حساب العمل

تمام أحنا لو قعدنا هنا نتكلم عن محاسن السوشيال ميديا معتقدتش أننا هنلاقي حسنات تتعد على الأصابع ، الأغلب يتفق الآن أن السوشيال ميديا شئ سلبي في حياة الكتير من الناس بسبب سلب الوقت في شئ غير مفيد نهائياً ، لكن أيه اللي هيحصل لو قلتلك أن الشئ اللي ممكن يكون بالنسبالك وحش تقدر تحوله لحاجة تفتخر بيها بعدين وأداة تجعلك أعلى من غيرك سواء في الشغل أو معرفة الناس بيك ... النهاردة هتكلم عن ليه أنا شايف أن السوشيال ميديا أداة لنجاحك في المستقبل.

فكرة حساب الشغل

حساب الشغل هو حساب تاني أنت بتديره غير حساباتك الشخصية في مواقع التواصل بتنشر فيها محتوى حسب مجال شغلك أو مجال دراستك ، فلو قلنا أنك طالب في كلية علاج طبيعي فأنت تعمل حساب بجانب حسابك الشخصي يختص بمعلومات عن علاج طبيعي أو تسجيل لرحلتك وتدوين أيه اللي قدرت تتعلمه والنصايح اللي تقدمها للناس بعدين (اللي أنا بعمله🙃) ، ده منه أنك تتعلم ومنه أنك بتنشر العلم بتاعك للكل بعيداً عن فكرة الشهرة أو المعرفة

فكرة حساب الشغل دايماً كانت بتخطر في بالي طول الوقت وكنت دايماً بقول لنفسي لو قدرت ادون أيامي في الكلية لما كنت في أولى وفضلت في شغلي لحد دلوقتي كان ممكن أكون حاجة في المستقبل، لكن فيه اللي منعني من الموضوع أولاً هي المعلومات القليلة عن فكرة الحساب والتخوفات من الفشل مستقبلاً وثانياً هي قلة الخبرة اللي كنت فيها في أولى وتانية واللي من الآخر هتخلي المحتوى بدون جدوى

تمر السنين وأحاول أعمل شئ فعلي يُسجل تقدمي في الكلية ، مرت تلات سنين وقلت لنفسي أكيد ده الوقت اللي أقدر أنشر فيه حاجة عن علاج طبيعي أقدر أفيد بيها نفسي وأفيد الكل، عملت حساب في الأنستجرام وفشلت ، حساب في الفيس وفشلت والآن حساب في تويتر ومكان للنشر في ريفيو ومش عارف هل أقدر أكمل ولا لا🤣، لكن اللي أقدر أقوله أن دلوقتي هو وقت كويس جداً لأني فهمت أنا محتاج أعمل أيه وأقدم أيه بالضبط وهنا أقدر أقول إن دي هي الخلاصة الكاملة للموضوع.

ليه تعمل حساب من الأساس؟

فكر فيها أنت ليه فعلاً محتاج تعمل حساب؟ ، هو أنت فعلاً عندك قيمة شايف أن مش كتير عنده القيمة دي؟ ، الحل أن الشخص اللي بتقدم ليه المحتوى ضغط على حسابك علشان شئ معين ، شئ قدر يربط بينك وبينه اللي يخليه يتابعك من الأساس ، لو جينا بالمثال عليا أي طالب همن مصلحته انه يلاقي محتوى يساعده في دراسته ومجال عمله ، كذلك اصحاب المهن اللي بيتابعوا الناس اللي بتقدم محتوى ممكن يفيدهم ، انت هنا يا عزيزي القارئ لك القدرة على أنك تعمل أي حاجة في أي وقت لأن أكيد فيه ناس شبهك في الموضوع ده.

