برنامج أوبسيديان برنامج في مستوى تاني!

اتكلمت قبل كده عن برنامج نوشن وقلت ليه هو برنامج رائع ووسيلة تقدر تنظم وترتب بيها أمورك ومهامك ، وبالفعل انا حرفياً بستخدم نوشن حتى الآن ، لكن وقعت معايا مشكلة بسيطة وهي إن نوشن برنامج اونلاين بمعنى إني بشغله بالنت بس ، دي مشكلة بالنسبالي لأن أنا مش دايماً بكون في البيت ومش بيكون معايا نوشن علشان أكتب الحاجات اللي محتاجها ، مع عدم وجود ال end to end encryption لقيت نفسي عايز أدور على برنامج تاني أستخدمه ، وبعد كلام طويل عن بديل لبرنامج نوشن ملقتش غير حاجة واحدة شدت إنتباهي وهو برنامج "Obsidian" واللي هتكلم عليه النهاردة في المقالة دي!

أيه هو برنامج أوبسيديان؟

برنامج أوبسيديان هو برنامج عامل شبة نوشن بالضبط ، فكرته الكاملة تتمحور حول الnote taking وهو أخذ الملاحظات المهمة اللي بتلاقيها سواء كان في محاضرة او عمل أو غيره ،ومن الواجهة تلاقي إنه بالفعل شبهه شبه أي برنامج تاني ممكن تنزله وتستفاد بيه ، لكن أوبسيديان على الرغم من التشابه اللي بتلاقيه في أغلب البرامج إلا إنه ليه خصائص مختلفة تماماً ممكن تخلى أي حد يستخدم برنامج تاني يلجأ لأوبسيديان ، وهنا إن شاء الله هتكلم عن إزاي أوبسيديان فادني بشكل قوي في الشغل بتاعي وكمان في حاجات جانبية زي التخطيط والقراءة وغيره!

تقريباً اللي جذب إنتباهي أكتر لأوبسيديان إني كنت متابع لقنوات طبية كتير جداً ولما سالتهم في التعليقات عن إيه نظامهم في الشغل كانوا بيجاوبوا على الأغلب ببرنامج أوبسيديان ، طبيعي الناس نظامها بيختلف في موضوع المذاكرة والكلام ده لكن إن يكون فيه برنامج يشترك عليه كتير من الناس دي حاجة تعرفك إن البرنامج حلو وممكن أجربه ... وبالفعل قررت إني في يوم أحمل البرنامج وأحاول أشتغل عليه لمدة شهر وده يا عزيزي القارئ هو المهم واللي محتاج تعرفه عن البرنامج

مميزات برنامج اوبسيديان

برنامج أوبسيديان هو برنامج يقال عليه إنك تقدر تعمل بيها "دماغ تانية" وفكرتها إنه برنامج مميز بحيث كل معلوماتك وتلخيصاتك وكل حاجة أنت بتستقبلها عن طريق النت وغيره تحطه في برنامج أوبسيديان بحيث متقدرش تنساها او لو نسيتها تعرف انك حطيت المعلومة في البرنامج فترجعلها في أي وقت ، انا مقدرش أقول إني فعلاً وصلت لمرحلة إني بحط كل معلوماتي في اوبسيديان لكن أكيد مع الوقت هقدر اعملها ، تعالى بقى أقولك على المميزات الرائعة جداً اللي هتلاقيها في البرنامج

Linking

الربط أو linking هي حاجة موجودة في البرنامج تخليك تربط نوت بنوت عن طريق إختصار بتكتبه في الكيبورد ، الحركة دي بتخليك لما تكتب حاجة مثلاً وحابب تفتح موضوع تاني غير اللي أنت بتكتبه فممكن تعمل ربط الموضوع اللي بتكتب فيه حالياً بالموضوع التاني اللي مفكر تكتب عنه ، ممكن متكنش فهمت عليا فهقولك على اللي أنا فعلاً بعمله في البرنامج وبيفيدني إزاي

