عن السفر والعيشة برة! | ميكانيكي بني آدمين - العدد #11

بواسطة Walid Taha #العدد 11 عرض في المتصفح
كلام لازم تعرفه لو بتفكر تسافر!

وليد طه - نشرة ميكانيكي بني آدمين

وليد طه - نشرة ميكانيكي بني آدمين

عن السفر والعيشة برة!

مبدئيًا لو سألت حد مسافر وخصوصًا اللي مهاجرين ومستقرين عن البلد اللي عايش فيها وقالك وحشة وبيطفوا سجاير تحت دراعاتنا، قوله إرجع وأنا أخد مكانك عشان بحب السجاير على الريق.

نحط دي على جنب بقى!

عايز تنجح بسرعة وتستقر؟

يبقى تروح وعندك لغة جيدة ومعاك مهارة أو إتنين كويس فيهم قوي. وبرضه مش هتروح تلاقي موكب في المطار، وبيشكروك عشان اختارت بلدهم، لكن هتتعب شوية وهتشتغل في حاجات أبعد ما يكون عن مجالك، لغاية ما تلاقي حاجة مناسبة، وده طبيعي جدًا.

خطة تعلم اللغة الإنجليزية

THE RIGHT WAY TO SAY - YouTube

سلسلة خاصة بتعلم اللغة الإنجليزية
youtube.com

وتوقع برضه شوية عنصرية من بعض الأفراد، وبعد إذنك متدبدبش في الأرض وتقول شوف شوف بيقول عنصرية أهو، أنت في بلدك بيعنصروا بحسب المحافظة والقرية والمركز واللهجة والدين وكل حاجة تقريبًا، فمتعملش نيلسون مانديلا، على الأقل القانون معمول عشان يعامل الكل زي بعضه بغض النظر هو مين ومنين، وتقدر ترفع قضية على أي بني آدم أو جهة خلقها ربنا عادي جدًا.

لو مسافر ومفيش لغة ولا مهارة، يبقى هتتعذب جامد وهتتعب، لكن لو عايز فعلا تتغير وتبقى حاجة وصادق مع نفسك وراجل، هيحصل… بس هياخد وقت. لأنك بتبني نفسك من الصفر ويمكن من تحت الصفر بشويتين.

ولو اختارت عيشة الفهلوة، فممكن تعيش، بس هتفضل طول عمرك عايش مع ناس في أوضة، بتاكل أي كلام، بتشتغل يوم وتقعد ١٠، مديون، مضغوط، وحاجات تانية كتير، يعني مفرقتش كتير قوي عن اللي أنت فيه.

يعني خيارين… يا تتعلم وتغير نفسك وتبني حياة، يا تختار الفهلوة وتعيش تحت الخط طول عمرك.

حاجات لازم تتعلمها مهما كان سنك/مجالك 

سرد على تويتر  
twitter.com

وأنت مسافر "لازم" يكون معاك مبلغ يمشيك ومتروحش وأنت على الحديدة تماما. الكلام ده كان زمان، لكن دلوقتي ومن الأفضل، تروح ومعاك فلوس.

بتزهق وبتمل، يبقى يا تتغير… يا تخليك مكانك، عشان مش هتنفع.

حساس زيادة عن اللزوم وعينيك بتحمر وشعرك بيتنكش من أي حاجة، يبقى يا تتغير يا تخليك عندك.

حقيقة وليد طه

حقيقة وليد طه

أنت جاي في مجتمع جديد، بقيم وأخلاق وثقافة، مختلفين تماما عن كل اللي اتربيت عليه، فتعايش وتأقلم، وحط في دماغك وأفهم أنك مش هتغير حاجة فيهم. محدش هيمنعك تمارس عبادتك ولا تلتزم بعاداتك اللي اتربيت عليها، لكن متفرضهاش على حد، ولا تحكم على حد، وده موضوع صعب على بعض الناس… معلش، ولو مش هتقدر خليك عندك برضه.