فكرة أنك تعمل حساب هو شئ مش بس هيخليك كويس مستقبلاً لكن إستمرارك عليه هيخلي أن فيه ناس تعرفك وتتعرف على الرحلة اللي خضتها أياً كان المحتوى اللي بتقدمه ، لو بتقدم عن الطب أو العلاج الطبيعي أو الصيدلة أو أي كلية هيعرفك كل شخص في الكلية أو تخرج منها لأنك بتنشر شئ هيفيدهم بعدين

تجربتي مع حساب الشغل

الآن أنا بكتب منشورات كل يوم جمعة عن طريق مكان للنشر بأسم ريفيو ، أشتغلت قبل كده في الأنستجرام لكن أدركت مدى صعوبة الموضوع وخصوصاً أني بوفق الوقت بين الكلية وبين المحتوى ، لكن الآن أصبح الموضوع أسهل شوية ، هو أه انا بكتب كتير لكني بحطه في وضع النشر المجدول فالمفروض أنه يظهرلك بعد شهر ولا حاجة فأنا بكتب في يوم واحد محتوى شهر بحاله ، شئ هيعمل مجهود في الأول لكنه مريح في الآخر.

الفكرة أنك تبدأ بالشئ اللي شايفه كويس والمحتوى اللي حاسس أنه هيفرق مع الناس اللي بتحاول توجه الكلام ليهم لأن ده شئ هيكون رائع في المستقبل

أيه المنصة اللي أبدأ بيها

حلو شكلك حبيت الفكرة لكن محتار تبدأ فين وأمتى ، الحقيقة أن السؤال مش المنصة نفسها لكن نوعها اللي هيكون مهم ، المنصات اللي تقدر تقدم فيها شئ فعلي يتقسم لأكتر من نوع

تصميم الصور ونشرها

تصميم الصور ونشرها يتفنن فيه الأنستجرام والتويتر بشكل غريب ، وده لقدرتهم على نشر المحتوى البصري سواء كصور أو فيديوهات لكن على الأغلب بيكون صور

الفيديوهات

الفيديوهات دايماً بتكون عن طريق اليوتيوب وقد أيه هو مهم في طرح الفيديوهات بشكل مهم ، الفكرة هنا أنك لو عايز تبدأ وبكون المحتوى ظاهر بشكل مقبول محتاج تصوير وميكروفون كويس وسكربت وحاجات تانية كتير محتاج تضبطها علشان تعمل فيديو حلو

المحتوى الكتابي

المحتوى اللي دايماً يعتمد على الكتابة الفعلية بينقسم نوعين ، نوع لو أنت هتكتب كتير فتحتاج لمدونة أو نشرة زي اللي انت بتقرأ فيها دلوقتي ومحتوى تاني لو أنت بتتكلم عن حاجات خفيفة فالفيسبوك أفضلك في الموضوع ده ،لكني بفضل النشرة أكتر لأنها متخصصة في المجال ده وفيه فيديو عظيم ليوتيوبر كان بيتكلم عن إزاي حاجة زي النشرة ممكن تكون بداية عظيمة لمحتواك

Why everyone should start an email newsletter - YouTube

مثال ناجح

وحتى نبدأ خلينا نشوف اللي فعلاً جرب يعمل الحركة دي ونفعت معاه بشكل كبير ، هتكلم أكتر عن صُناع المحتوى في المجال الطبي والعلاج الطبيعي بحيث تكون الفكرة وصلتلك بشكل أحسن

يزن الغماس

يزن من أحسن الناس اللي بدأت في موضوع الطب ، عمل حساب على تويتر وقرر يعمل فيه رسم للتشريح ومواضيع تخص الطب، قال بنفسه أنه مكنش يتوقع الإعجاب الرهيب اللي حصل ليه ومع إعجاب الناس بطريقة رسمه فيه بعض الجامعات اللي إستأذنت منه تأخذ الرسومات في المحاضرات بتاعته ، يزن من أحسن الأمثلة اللي تمثل النجاح في السوشيال ميديا

حساب يزن الغماس على تويتر

النهاية

لو رجعنا لأول سؤال وهو إيه فوائد السوشيال ميديا هقول أن ليه فائدة واحدة جوهرية عن باقي العيوب اللي فيه واللي هو أنه خلق مساحة لكل شخص ينشر اللي هو عايزه في أي وقت وممكن أي حد يقدر يشوفه براحته تماماً ، فأستغل المساحة وأحكي رحلتك وعزز مجالك لأن ممكن تكون السوشيال ميديا أداة قوية ليك