قررت أبتعد عن السوشيال ميديا لمدة شهر!

عزيزي القارئ !!! وحشتني صراحةً تخيل كده يومين جمعة مسلمش عليك وأقولك أيه الأحوال والأخبار 😢 للأسف كنت في الميدترم فمسنحتش الفرصة إني أتكلم عن موضوع جديد أو حاجة جديدة لكن دلوقتي بما إني خلصت الميد ترم فأنا راجع وبقوة في الكتابة مرة تانية كل يوم جمعة بأفكار جديدة وأعمال أحسن إن شاء الله !

لكن أنا جاي بخبر مش لطيف ، خبر انا بعتبره كويس وفي نفس الوقت ممكن يكون ليه عقوبات بعدين ألا وهو إني همسح مواقع السوشيال ميديا بالنسبالي بشكل جزئي لمدة شهر مع إني همسح حساب الإنستجرام بتاعي بشكل كامل و هتكلم عن ليه قررت كده بالتفصيل مع حاجات زيادة كده للي أقتنع بالمقالة و حابب إنه يجرب نفس الحركة

ليه قررت أمسح السوشيال ميديا؟

أولاً ده كان قرار في بالي طوال الوقت وملازمني طوال أشهر عديدة ومكنتش فعلاً أقدر آخد قرار لحد ما في يوم قررت أشوف فعلاً لو حد كان معاياً في نفس الفكرة ولا لا ، هل فعلاً السوشيال ميديا ليها أضرار تخلي الشخص يمسحها ويتخلص منها ، يدوب بمجرد ما بحثت عن الموضوع لقيت ما يقارب ال100 مقالة وعناوين وناس كتير بتتكلم عن السوشيال ميديا وليه هي لازم تتمسح بشكل كامل! قعدت اقرأ شوية شوية وأشوف أوجه النظر اللي عند الناس ، ولقيت حاجات مكنتش متخيل إنها موجودة فعلاً !

في المقالة دي هتكلم معاكم عن المشاكل العامة اللي ممكن تلاقيها في السوشيال ميديا مع المشاكل اللي كانت بتواجهني أنا شخصياً في التعامل مع السوشيال ميديا 

مشاكل السوشيال ميديا

فيه شخص كان بيتكلم بالتفصيل عن السوشيال ميديا وأضرارها ، الشخص اللي كان يتكلم في الفيديو إنه منزلش السوشيال ميديا بقاله 5 سنين ! ده شئ كان بالنسبالي حاجة غريبة ومع أني كنت بشوف إنك محتاج تعرف الجديد وتشوف اللي تعرفهم في السوشيال ميديا إلا إن ده تغير بعد ما لقيت الفيديو ده وبالفعل شفت أن الراجل ده معاه حق في أغلب الحاجت اللي أتكلم عنها

من مساوئ إستخدام السوشيال ميديا هي:

• من أهم الأسباب هي الMental health وده بسبب إن التطبيقات دي مصممة إنك تقعد عليها الفترة دي كلها ، ده بيخليك أولاً تضيع وقتك في شئ مش مهم وثانياً إنت بتتعب نفسك بشكل كبير لما تلاقي اللي هما أحسن وأفضل منك بينزلوا صورهم وحياتهم واللي هي بالمناسبة بتكون (highlight) بمعنى إنك بس بتشوف الحلو فقط وبتحسب إن حياتهم كلها كده! ... بعيداً عن كده أكيد يا عزيزي القارئ لقيت ما لا يقل عن 100 مقالة و فيديو وناس كتير بتقولك إن السوشيال ميديا إدمان ومن الصعب تبعد عنه فتخيل مع كل السلبيات دي هل هتقدر فعلاً تكمل في السوشيال ميديا بوجود كل المشاكل اللي بتحصل دي؟ بالنسبالي لا ! فكان لازم أتخذ إجراء بالتغيير
• حاجة تانية مهمة وهي "الخصوصية" وده شئ لا غنى عنه وللأسف مش بيتم إتخاذه بشكل كبير لما بنستخدم السوشيال ميديا ، لكن لو إتكلمنا عن الحقائق هنقول إن السوشيال ميديا تعرف عنا حاجات أكثر من العادي ، لانك بمجرد ما بتستخدم البرنامج هو بياخد الصلاحيات انه يتعامل في كل حاجة بشكل حرفي ، تيجي قدام ناس وأتوقع إنك يا عزيزي القارئ هتفهم الموضوع ده فيه ناس بتقولك "أنا يدوب بس أتكلمت مع حد إني عايز أشتري لابتوب ولقيت إعلانات كتير عن أسعار اللابتوبات!" في الحقيقة ده شئ وارد جداً بالنسبة للسوشيال ميديا ، بعيداً عن التنصت أو الstalking فكرة وجود السوشيال ميديا وعدم وجود الخصوصية فيها شئ صعب ولو فهمت قد أيه البرامج دي تعرف عننا مش هتصدق
  