انا مثلاً بذاكر مادة التروما أو مادة الحوادث ، انا في المادة دي بشوف حاجات كتير جداً من الصور والتشريح وايه العلاج وايه نوع الكسر وغيره ، ساعات لما تشوف المحاضرة تلاقي حاجات معينة زي 'Open reduction and internal fixation' او 'Osteomalasia' أو غيره من الحاجات اللي بتقابلها في طريقك ، الحاجات دي أنت ممكن متكنش عارفها من الأساس وبالفعل بلاقي نفسي بقول "مش أعرف دي معاناها أيه وبعدين أكمل المحاضرة؟!" ، هنا تيجي فايدة البرنامج ، البرنامج بيخليني أعمل مكان كامل للمرض اللي مش عارفه في المحاضرة واربط المرض ده بالمحاضرة بحيث لما أرجع تاني أقرأ المحاضرة وأضغط على الOsteomalasia مثلاً هيجيلي نوت كاملة لوحدها بتشرح المرض ده بالتفصيل.

الطريقة دي مش بس بتخليني أفهم المحاضرة أكتر وأكتر لكنها بتترك ليا مساحة كبيرة جداً علشان أتكلم عن كل مرض لوحده واتفصل في كل حاجة بشكل كبير.

Offline

هنا بقى يجي الحاجة اللي فصلت بين البرنامج ده وبرنامج نوشن اللي إتكلمت عليه قبل كده ، نوشن كان بيتعمل في سيرفرات والسيرفرات أونلاين فكان لازم أتصل بالنت علشان أشتغل عليه ، هنا بقى في أوبسيديان مش محتاج ده خالص ، انا بلاقي نفسي بكتب وبخطط وكل حاجة من غير ما أفتح النت خالص ،صدقني حاجة يمكن متلاقيهاش قوية لكنها منقذة وشئ كان لازم نوشن تكون موجودة فيه !

Graph view

الخاصية دي مرتبطة بشكل كبير بالlinking وحاجة مش اللي هي قوية أوي لكن لازم أذكرها ، الحاجة دي بتجبلك شكل جراف عن كل النوتز وكل إرتباطها ببعض على شكل خطوط ودواير ، في الأول لما تشتغل على أوبسديان مش هتلاقي شكل من الأصل لكن لما تتعامل أكتر في البرنامج هتلاقي أن فيه دواير وخطوط وبتتشابك ببعضها بشكل رائع ويخليك حاسس بتطورك في الشغل وهنا الصور اللي واخدها حالياً من اوبسيديان

دول المكانين اللي شغال فيهم حالياً ، مكان براجع فيه المحاضرات والأمراض بشكل عام ومكان تاني مختص بالملاحظات بتاعت الكتب اللي بقرأها والكورسات والفيديوهات وغيره ، هتلاحظ هنا أن فيه دواير كبيرة وخطوط كتيرة جداً متشابكة ببعضها ده يوضحلك قد أيه المواضيع متشابكة في بعض الأحيان وهيسهل عليك جداً إنك تدور على المعلومة !

 مساوء البرنامج

البرنامج مش كامل المواصفات وأكيد لكتير من الناس ممكن يلاقوا مشكلة في الإستخدام وهنا انا بالفعل لقيت مشاكل قد تكون عند البعض صعبة

•  أولاً وهو إن البرنامج صعب جداً إنك تفهمه من الأول .... البرنامج يعتمد على لغة الmarkdown وهو إنك أنت اللي بتعمل الحاجة اللي أنت عايزها بمجرد معرفة الكود الخاص بيها ،دي مشكلة للي محمل البرنامج جديد لأنه مش هيفهم هيعمل أيه بالضبط ، أقترح لو أنت جديد على برنامج اوبسيديان شوف أي حد يشرح البرنامج بالتفصيل وبعدين إستخدمه
• المشكلة التانية هي إنك بتستخدم البرنامج وكل حاجاتك في جهاز واحد بس ودي ممكن تكون مشكلة لواحد عايز يكون حسابه في أكتر من جهاز ، لأن البرنامج أوفلاين فالبرنامج وكل معلوماتك بتيجي على مكان واحد بس وهو الجهاز بتاعك ، فلو مثلاً نزلته على اللاب المحتويات بتاعت اللاب مش هتيجي على اي جهاز تاني من أجهزتك
  

