إمتى مينفعش تنام؟ | ميكانيكي بني آدمين - العدد #10

النوم مهم ونصحت كتير بأن لازم ساعات نومك متقلش عن ٧ ساعات.‏

بس فيه ظروف بتحكم وفيه مراحل لازم تتقيم لوحدها ويبقالها معاملة خاصة جدا، عشان تقدر تحقق حاجة! ‏زي مثلا أنك بتدرس أو شغال ومتجوز وعندك أولاد.لازم تفهم أن الفترات الانتقالية دايما صعبة ومحتاجة مجهود مضاعف.‏

لما أخدت قرار التغيير وأنا كنت ٣١ سنة، عيشت سنتين بنام فيهم ٤-٥ ساعات. بخلص شغل ١٢ ساعة وبذاكر ٣-٤ ساعات.

لما اتجوزت كنت في مرحلة جديدة وهي تعلم الديجيتال ماركتنج وبعدها منحة الصحافة.‏شغل + ٤ ساعات منحة، وده كان بياكل حوالي ١٥ ساعة من اليوم، فكنت برجع أقعد ساعتين معاهم في البيت وأذاكر ساعتين بعد ما يناموا، وانام ٤-٥ ساعات… لمدة ٦ شهور. لذلك عملوا معايا عقد الشغل بعد ٦ شهور بس وقبل انتهاء المنحة بشهرين، لأن كان المفروض أخلص ٨ شهور قبل ما يعملوا offer.‏

بعد فترة لما خلفنا كان لازم اشتغل بالليل ٦شهور، ومراتي بتشتغل الصبح.‏

فكنت بشوفها ساعة الصبح لما أرجع، وبنام ساعتين تكون بنتي صحيت، وأقعد أذاكر وباخد بالي من البنت لغاية ما مراتي ترجع من الشغل، وأنام ساعتين تاني وبعدين أخرج للشغل.

بعد كده الدنيا اتظبطت لما وضعي اتحسن وبقى مكاني في الجريدة أفضل (بسبب تعبي في الأول).‏

النوم مهم… بس أنت فين في حياتك بيتحكم في حاجات كتير.‏

هل الفترة دي كنت مستريح؟ قطعًا لأ.

هل كنت مستمتع بالرحلة والكلام ده؟ ولا لحظة واحدة كان فيها لا متعة ولا بتاع.

‏بس ده عامل زي ألم الجيم، لأنه بيساوي نمو، طالما مخطط صح وبتجرب وبتتعلم من فشلك.

إنسى الطاقة والشغف والتحفيز والاستمتاع بالرحلة والسعي لا يعني الوصول والكلام ده المشمشي ده.‏

الالتزام والاستمرارية أنك تعمل وأنت مش عايز تعمل!

خطط كويس وجرب وإمشي في الطريق الصح هتوصل... إمتى؟ مش عارف، لكن هتوصل عشان ماشي صح.‏

إلغي الملهيات.

خطط وقتك.

ضحي شويتين.

‏مش لازم أصحاب دلوقتي، مش هيحصلك حاجة من غيرهم متخافش!

وقت العيلة قصره سيكا، بس لازم تكون متواجد طبعا على قد ما تقدر. أنت بتعمل لمين؟!

وبعدين دي مرحلة وهتعدي وهتلاقي نفسك أفضل إن شاء الله لما الأوضاع تتحسن.

‏وقت العيلة مهم، بس من ألفين سنة، كانوا بيخرجوا ٦ شهور في رحلة تجارة ويرجعوا يحضروا للتانية، وبعدين لما تجارتهم بتكبر بيجيبوا غيرهم يسافر مكانهم.‏

حدد أولوياتك، ونظم حياتك على أساسها… تفلح.

‏يومك فُل