انا عارف إني كتبت قبل كده عن اني مش هنزل حاجة إلا لما يخلص الفاينال، لكن النهاردة حصلت حاجة مهمة انا غالبا لو مكتبتش عنها دلوقتي مش هيتيح ليا الفرصة أكتب عنها بعدين ، الحاجة اللي هتكلم عنها النهاردة هي مشكلة كانت معايا ولازالت معايا حتى الآن لكنها النهاردة شئ مختلف تماماً ، النهاردة أنا هتكلم عن علاقتي الشخصية مع ربنا وخصوصاً الصلاة وإزاي في اليوم ده أخيراً صليت اول صلاة بخشوع تام بعد 5 سنين مقدرتش فيها أرجع لنفس التركيز والخشوع!

من الحاجات اللي دايماً بؤمن بيها إني مش الوحيد اللي بيعاني من المشاكل دي ، أظن إن أغلب الشباب اللي في سني او اكبر مني عندهم نفس المشكلة وهو "عدم التركيز في الصلاة" ،شئ في منتهى الأهمية ويغفل عنه الكثير ومع ذلك تبقى مشكلة كبيرة جداً عندي بشكل خاص وعند الناس بشكل عام ، لأن أنا لما أدخل المسجد وأصلي أنا حرفيا "مش بفتكر إني بصلي إلا بعد الصلاة " فمن أول ما أقول الله أكبر يدخل دماغي في دوامات كتير جداً ... عن الفاينال اللي قرب ... عن مشاكلي مع فلان ... عن حدث معين ... عن اي شئ يفصلني عن الحاجة اللي بعملها وهي إني بصلي

معتقدش إنك هتصدقني لو قلتلك إني فعلاً مقدرش أفتكر صلاة واحدة قدرت أركز فيها بشكل كامل وانا واعي بكل اللي بقوله وكل الحركات اللي بعملها ، حرفياً اليوم الوحيد اللي حصل فيه الكلام ده كان في تانية اعدادي وكان وقتها حاجة يعني مختلفة لكني مكنتش مدرك أهمية الموضوع ، من أول تانية إعدادي حتى الآن أنا فعلاً مقدرش أقول على صلاة واحدة ركزت فيها بنسبة 100% ولو ركزت هيكون تركيز 50% او أقل كمان، وعلى الرغم من أني فعلاً ملتزم في الصلاة وكل يوم بصلي كل الفروض لكن صلاتي بدون خشوع وبدون تركيز تماماً!

معتقدش إن فيه ناس مدركة قد ايه المشكلة دي مؤثرة على الناس بشكل كبير، الأغلب بينصحك ويقولك صلي ووقت ما تصلي اكيد بنسبة كبيرة جداً إنك مش هتركز التركيز الكامل في الصلاة ، واللي مضايقني فعلاً إني مش مدرك أهمية المشكلة إلا النهاردة!!

24/12/2022 

قبل النهاردة بأسبوع تقريباً كنت بسمع لناس معينة فيما يتعلق بالجانب الديني ، لو حد متابع معايا فأنا قسمت سنة 2023 على كتب كل كتاب من فئة مخصصة لوحدها ، ده اللي خلاني أجرب كتب من مجالات مختلفة وفي نفس الوقت أفتح لنفسي مجال بحيث لو عجبني مجال من المجالات أتعمق فيه أكتر وأكتر !

من الحاجات دي كانت المجال الديني أو الجانب الديني فأقرأ كتب عن الإسلام وتاريخ الرسل وكده ، فقلت في نفسي "أيه هي المشاكل الفعلية اللي عايز أقرأ عن حلها ؟" فجه في بالي حاجات كتير زي عدم وجود علم بالجانب التاريخي للرسل ، مش عارف مثلاً تاريخ بعض الأسماء المهمة زي عمر بن الخطاب أو ابو بكر الصديق أو حتى سيدنا محمد نفسه ! ، لكن وانا بفكر قلت لنفسي "هو انا فعلاً كويس في الحاجات الأساسية وهنا كمثال الصلاة مثلاً؟" علشان أدرك إني فعلاً أنا مش بس وحش ، أنا مجربتش قبل كده إني أصلي صلاة خاشعة كاملة ، بالفعل ومن بعد كده قررت إني أبدأ في علاج الأمر علطول ومن غير تفكير !

بحثت في اليوتيوب على شيوخ انا كنت عاملها فولو وأعرفها وأتوقع الكثير يعرفها وبحثت عن حلول أقدر أحل بيها المشكلة دي وهنا كانت الفيديوهات دي

ايه اللي يساعدني على الخشوع في الصلاة؟ - مصطفى حسني

ايه اللي يساعدني على الخشوع في الصلاة؟ - مصطفى حسني - YouTube

أهم 4 نصائح للخشوع في الصلاة مقطع سيجعلك وكأنك تصلي لأول مرة | أمير منير

أهم 4 نصائح للخشوع في الصلاة مقطع سيجعلك وكأنك تصلي لأول مرة | أمير منير - YouTube

ده كانوا فيديوهين حاولت أطبقهم في صلاتي اليومية ، ساعات كانت بتنجح وساعات لا ، لكني مازلت لم أوصل للمرحلة اللي أخلص فيها صلاة بكل خشوع 

أول صلاة بخشوع تام!

النهاردة وفي صلاة العصر جربت أني أصلي أول صلاة خاشعة وأحلى صلاة تقريباً حتى الآن ، اولاً أنا لم اغفل ولا مرة ، ممكن متصدقنيش لأن انا فعلاً متفاجئ ، ولا مرة فكرت في حاجة جانبية بعيداً عن الصلاة ، تلاوة هادئة وانا فاهم انا بقول أيه ، حركة بسيطة لكن معاها تركيز غريب أنا فعلاً مش هقدر أوصفه ، بدل ما كانت الصلاة بتخلص في حدود الخمس دقائق التركيز خلاها في ربع ساعة ، شئ أنا مجربتهوش قبل كده ولا حتى قادر أوصف الهدوء والدعاء اللي قدرت أقوله في الوقت ده !

هيجي في دماغك سؤال أنا ليه أصلاً بتكلم عن الموضوع ده؟ يعني إيه اللي هقدر أستفيد منه لما أقولك على حاجة زي كده ، اللي هستفيد منه فعلاً هو إني عارف ومتأكد إن المشكلة دي فيك أنت كمان ، المشكلة دي مش فيا انا لوحدي لكن لأي شخص بيقرأ المقالة او مقرأهاش كل واحد فينا عنده مشكلة مع الصلاة ، سواء مكنش بيصلي بخشوع أو حتى مش بيصلي من الأساس ، وانا نادم ندم كبير إني مديتش للموضوع أهميته وأتمنى من اللي بيقرأ إني يدي للصلاة إهتمام زي ما بيدي لأي حاجة في حياته جزء من وقته!