النشرة دي عشانك | ميكانيكي بني آدمين - العدد #13

أكيد بقالك كام يوم بتفكر هتعمل إيه؟

هتشتغل على إيه؟

هتبدأ إمتى؟

طيب هتبدأ في إيه؟

والأهم أنك بتسأل نفسك "هل الموضوع يستاهل أصلًا؟"، "هل أقدر أحقق حاجة؟"

وإجابتي أنت أكيد عارفها! أيوه تقدر وتقدر جدًا كمان.

عشان كده قولت أول نشرة من ميكانيكي بني آدمين في 2023، لازم تكون فيها مثال عملي للي ممكن تحققه.

فهحكيلك ملخص لـ14 سنة من التعلم الذاتي والبداية من الصفر، بعد سن الـ30.

دي قصتي باختصار... يمكن تديك حافز وأمل بتدور عليه، ويمكن تكون السبب في تشجيعك عشان تبدأ النهاردة مش بكرة.

عن العبد لله!

وليد طه، مصري مقيم في إنجلترا وقبلها كنت في دبي. مترجم وكاتب (إعلانات ومحتوى)، ومصور وليا شغل الناس بيقولوا عليه جامد، ومصمم على خفيف. في وقت كتابة السطور دي، شغلى الأساسي SEO Specialist، بجانب الحاجات اللي قولتها فوق، وطبعا قناة يويتوب والمحتوى اللي بنشره على تويتر والبودكاست.

التفاصيل اللي هتقراها، هدفها الوحيد تشجيعك، لأني بدأت بعد التلاتين، يعني من الأخر لو أنت في العشرينات وبتقول القطر فات فعيب عليك، ولو في التلاتين وأعلى...

فعايز أقولك طول ما أنت عايش عندك وقت.

إقرا ومش هتخسر.

🗓️2008: سافرت الإمارات بفيزا "بناء حجر" عشان أشتغل فرد أمن في مشروع في الصحرا. كان عندي ٣١ سنة ومعنديش أي مهارة تذكر.

🗓️2009: أخر السنة دي كنت بحضر نفسي عشان أدور على شغل تاني في مجال تاني، بعد ما قضيت نص ٢٠٠٨ وكل ٢٠٠٩ مذاكرة (اتعلمت إنجليزي وأوفيس وشوية فوتوشوب بنفسي) لغاية ما اشتغلت مع الـ HR، بس سيبت الشركة واشتغلت Sales في شركة معدات حفلات AV براتب تقريبا أعلى بـ 10 مرات.

🗓️2010: أثناء شغلي مع الـAV واللي مكملش سنة جالي عرض عشان أشتغل HR-CO بعقد ٩ شهور براتب أعلى، فسيبتهم وروحت، وأثناء العقد ده ولغاية أخر ٢٠١٠ كنت مهتم بالمحتوى قوي وبالسوشيال ميديا والتسويق الالكتروني، فذاكرتهم!

🗓️2011: اتجوزت ورجعت مبيعات تاني في شركة شقق فندقية لوقت قصير، وكنت مكمل مذاكرة ووقتها بدأت أشتغل في التصوير بس بشكل احترافي حر، يعني فريلانسر.

🗓️2012: نزلت مصر زيارة وكنت مقدم في شركة عندها "محرك بحث خاص بالسفر" في وظيفة SOCIAL MEDIA EXECUTIVE MENA بس عقد محدد سنة بس. وجالي إيميل وأنا في مصر وعملت مقابلة سكايب وقبلت، ورجعت استملت.

🗓️2014: أثناء شغلي معاهم اتعلقت بالكتابة والترجمة، وبعد ما سيبتهم بدأت أدون في كذا موقع منهم "هاف بوست" ولنفسي على فيسبوك، وكان حلمي أشتغل في حاجة زي دي، لكن للأسف الكورسات كانت بارقام خيالية ولمدة أسبوع مثلًا، يعني مش فايدة حقيقية. استمريت في شغل السوشيال ميديا "حُر" وسافرنا مانشستر عشان كنا هنستقبل أول مولود، وفي الوقت ده كنت عامل جروب اسمه "علم نفسك" عشان الناس يشيروا لينكات مفيدة، ويساعدوا غيرهم، ولقيت بوست حد مشيره عن منحة من جريدة الحياة السعودية تحت اسم "مدرسة الحياة" لتعليم الصحافة.

قدمت وكتبت القطعتين اللي طالبينهم، وبعد كام يوم وصلني إيميل عايزين يقابلوني، فشرحتلهم إني مسافر وراجع بعد شهر، وطبعا قولت كده الفرصة راحت😅 لكن لما رجعت وبعد شهر بالظبط وصلني إيميل تاني منهم عشان المقابلة🥳، وروحت قابلتهم، واتقبلت في منحة مدفوعة ٨ شهور مع إمكانية التوظيف بعد الانتهاء، ولكنهم شغلوني بعد ٦ شهور بس.🥇

🗓️2016: بعد شوية أزمات مالية في الجريدة، بدأت أدور على شغل تاني، وربنا وفقني بشغل مترجم ومحرر مع Edelman واحدة من أكبر الـ PR AGENCIES في العالم.

🗓️2017: أخذنا قرار أنا ومراتي أنها ترجع UK عشان تعليم بنتنا.

🗓️2020: انتقلت لـ TBWA، شركة تانية كبيرة في الـ PR & Advertising… لكن ولادي وعيلتي وحشوني (ربنا رزقني بولد تاني) ومكنتش شوفت إبني اللي لسه مولود سنة بحالها، فقررت الاستقرار معاهم.

🗓️2022: كانت مرحلة جديدة في حياتي تمامًا، لأني شغال 3 حاجات في وقت واحد (شغل أساسي، شغل حر، قناة يوتيوب)، والحمد لله مع نهايتها قدرت أحسن من قناتي والمحتوى اللي بعمله.

🗓️2023: سنة جديدة وبداية جديدة بأهداف جديدة، طبعًا مش هشاركها معاكوا... وأنت كمان متشاركش أهدافك مع حد، لكن اشغل نفسك بتحقيقها!

هتقولي"أما قصة بصحيح، عايز إيه بقى؟!" هقولك:

• لو شايف نفسك معندكش أي مهارة عشان تعمل حاجة في حياتك، فالتغيير في إيدك.
• لو شايف نفسك كبرت ومفيش وقت "فطول ما أنت عايش عندك وقت.
• متدخلش تنام إلا وأنت #أحسن_من_امبارح ولو بكلمة.
• اتعب دلوقتي عشان تتعب أكتر بعدين في مرحلة أعلى وأفضل.
• مفيش حاجة اسمها شغف، فيه حاجة اسمها "الحاجة" والاستمرارية.

اللي عايزك تبصله مش المرحلة الأخيرة دي، لكن البداية كانت فين، وإزاي المشوار مكانش سهل، وليه أنت عندك نقطة بداية أحسن مني بكتير، وممكن تحقق أكتر مني بكتير.

🗓️وأخيرًا خلي دول جزء من حياتك:

ليس من النبل في شيء أن تكون أعلى منزلة من غيرك، إنما النبل الحقيقي أن تكون أعلى منزلة مما كنت عليه من قبل.

-إرنست_هيمنغواي

⁃Start where you are. Use what you have. Do what you can.

بالتوفيق.

وليد طه

متنساش تشترك في النشرة وتوصلها لغيرك.

كل سنة وأنت طيب.