أنتي مو لوحدك أبدا !

اهلا وسهلا ، 

مرحبا مليون يا الأخت الكبيرة ، احس لازم نرحب في كل وحدة فيكم ترحيبة حارة مرة وقوية.. 

مقدمة عارضية : وصلنا 123 مشتركة بوقت ارسال هذه النشرة ! 😱واو صدق ماتخيلنا ابدا ، كنا نقول نبغى يكون على الاقل عندنا 50 بنت مشتركة علشان نرسل النشرة الاولى بس وصلنا اكثر بحمدالله.. ف مرحبا واهلا وسهلا وحياك الله. 🥳

وهيا نبدأ بسم الله 

أنتي مو لوحدك 

 ما تتخيلون حجم المسؤولية اللي حسينا فيها تجاه كل وحدة فيكم وكيف يفترض اننا نساعدكم انا -سارة- ومنيرة. 

الاخوات الكبار بالغالب يتشاركون نفس القصة ويمرون بكثير اشياء متشابهه وكثير منكم في التعليقات كان كاتب نفس الشي وهذا يقولك انك مو لوحدك ابدا.. كثير بنات زيك ، كثير قبلك وبعدك بيمرون بنفس اللي عشتيه. 

^^^ اقتباسات من تعليقات على فيديوهاتنا في تيك توك ، جزء بسيط مرة من اللي كل الاخوات الكبار يجربونه.. وهذا يعني انك مو لوحدك ، مو لوحدك بالمعاناة ، والاهم انك مو لوحدك برضو في الايام الحلوة. 

                          ____________________________________________

الاخت الكبيرة حكايتها حكاية ، مواقف كثير وتجارب كثير وتعلم كثير ، ايام سوداء وايام بيضاء وايام زي الفل والعسل، مواضيع كثيييير مرة حلوه بنقدر نسولف فيها ، الاخت الكبيرة لها ادوار مو لأحد ثانية و بأولى سنوات حياتك بتكونين مو واعية كثير لدورك وكيف تخلينه مريح ومفيد ومعين لك 🤍

في الاوقات الصعبة مررة واللي تحتاجين فيها مساعدة يمكن تحسين انك لحالك لان مافي احد يفهمك ويعرف يدلك ويساعدك بالشكل الصحيح ، وقت اتخاذ القرارات الصعبة ، وقت المشاكل ، وقت الضياع ، وقت التشتت ، هذه كلها ايام صعبة ومو سهلة لو كنتي لوحدك.. 

طيب كيف ما اكون لوحدي يعني؟  اصلا ماحولي احد 

تركيزنا الاول في هذه النشرة هو عليك كأخت كبيرة وعلى اخواتك من حولك.. 

لو كان عندك اخوات ، فأنتي مو لوحدك ، اخواتك من حولك افضل داعم ومعين لك بكل خطوة بحياتك.. يمكن للحين ما عرفتوا كيف تكونون افضل اخوات لبعض ، وهذا عادي ويحصل لكثير مننا. 

* لو انتي الاخت الوحيدة ، فنحنا هنا اخواتك واكيد اكيد بنساعدك.. * ✨

اختك اللي اصغر منك افضل وحدة ممكن تعينك بأيامك الصعبة ( متضايقة ، زعلانة ، فيك غلقة ، متنكدة ، معصبة ، منهارة ) وانتي تكونين لها معين برضو بهذه الاوقات ، تطوير علاقتك بأختك رحلة لها بداية ونهايتها سعيدة دايما يوم تكونون وصلتوا لارتباط اخوي قوي وعميق 🤍🤍

طيب انا علاقتي بأختي مو كويسه واحسها بعيدة عني؟ .. ما اقدر اتكلم معاها بأريحية عن كل شي او احكيها ايش يصير معاي.. 

اتفهم جدا كيف الموضوع صعب بالبداية وكأن بينكم ألف جدار. افهم مره كيف ودك تكون علاقتك فيها زي علاقة الاخوات اللي نشوفهم كيف قريبين من بعض. بس هذا الشي مو مستحيل والله ، ومو معقد ابدا ، بس يبغاله جهد ومجاهدة للنفس بس كل وحدة فينا تقدر 🙏🏽 

انك تكونين لوحدك احيانا هو اختيارك ، وتقدرين تغيرين هذا الاختيار للشي اللي تتمنينه ، بأنك ما تكونين لوحدك. 

محد يتكلم ابدا عن قد ايش هو مهم بناء علاقتك بأخواتك ! و مفترضين انه كل الاخوات اصلا علاقتهم حلوه وكويسه وقوية. بس لا يا جماعة الاوضاع مختلفة في كل بيت وكل بيئة ! 

