الفلاش كارد!

أيه هو الفلاش كارد؟

الفلاش كارد هي طريقة مذاكرة مشهورة جداً تتم عن طريق الورق، الورقة بيكون ليها وجهين مختلفين ، أول وجه بيكون فيه السؤال والوجه المقابل بيكون فيه الإجابة ، طريقة بسيطة كأنك بتسأل نفسك ومفهاش أي تعقيدات ،التعقيد الفعلي هي إزاي تكتب الأسئلة ومدى صعوبة الأسئلة

فلو قلنا مثلاً أنك كتبت سؤال عن إيه العصب اللي بيغذي عضلات الفك ، وقتها أنت بتقعد تفكر وتفكر لحد لما تيجي إجابة في دماغك ،و لما تلاقي فعلاً تقلب الورقة وبتشوف هل اللي كنت بتفكر فيه فعلاً صح ولا غلط ،الطريقة دي مش بس بتساعدك على إسترجاع المعلومات بشكل أسرع لكنها بتكون مرجع كامل ليك بحيث لما تروح آخر السنة هيكون مرجع أسئلة يتخطي ال100 أو ال200 سؤال

أنواع الفلاش كارد

الفلاش كارد في الوقت الحالي بيتقسم لنوعين لا غير

ورقي

وهنا بتتعامل مع الورق في كل حاجة ، بتقطع الورق على شكل مربعات وتكتب بنفسك السؤال والإجابة ، الموضوع انا شايفه متعب لأنك أنت اللي بتكتب بنفسك ، لكن الجانب المشرق أنه

• بيخليك تحفظ أسرع لأنك أنت بتكتب بإيدك كل حاجة
• بيخلي عندك قدرة على خلق أسئلة أكثر صعوبة للحفظ بطريقة أحسن
• لو إحتفظت بالأسئلة فتقدر تشارك بيها غيرك ويستفاد

إلكتروني

ودي الطريقة اللي أنا شخصياً بفضلها ، بتحمل برنامج وهو بنفسه يعملك نظام فلاش كارد ، بتكتب من على اللاب او الموبايل الأسئلة والإجابة وهو بيحفظها عنده في السيرفر ، أنا تعاملت مع الإلكتروني لفترة طويلة تتعدي السنتين حتى الآن ومزاياها كتير جداً وهما

• أولاً البرنامج بيقدر يخزن أكتر من 500 سؤال
• ليك القدرة أنك تحفظ الملفات حسب البرنامج اللي بتستخدمه وتعمل شير لعدد أكبر بكتير من الورقي
• تقدر تحط صور ولينكات وملاحظات كبيرة مش من السهل أنك تعملها في الوقي
• البرنامج يستحمل مواد كتير فحتى مش بس مواد الكلية عندك لا أنت تستخدمه لحاجات أقوي وأحسن زي تعلم اللغة وغيره

نيجي دلوقتي لحاجة أنا شخصياً بحبها وهي الربط بين الفلاش كارد ومصطلح مهم جداً أسمه المذاكر المتكررة أو بالإنجليزي

The space repetition 

الفلاش كارد والمذاكرة المتكررة

المذاكرة المتكررة هو مصطلح بسيط وسهل لفكرة المراجعة ، الفكرة أن هو عبارة عن المسافات بين أنت أمتى بتنسى حاجة معينه ، في كتير من حياتنا لما تيجي تشوف حاجة لأول مرة وتفهمها بيجي يوم وتلاقي نفسك نسيتها ، المصطلح بقى وأستخدامه يعتمد بشكل كامل عن أنك إزاي متنساش اللي ذاكرته وده بيعتمد على عدد مراجعات في أوقات معينة ومضبوطة

اللطيف والعظيم في الموضوع ان برامج الفلاش كارد بتبقي مسستمة نفسها على الموضوع ده فلما تخلص من موضوع معين هتلاقي البرنامج عامل خطة مراجعة بحيث بعديها بيوم او تلات ايام ترجع تلاقي نفس الأسئلة مرة تانية

برامج الفلاش كارد

برامج الفلاش كارد كتيرة جداً ومش عايز اغطي كله لأن الفكرة واحدة وأنت بس هتحتاج اللي يغطي يومك مش أكتر وهما يا عزيزي القارئ يتلخصوا في برنامجين

ANKI

برنامج أنكي أعتبره الأساسي لشغلي لما يتعلق الموضوع بالفلاش كارد ، برنامج مفيش أسهل منه في التعامل ومش صعب أنك تتعلمه وحتى كمان تحترفه

Anki - powerful, intelligent flashcards

Quizlet

برنامج أو موقع كويزلت هو البرنامج المقابل لو أنت مفهمتش أنكي ، موقع سهل وأحسن حاجة أنك تقدر تشوف أعمال ناس تانية لو أنت مثلا شغال في كورس معين تلاقي ناس عاملة للكورس ده و تتعامل مع الأساس ده

إزاي تستغل الموضوع في الكلية

نيجي للسؤال الأهم أنا ازاي أقدر أستغل الموضوع في الكلية ، أنت دلوقتي فهمت الفكرة ولما تتعامل مع البرنامج هتفهم أكتر ازاي تعمل الفلاش كارد ، دلوقتي بقى هيكون فيه مثال حى عن إزاي اقدر فعلاً اعمل حاجة زي دي في الكلية

هندي مثال عن محاضرة الأناتومي كأسهل حاجة تقدر تطلع منها أسئلة فلو قلنا مثلا أن أحنا هنعمل أسئلة من السلايد دي هتكون إزاي

من الصورة دي بس نقدر نطلع منها أكتر من 5 أسئلة فمثلاً

• The position of the heart lies inside ....... and ......?
• Divisions of the inferior mediastinum?
• The middle mediastinum lies opposite the first 3 thoracic vertebrae? (T or f)
• Describe the position of the heart?(open question)
• Inferior mediastinum starts with T....?

ده بس اللي قدرت أعمله في اول سلايد فتخيل بقى لما تعدي على المحاضرة كاملة ، الغرض من ده هو أنك لما تيجي لمنطقة المراجعة متكنش ناسي اي حاجة خالص وتكون كل صغيرة وكبيرة عارفها.

لو حابب تعرف أكتر عن علاج طبيعي فممكن تشترك بالأيميل بتاعك وهيجيلك أشعار كل يوم جمعة عن نصايح وأعمال تخص كلية العلاج الطبيعي

عن علاج طبيعي | هدهد