لغات الحب الخمس كتاب مختلف .... جداً

بواسطة Adham Bassyouni #العدد 16 عرض في المتصفح
نقاش عن أول كتاب في سنة 2023

عزيزي القارئ ... مش عارف أقول لحضرتك أيه يعني وحشتني فعلاً ، تخيل من كتر إشتياقي بدأت أقرأ كتب عن الحب :) ، لا بعيداً عن الهزار وحشتني فعلاً 😂 ، عامل أيه حابب أسمع اخبارك وأخبار حياتك وأحبائك عاملين أيه ؟ ، النهاردة هتكلم عن كتاب مختلف تماماً ، حاجة كده قررت أجربها لأول مرة في حياتي وقلت أشوف هل هطلع بحاجة مهمة ولا لا ، واللي لقيته فعلاً مكنش في توقعاتي أبداً !

حقيقةً أنا بعد ما قرات الكتاب أكتشفت إن نوعية الكتاب ده مش الحاجة اللي كنت عايزها أبداً ، من الكتب اللي كنت عايز أشوفها هو كتاب بيتكلم عن التربية خصوصاً عن تربية الطفل الصح ، فكوني هكون أب في المستقبل كنت حابب أشوف أيه هو كلام الناس عن التربية ، إزاي أقدر أربطهم بحاجات مهمة زي القرآن والصلاة والقراءة وغيره ، كل ده أنا كنت عايز أشوف طرق الناس في الوصول لقلب الأولاد، لكن مع البحث ملقتش الكتير من الكتب اللي بتتكلم عن الموضوع ده بالذات ... الأغلب كان بيتكلم عن العلاقات وإزاي تتعامل مع الشريك وانا كان هدفي حاجة غير دي تماماً شوفت يا عزيزي القارئ 🤣 ، وبعد بحث مش طويل لقيت فعلاً الكتاب اللي أجمع ناس كتير جداً إنه من أفضل الكتب اللي بتتكلم عن العلاقات (اللي هو أساساً مش هدفي😂) فقلت تمام وماله يلا نجرب وممكن فعلاً أستفاد مستقبلاً.

قرأته لحوالي أسبوع كامل مع أخذ النوت وكتابة كل مهم أقدر أقول إنها تجربة رائعة ومندمتش على قراءتي للكتاب ده فيلا بينا نتكلم عليه في السريع كدا

لغات الحب الخمس

لغات الحب الخمس هو من كاتب وإستشاري في العلاقات الزوجية "جاري تشامبمان" وعمل الكتاب نظراً لوجود المشاكل المتعددة بين الزوج والزوجة وقرر فعلاً يعمل كتاب يجمع فيه خبرته في العلاقات الزوجية ونتائجه من حل مشاكل كتير متعلقة بالزواج.

حقيقي أنا لم يكن إرتباطي بالكتاب حاجة قوية فعلياً لأني مكنتش قابل إني أقرأ كتاب من النوعية دي من الأساس ، انا بقرأ بالعافية حرفياً ، لكن مع قراءتي المستمرة لقيت إنه مختصرش بس على الزواج لكنه كان بيتكلم حرفياً على كل حاجة وكل شخص ، إزاي تقدر تفهم لغة الحب للناس اللي حواليك ؟ إزاي تقدر تستغل معرفتك في جعله سعيد ؟ وإتكلم بشكل كبير على حاجات غير متعلقة بالزواج أصلاً فكان أغلب مواضيع الكتاب عامية مكنتش بتقتصر فقط على الزواج.