إستخدام البرنامج في حياتي اليومية

تعالى بقى اقولك على أنا بستخدم البرنامج إزاي من الأساس، أنا كلمتك قبل كده عن graph view وقدرة الربط وغيره لكن أنك تطبق كل المعلومات دي في البرنامج شئ مش سهل ، لكن انا هقولك على الطريقة اللي بحب أستخدم بيها البرنامج دايماً ، طريقة الدماغ التانية أو ال Second brain لما يتعلق الموضوع بالقراءة

القراءة وأوبسيديان

الحاجة اللي بعشقها في أوبسيديان هو إنك عندك إختيارات كتير جداً وسهولة كبيرة في الإستخدام فانا مثلاً لما أحب أتعامل مع القراءة قررت في يوم إني أربط قراءتي اليومية ببرنامج أوبسيديان وهشوف انا هعمل أيه ، من شوية كنت بقرأ كتاب "مع النبي" للكاتب أدهم الشرقاوي والكتاب بيتكلم عن حاجات كتير جداً ونصايح من ذهب وأنا كنت عايز أكتب الملاحظات دي في مكان بس مكنتش عارف أكتبها فين فلاقيت برنامج أوبسيديان ممكن يساعدني ، فلما بقرأ وألاقي حاجة حابب أتكلم عنها بالتفصيل بعملها سكرين شوت وألصقها في أوبسيديان وأعمل مكان تاني أكتب فيه كل اللي أستفدت منه من البرنامج ، تقدر تشوف الموضوع ده من خلال السكرين شوت اللي هعملها هنا

وبعد كل ده بربط كل النوتز اللي أخدتها من الكتاب بمكان واحد بحيث لما أحب أتكلم عن الكتاب مرة تانية أو أعمل منشن لحاجة أتكلم عنها الكتاب قبل كده يكون النوت اللي بتربط بكل موجودة ، حاجة خلت من القراءة حاجة تانية خالص لأني دلوقتي أنا بطلع اللي فهمته من الكتاب في مكان بحيث ميكنش كل اللي بستفاد منه طريق "Passive" أو مستقبل للمعلومة بس ممكن أنساها في أي وقت لأ انا حاطط المعلومات في مكان واحد وأقدر أرجعها في أي وقت أنا عايزه

المحاضرات وأوبسيديان

لما يتعلق الموضوع بالمحاضرات هلاقي إني بعمل حاجتين مهمية جداً أولاً هو إني بكتب المحاضرة بشكل كامل بالعربي عند أوبسيديان وثانياً إني بفتح المواضيع الجديدة اللي مفهمتهاش أو اللي حابب أتكلم عنها بعدين وأربطها بال TAGS وهفهمك يعني أيه tags دلوقتي!

مع الشغل الزيادة لقيت نفسي فيه أمراض كتير جداً مش عارف أوصلها كويس ، أمراض من مواد هنا وهناك ومفيش حاجة فعلاً تربط دول ببعض بحيث لما أدور عليهم تاني ألاقيهم ، هنا جت مهمة ال TAGS وهي إني أربط الأمراض بالمصطلح المسبب ليه فأعمل نوتز فاضية وأكتب عليها أسم عام فمثلاً "Muscle" أو "Nerve" ولما يجي أي مرض يتعلق بأي إسم من الأسماء دي أربطها ببعضها فمثلاً هديلك كام سكرين عن عن الفكرة

دلوقتي أي مرض بيقابلني ويكون ليه علاقة بالأعصاب أو العضلات أو غيره فأنا بربطها بمكان أساسي أنا عارف إني لو رحت عليه هلاقي المرض بسهولة!

الختام

هنا بقى تكون النهاية وهبعتلك بعض اللينكات لو حابب تبدأ في الرحلة 

رابط البرنامج

Obsidian

ناس لقيتهم كويسين في شرح البرنامج

دورة تعلم أوبسيديان - YouTube

لو عجبك المقال متنساش تشترك علشان يوصلك كل جديد!