هتدفع ضرايب ورسوم تانية في بعض البلاد. وده طبيعي جدًا، بس هتاخد قدامهم "في غالبية البلاد" خدمات حقيقية، زي الصحة والنضافة وفي بعض الحالات سكن ومرتب شهري وتقاعد وغيره. فيه بلاد زي إنجلترا، بتغطي ١٠٠٪؜ صحة للمتقاعدين وبعض الحالات الخاصة، ده غير السكن والمرتب الشهري، ومبالغ استثنائية سنوية، في حالات زي البرد الشديد أو الكريسماس أو ارتفاع الأسعار.

هتسافر قانوني، هتستريح وهتتحرك بسرعة. هتسافر فهلوة هتتعب قوي ولو معرفتش تظبط وضعك وده "وارد جدا"، هتعيش زي الفهلوي اللي قولتلك عليه في الأول. لو هتتجوز عشان الجنسية بس ودافع فلوس، فخلي بالك أنكوا بنسبة ٩٠٪؜ هتتقفشوا.

لو قررت تتجوز من البلد اللي أنت فيها، فلازم تختار كويس قوي قوي قوي، ولو من الناس اللي مبيعروفش يتأقلموا أو مش مستعد تعيش زيهم أو مبتعرفش تصبر وتغير بالعقل، يبقى خليك في جاليتك أحسن عشان متقعش في مشاكل أنت في غنى عنها، وهتشغل دماغك وتشيلك هم.

اتجوز اللي شبهك واللي تعرف تتعامل معاها، وده عمومًا في الجواز يعني.

إنسى قصة المميزين والاحتفال بالإنجازات الصغيرة اللي كبرت عليها دي، محدش مهتم بيك ولا عملت إيه ولا صحيت الساعة كام ولا قريت كام كتاب، فيه دول الوزرا بيروحوا الشغل بالعجل وفي المترو، ومحدش بيهتم أنهم قاعدين جنبهم ولا ماشيين في الشارع. أنت بتعمل لنفسك ولدايرتك الصغيرة جدًا.

أعظم استثمار  | وليد طه

أعظم استثمار  | وليد طه

طرق السفر القانونية كتير قوي، مابين دراسة، وشغل واستثمار وطبعًا الجواز واللجوء، ده حتى فيه دول عندهم فيزا للمخطوبين.

مفيش مطعم ولا شركة ولا مركب، بتبعتلك من الهوا وتقولك "بنترجاك تشتغل معانا"، وهنديك تلتلاف دولار في الشهر، بس عايزين منك ١٠٠ دولار عشان الفيزا وهنديهملك لما تيجي.

كل ده كلام فاضي ونصب ومش حقيقي.

لو قدمت على شغل في بلد واتقبلت في الشغل، فالشركة هتتكفل بكل حاجة لغاية ما توصل عندهم، ولو هيدفعوك حاجة، فهتتخصم من مرتبك على دفعات بعد ما تشتغل، وحتى ده مش قانوني وممكن يكون فيه حوار.

توقع اللي من نفس بلدك يبعدوا عنك، وتوقع برضه أن محدش يساعدك، فمتاخدش على خاطرك قوي واطلع من حالة "اللي مني مزعلني" بسرعة، مفيش وقت للكلام ده.

لكن أنت متبقاش زيهم، ولو عرفت أن حد محتاج "حقيقي" مساعدة، يبقى ساعده باللي تقدر عليه، وخلي بالك برضه.

وأخيرًا أفضل مكان يعرفك كل المعلومات الخاصة بالبلد، هي سفارتها ومكاتبهم الحكومية المعتمدة في بلدك، لكن مش "الرحاب للعمالة".

معلش كلمتين تقال على البعض، بس كتبتهم بكل صدق وأمانة وعن تجربة طويلة.

متنساش تشترك في نشرة ميكانيكي بني آدمين وتشاركها مع غيرك :)

مشاركة
ميكانيكي بني آدمين

ميكانيكي بني آدمين

نشرة ميكانيكي بني آدمين، نشرة أسبوعية بشارك فيها حصاد الأسبوع مع أفكار أو كتب أو موضوعات جديدة تنفعكوا وتساعد في تغيير نظرتكوا في حاجات كتير، وكمان عشان تبقى مرجع ليكوا في المستقبل. متنسوش تشتركوا وتعملوا شير عشان توصل لعدد أكبر. وليد طه ويلش

المزيد من ميكانيكي بني آدمين