ميكانيكي بني آدمين - العدد #6

ليه حرف الـF لازم يبقى أهم حرف عند أي حد بيعمل محتوى؟

ده حرف F🤷 بنشوفه كل يوم... لكن اللي مش عادي أنه مرتبط بنجاحك ككاتب محتوى✍️أكتر ما تتخيل! وهقولك إزاي.

باختصار ومقدمة سريعة، دراسة عملتها NN/g لقت أن غالبية المستخدمين بيقروا المحتوى على شكل حرف F... يعني عينيهم بتقرا أول سطر أو أول فقرة، وبعدين بينزلوا شوية ويقروا فقرة بعدها وفجأة يبدؤوا يقروا بشكل عمودي!

الدراسة اعتمدت على نظام لمتابعة حركة العين لـ232 مستخدم، وهما بيقروا آلاف الصفحات أونلاين، ولقوا أن حركة العين بتختلف بنوع المحتوى واهتمامات الشخص، بس مازال الحركة في شكل حرف F هي المسيطرة

بس ليه الناس بيقروا بالطريقة دي؟ وليه مرتبطة بنجاح الكاتب والمحتوى؟

1. الصفحة مش متقسمة نقاط ومفيهاش أجزاء Bold ولا عناوين فرعية مميزة.
2. المستخدم مش مهتم يقرا كل كلمة، وفي بعض الأحيان بيفقد اهتمامه بعد تاني فقرة.
3. حشو كتير والمستخدم عايز يخلص ويوصل للي هو عايزه.

كيف تصبح فري لانسر ناجح | خطوات النجاح في العمل الحر - YouTube

وليه مرتبطة بنجاح الكاتب والمحتوى؟ 

لما المستخدم بيقرا بالطريقة دي، ممكن جدًا ميشوفش معلومات أنت عايز توصلهاله، بس الصياغة والكلمات وبناء الجُمل وحتى الـ Flow بتاع النص، مشجعوش يقرا الأجزاء دي.

ده معناه مش هيقعد في الصفحة كتير ويمكن يخرج من الموقع كله، ولو ده حصل في وصف منتج يبقى مش بايعين حاجة ونقفلها ونروح.

وده معناه برضه أن تصميم صفحة الهبوط بتاعتك والموقع وصفحة المنتج وطريقة عرضهم للمحتوى المكتوب، مهمين جدًا في نجاح المحتوى أو تحقيق الهدف اللي أنت عايزه منه.

تعلم SEO سيو من الصفر | التسويق الرقمي للمبتدئين - YouTube

يبقى كده فيه عنصرين مهمين قوي بيتحكموا في الـ F:

1. المحتوى نفسه وبناءه والمعلومات اللي فيه والكلمات وطريقة بناء الجُملة والـ Tone of voice، وتنسيق المحتوى.
2. تصميم الصفحة وألوانها والميديا اللي فيها.

طيب إيه الحاجات اللي تخليني أشجع المستخدم على القراية وأحميه من نفسه ومن الـ F؟

1- إبدأ الحتة بتاعتك بمعلومات قوية عايز توصلها للقارئ بدري.

2- استخدم العناوين الرئيسية والفرعية، وميزهم شوية عشان مخ 🧠 اللي بيقرا يفهم أنه محتاج يوجه عينه للجزء ده.

3- ابدأ عناوينك مباشرة وبمعلومة، مش برغي فاضي ومقدمات عاملة زي اللي بيبعتلك 20 رسالة كلهم "السلام عليكم... ممكن سؤال؟" وفي الأخر مبيسألش.

5- خلي الكلمات والجمل والأجزاء المهمة مميزة، وليكن مثلًا استخدام خط BOLD عشان تميز جملة مهمة.

6- متستخدمش في اللينكات بتاعتك الكلام القديم بتاع إعلانات نجيب الريحاني "إحجز الآن" و"أضغط هنا" و"للمزيد".... استخدم كلمات مهمة في مقالك واربطها بالصفحة اللي أنت عايزها.

7- دايمًا استخدم قوائم ونقاط في تقسيم محتواك، التقسيمة دي "صديقة المخ والعين" وبتساعد جدا في المحافظة على انتباه المستخدم.

8- شيل أي محتوى مالوش لزمة.

9- استخدم ميديا، وياريت تكون ميديا بتقدم معلومة وقيمة، زي إنفوجرافيك مثلا.

في الفيديو ده تقدر تشوف العين بتتحرك إزاي أثناء قراءة المحتوى، وطبعا عشان ده عربي فحرف الـ F مقلوب كأنه مكتوب من اليمين للشمال. 

Walid Taha on LinkedIn: ليه حرف الـF لازم يبقى أهم حرف عند أي حد بيعمل محتوى؟ ده حرف…

➖➖➖➖➖➖➖➖➖➖➖➖➖➖➖➖➖➖➖

كل ده وأكتر موجود على قناة Walid Taha وبالتحديد في سلسلة WRITE IT RIGHT وسلسلة فريلانسولوجي.

متنسوش تتابعوا تويتر وتوصلوا النشرة لغيركوا  ♥️