المجال ده فلوسه كويسة | ميكانيكي بني آدمين - العدد #16 |
| بواسطة Walid Taha • #العدد 16 • عرض في المتصفح |
|
مجال جامد قوي وفلوسه كويسه
|
|
|
|
|
"أنا بتعلم ××× بس زهقت وعايز مجال أحسن وسمعت أن مجال ××× أفضل"… |
|
لو دورت وراه هتكتشف أنه غير حوالي 5 مجالات في أخر سنة، ومكملش ولا واحد منهم ولا حقق أي حاجة.يعني بعد ما تقعد شهرين تلاتة فاحت نفسك في مجال، ومع أول بني آدم يقولك إلحق ده المجال ده فلوسه أحسن، تروح قالب التعب والجهد بتاعك وتروح تجري ورا الجزرة؟! |
|
بعدها بشهرين واحد تاني يقولك على مجال جديد فتسيب اللي في إيدك وتجري حافي والفوطة على وسطك وتبدأ من جديد، وأنت برضه محققتش حاجة في اللي قبله. |
|
|
أه ممكن المجال اللي جريت عليه وسيبت اللي تعبت فيه، يكون أحسن، بس برضه ما يمكن تحقق من اللي أنت بتعمله دلوقتي، نتيجة أكبر... |
|
أنت جربت بجد؟ وقد إيه؟ |
|
ويمكن يكون هو ده مجال عمرك، مش المجال الجديد اللي جريت عليه، هتعرف إزاي لو ماكملتش واتعلمت وجربت؟! |
|
طبيعي جدًا تمر بفترة في حياتك فيها لخبطة وتشتت، خصوصًا مع السوشيال ميديا والأزمة الاقتصادية، والمستغلين في كل مكان، واللي خلوك بتجري ورا أي حاجة جنبها "فلوس كويسة".... وعناوين زي "عملت مليون في يومين". |
|
بس ده مش معناه تعيش باقي عمرك كده! عارف أساسيات كل حاجة، بس مش شغال أي حاجة، والفهلوة هي اللي محركاك! |
|
|
مش معنى كده أنك تسيب نفسك لطوفان التشتت، وتتنقل من مجال لمجال كل أسبوعين، وتقول بستكشف. ولا أنك تسمح لحد يستغلك بأوهام الربح السريع، أو يلعب في دماغك ويسمعك الكلام اللي هيعجبك، عشان تعمله شير. |
|
التجربة مش معناها أنك تعمل حاجة half ass وتقول جربت. لكن أنك تجيب الأخر في التجربة... وتعيد ولما فعلا ماتشتغلش، يبقى وقتها تجرب مجال تاني. |
|
التنطيط زيادة عن اللزوم مش حل، ومفيش حاجة بتحصل تاني يوم، ومستحيل تكسب من مجال بدأت فيه النهاردة "قبل ٦ شهور على الأقل"… (على الأقل).سلسلة #فريلانسولوجي هتعلمك كتير، وكلام واقعي… مش بتاع مشاهدات وشير. |
سلسلة فريلانسولوجي
نصائح عملية للمستقلين
youtube.com
|
|
|
من كل سنين شغلي وحياتي في ٣ دول، مفيش إلا الاستمرارية وأنك تتعلم بطريقة صحيحة عشان تنفذ صح. |
|
اصبر... وكمل وإدي للي بتعمله فرصة! |
|
لو أشطر مصمم في التاريخ ومبتعرفش تسوق لنفسك أو تتواصل مع الناس أو تكتب إيميل احترافي، فمش هتجيب مليم. |
| *** |
|
كان فيه سؤال شوفته عن المجالات اللي ممكن تعمل منها مليون مبيعات.عايز أقول لكل واحد بيسأل السؤال ده، ممكن قوي تعمل ده من مجالك. |
|
فيه ناس عملوا مليون من بيع "قوالب نوشن"، متخيل؟! وأنت ممكن تكون بدأت مجال جامد قوي، بس زهقت ومش قادر تستمر وبتدلع أو سامح للي حواليك يتحكموا فيك بجملة "ده فيه فلوس كويسة". |
|
كمل واستمر وابتعد عن الفهلوة وفكر اخطف واجري! بطل تجري ورا الجزرة. اتعلم تسوق لنفسك ولشغلك، زي ما بتتعلم المجال نفسه. اتعلم المهارات اللي لازم تكون موجودة عندك بغض النظر عن مجالك، عشان هتساعدك.وبس! |
متنساش تشترك في النشرة وتعملها شير!Welsh... OVER & OUT |
ميكانيكي بني آدمين
نشرة ميكانيكي بني آدمين، نشرة أسبوعية بشارك فيها حصاد الأسبوع مع أفكار أو كتب أو موضوعات جديدة تنفعكوا وتساعد في تغيير نظرتكوا في حاجات كتير، وكمان عشان تبقى مرجع ليكوا في المستقبل. متنسوش تشتركوا وتعملوا شير عشان توصل لعدد أكبر. وليد طه ويلش
التعليقات