إزاي تستغل التسويف لصالحك | ميكانيكي بني آدمين - العدد #9

  التسويف، أكبر عائق قدام أي حد عايز يبدأ أو يكمل، محدش يقدر يختلف على كده، بس إزي ممكن تستغله عشان تكمل؟ بالظبط زي ما قريت، إزاي تستغل التسويف لصالحك؟ قبل ما أكمل، هي طريقة فيه مجازفة شوية، بس لو "ظبطت"… هتبقى عظمة جدًا. 

من كام سنة وزني وصل حوالي ١٢٥، والدهون نسبتها ك تقريبا شوية و٣٠٪، وقتها قررت أنزل وزني، وفعلًا وصلت أيامها لتقريبا ٩٥ في حوالي ٨ شهور "مش فاكر بالظبط".

أيوه رجعت تاني فترة كورونا لـ١٠٥ بس برضه رجعت ونزلت الأيام دي تاني لـ٩٤ بعد ما الوزن والأكل ضروني صحيًا قوي.

فكان لازم وقتها أفضل مكمل، والحقيقة في المرتين مكنتش عايز.

أصلًا مين اللي يحب ياكل صحي طول حياته ولا يقعد ساعتين في الـGym كل يوم يشتغل عتال؟!

إحنا عايزين حاجات تضخ دوبامين وكنبة جميلة ومسلسل نخلص موسمين منه في قعدة مع لترين بيبسي و٢٥ ساندوتش كبدة من عند "علي بركة الله"! (لو من مصر هتعرفه أكيد، لغاية النهاردة معرفش مصدر الكبدة 😂)

⚠️ المهم في يوم كنت بتعشى خس وجزر زي كل يوم ومعاهم صدر فرخة فلات، وفعلًا زهقان جدًا، ولقيتني بقول لنفسي "طيب كمل يوم كمان بس"، وتاني يوم طبعًا كنت حاسس نفس الإحساس، فقولت لنفسي "بكرة وخلاص".

ولقيت نفسي بسوف كل يوم عشان أكل Junk Food أو أطلع من النظام الصحي.

ومع الوقت الكلام ده امتد للتمرين💪، فبقيت أقول لنفسي "عدة كمان بس"، "مجموعة كمان بس"، "تمرينة كمان بس" 🏋️‍♂️. 

ولغاية النهاردة ومن وقت ما بدأت تاني، بشوف عشان ابطل تمرين وأكل صحي، لكن محصلش، عشان التسويف "مخدر" قوي.

جرب وشوف بس "مش عايز حد يدعي عليا"، أنا بشارك معاك تجربة جابت نتيجة كويسة جدًا معايا، استخدمت فيها حاجة سلبية قوي، عشان أوصل لنتيجة إيجابية جدًا. ودي كانت النتيجة أول مرة 👇

تغيير كامل 👇 

حلقات مهمة عن التسويف

فيه حلقة مهمة قوي لكل مصمم النهاردة!

أشوفكوا على خير

ويلش

ميكانيكي بني آدمين!