•  حاجة تانية وأظن إن فيه ناس كتير هتفقوا معايا فيها وهي "الشهرة" ودي فكرتها ببساطة إنك بتشوف الناس واللايكات وكل الحاجات الجميلة دي وبتقول في نفسك أنا عايز أبقى شبه ده أو ده أو ده وبيكون في خيالك إن الناس دي عايشة حياتها لكنها في الواقع حياتها ليها مساوئها ويمكن أسوأ من حياتك
  
• من المهم برده إنك تعرف إن كل حاجة أنت بتصورها أو بتبعتها او كل اللي فعلاً بتعمله في البرامج او المواقع دي مش معاك لكنه متخزن في السيرفرات بتاعتهم ده يخلي التحكم في حاجاتك بالنسبالك شئ معدوم مش من الصعب إن حد يخترق حساباتك في يعرف كل حاجة عنك 
  
•  حاجة يمكن الكل بيعتقد إنها موجودة في السوشيال ميديا هي فكرة إن السوشيال ميديا بتقربك للكل وكل حاجة لكن فيه فرق بين التجمع اللي في الموبايل والتجمع الحقيقي وإن مهما قعدت على السوشيال ميديا لساعات وساعات مش هتلاقي أحسن من وجودك مع صحابك أو أهلك على أرض الواقع
  

Why You Should Delete Social Media: Say Hello to A Better Life! - YouTube

مشاكلي الخاصة

انا فعلاً بتعرض للمشاكل العامة دي بشكل غريب ووقتي بيضيع في الموضوع ده بشكل كامل ، لكن فيه مشاكل خاصة أنا لقيت إني بعملها بدون أي وعي مني وبتسببلي دايماً إني بستغرب من نفسي أحياناً وأنا بعملها وهي كالآتي :

• أولا وهو السعي وراء الأهتمام أو ما يُسمى بالattention seeker ودي لقيتها بشكل عام لما لقيت زمايلي في الكلية وصحابي كانوا بياخدوا شهادات و إنجازات على حاجات تبع العلاج الطبيعي وانا كان بيكون عندي شعور الأهتمام اللي هو أنا عايز أعمل حاجة زي كده برده ، لكن اللي فعلاً لقيته في نفسي إني بس كنت بجري وراء الإهتمام اللي بتلاقيه لما تعمل إنجاز معين لحاجة معينة كبيرة ، شئ تمنيت إنها متكنش عندي لكنها فعلاً كانت عندي بسبب السوشيال ميديا
• ثانياً وده مش سبب كبير لكنه موجود برده وهو كثرة الإعلانات اللي موجودة في المواقع دي (خصوصاً إنستجرام) لأن فعلاً بتضايق بشكل غريب ، انا في اليوم الواحد بيطلعلي أكتر من 30 إعلان مختلف وفي وقت كبير ، صحيح مش سبب ممكن الناس تتفق عليه بشكل كامل لكنه كان من اسبابي في إني أمسح البرنامج
• ثالثاً وهو الأهم وهو تضييع الوقت في السوشيال ميديا لأكتر من 7 ساعات في اليوم !، ده شئ صعب جداً إني أٌكمل عليه لأنه كان بيعطلني عن المذاكرة والأولويات في يومي 

دي من المشاكل اللي فعلاً كانت بتاخد من يومي الكتير وكنت حابب أتكلم عنها هنا فلو فعلاً كنت عاملها وحابب تشارك تجربتك معايا ممكن تكلمني من على الموقع!

Adham's website