ف خلينا من كلام الناس و خلينا نقولك من تجربة انه استثمارك ببناء علاقتك بأخواتك اللي اصغر منك مهم مررة ومفيد ويستحق كل شي ، لان النتيجة والله بتكون عندك بالدنيا كلها من حلاوتها..  

 الأخت الكبيرة بيدها تسوي تغيير مو احد ثاني يقدر يسويه بينها وبين اخواتها يعني شي زي القوة الخارقة يمكن بس لانها اخت كبيرة!

علاقة الاخوات شي مميز مرة وحلو ، هذول ناس معاك كل يوووم وممكن انتي تخلقين وتصنعين ايام حلوة ما تنعاش مع غيرهم ، بتمرين بصعاب محد يدعمك فيها زيهم ويوقف جنبك ويعينك ويقويك زيهم ! 

علاقة الاخوات شي زي السحر 

خلينا نقول انه علاقتك بأخواتك بتكون مليانة حب، مو اي حب عادي تعرفينه او تتوقعين انك تعرفينه ، حب من نوع خاص وحلو ويقوي الانسان ، الاخوات سند وقوة ودعم نفسي وجسدي وعاطفي ، الاخوات وذكرياتك معاهم وضحكاتكم كلها اشياء مميزة ما تحصلينها عند احد ثاني. 

لو عندك اخت اصغر منك ( عمرها مو أقل من 10 سنين ) ومو قريبين من بعض انتي وياها  وتحسين بينكم حواجز ، هنا انا اقولك انتي تقدرين تختارين ما تكونين لوحدك وتغيرين هذا الشي وتقربين منها وتقربينها منك.. بتقولين طيب كيف مرة صعب ما اقدر احس مستحيل تتقبل ! اممم لا لا لا ، من تجربة احب اقولك انه لا ، لو بقيتي تقولين لا ما راح تتغير العلاقة ، بس اعطيها فرصة وجربي ، 

فكرة المستحيل هذه في بالك بس ، ويمكن هي في بالها برضو وكونك انتي الاخت الكبيرة ، انتي بيدك تغيرين هذا الشي .. 

طيب كيف ابدأ وش الخطوات الاولى ! 

اول خطوة هي انك تتخطين فكرة انه مستحيل علاقتك فيها تتغير ، يعني لو كنتي انتي واختك مو قريبين من بعض وبينكم حواجز نفسية مدتها ان شاء الله عشرين سنة ، يبقى انه فيه وقت وفيه فرصة للتغيير وفيه ايام جاية تعيشون فيها بحب وعلاقتكم افضل واريح. 

الخطوة الاولى : هي انك تغيرين فكرة ان مستحيل علاقتي بأختي تتغير وانها بتبقى زي ماهي للابد وتبدلينها بفكرة انه علاقتي بأختي ممكن تكون حلوه و احسن من وضعها الحالي وانك كأخت كبيرة تقدرين تسوين التغيير وتصنعين البيئة الكويسة هذه لك ولأخواتك. 

الخطوة الثانية : تجربين تتكلمين مع اختك ، وتصارحينها بهذه الفكرة ، ممكن تبدأ السالفة بـ " ما تحسين ان علاقتنا شوي غريبة ، يعني مو مرة قريبين من بعض وكذا ، واحس اني ما اعرف عنك كثير وانتي كمان نفس الشي.. " وتذكري هنا شي مهم ، لا تنتظرين منها ردة فعل او رد تتخيلينه في بالك ابدا ، خلي الوضع مفتوح واعتبري انك رميتي الفكرة هذه وبس ورحتي ، لا تنتظرين او تتوقعين شي ابدا ، حتى لو ردت عليك عادي كملي حياتك طبيعي.. 

الهدف من هذه الخطوة هو انك تخلينها تفكر بكلامك هذا ويبدأ يحفز عندها رغبة وافكار وتساؤولات ، وتصير منتبهه وعارفه زيك و كمان عندها رغبة بتطوير علاقتكم.. 

الخطوة الثالثة : بتكون بالنشرة الجاية ان شاء الله ياقلبي ، وبنفصل فيها اكثر شوي كيف تطورين علاقتك فيها بطرق واضحة وعملية << بموت احس اني استاذة. 

الخطوات سهلة وبسيطة ، فكري فيها وجربيها ولو احتجتي مساعدة لا تترددين تكلمينا هنا او انستقرام 🤍🤍🤍 

_____________________________

هذه نهاية النشرة ياحباني..  شلنا هم كثير كيف نكتب لكم اول موضوع وهذا كان اكثر موضوع حسينا انه مهم نبدأ فيه اول شي علشان ما يفوت وقت زيادة على مافات وما تكونين لوحدك لوقت اطول..

شاركينا افكارك بالرد على هذه الرسالة او على الانستقرام كمان. مره يهمنا نسمع منك 🤍

ونتمنى لك يوم سعيد وعلاقة افضل بأخواتك.