ده شئ أسعدني فعلاً لأنه انا أولاً مقدرش أرتبط بكتاب بيتكلم عن حاجة انا معشتهاش من الأصل وكمان هو لو إتكلم عن الزواج وغيره كنت هخاف إنه يذكر مشاكل لا هي متعلقة بمشاكلنا كمجمتع من الشرق وهو مشاكله من حتة تانية خالص ، وبالفعل كملت وكانت تجربة كويسة مقدرش أقول إني ندمت عليها أبداً

مميزات الكتاب

من مميزات الكتاب إنه قدر يحلل مشاكل وحاجات قد تكون مهمة في حياتنا بطريقة سهلة وبسيطة ، لأننا لو أدركنا حاجة من الكتاب هو إننا في يوم من الأيام هنتجوز وهنحمل المسؤولية في التربية فلازم نكون جاهزين نفسياً لأستقبال المشاكل والصعب حتى نقدر نستمتع بالسهل، الكتاب تم تمييزه عن غيره من وجهة نظري إنه :

  • ذكر الكتير والكتير من المشاكل اللي بنسمع عنها ونقابلها في حياتنا بشكل عام وده اللي خلا الحلول بتاعته سهلة الفهم والتطبيق
  • فهم الكتير من المصطلحات بشكل مبسط وكويس فميكنش عندك اي مشكلة في فهم الكتاب
  • عرض الخمس لغات الحب بطريقة ولا أجمل مع أمثلة كتير تقدر من خلالها تفهم هو قصده أيه وتقدر تستفيد من الكتاب

عايز اكون صريح معاكم ودي حاجة ممكن تقابلك وإنت بتقرأ الكتاب ... إنك هتحس إنك عارف هو بيتكلم عن أيه لكن صدقني يكمن الحل في الكتب اللي زي كده في الكتابة!

انا في سنة 2023 عملت نظام مختلف للقراءة ،لما أقرأ انا بعمل خطوتين أولاً القراءة لوقت معين وغالباً مش بيزيد عن نص ساعة كل يوم وثانياً وهو ال "Reflection" أو الإنطباع عن الحاجة اللي قراتها ، شئ أفادني جداً في تثبيت المعلومة اللي قرأتها من الكتاب وحاسس إنها هتكون منقذ ليك يا عزيزي القارئ لو بتواجه صعوبة في نسيان اللي قرأته ، إنك تُخرج اللي قرأته في مكان محفوظ بحيث إنك لما ترجع للمعلومة إنت مش بس هتقرأ المعلومة اللي لقيتها من الكتاب إنت هتلاقي الإنطباع اللي كنت كاتبه وقت قراءة الكتاب! ... شئ في منتهى الأهمية محستش بأهميته غير لما عملته !

عيوب الكتاب

عيوب الكتاب هي عيوب قد تكون شخصية جداً بالنسبالي أنا ومش شرط تلاقي نفس العيوب وأنت بتقرأ الكتاب، العيوب هي الآتي

  • أنا مقرأتش اي حاجة بالنوعية دي قبل كده فمن الأول أنا مكنتش قابل الكتاب بشكل رحب، حاجة موجودة فيا شخصياً وحاسس إنها مش هتكون مشكلة عند أغلب الناس لكنها هتتحل لو قررت أقرا أكتر
  • إنه مغطاش كثير من المشاكل اللي متعلقة بينا إحنا كعرب ... دي حلها إني أقرأ في كتاب عن العلاقات لكن في زمن قديم أو من كتابة شخص عربي أقدر أعرف أزاي هو الحل الأحسن للمشاكل دي

الخلاصة

كتاب لغات الحب الخمس كتاب جميل وبيتكلم عن حاجة إحنا شئنا أم أبينا هنوصلها فكون إنك تشوف وجهات نظر مختلفة هيساعدك في حياتك المستقبلية بشكل كبير ! ، كتاب لم أندم أبداً على قراءته وحاسس إن كل سنة بعد كده هيكون فيه جزء من ناحية قراءة الكتب عن العلاقات وغيره

تقييمي للكتاب : 8/10

مشاركة
مساحة أدهم

مساحة أدهم

مكان أتفرغ فيه لكتابة محتوى عن مواضيع أهتم بها مثل المقالات ونصايح وتجارب

التعليقات

جارٍ جلب التعليقات ...

المزيد من مساحة أدهم