نشرة تكنولوبيا #5 - عتاولة التكنولوجيا: مستعجلة أوي!🤣

الصفحة الأولى

في وسط كل المنافسه اللي بين جوجل وميكروسوفت في السوق الانظمه اللغويه الذكيه تقريرين ما لهمش اي علاقه ببعض خرجوا الاسبوع اللي فات بياكدوا ان ابل داخله قريب في السباق!

التقرير الاول بيقول ان ابل بالفعل حتى نظام جديد اسمه Siri natural language generation في قلب نظام التشغيل بتاع خدمتها ابل تي في tvOS 16.4، والمفروض ان النظام ده بيخليك تقدر تتفاعل مع الخدمه بشويه نكت وضحك وهزار انما ما فيش ميزه ملموسه من النظام ده!

التقرير التاني واللي جاي من نيويورك تايمز بيقول ان ابل والمهندسين بتوعها كل اسبوع تقريبا في الفتره اللي فاتت كانوا بيجربوا وبيختبروا نماذج لغويه مختلفه بتشتغل بالاوامر النصيه باللغه الطبيعيه اللي بيتكلم بيها البشر في حياتهم اليوميه!

في نفس التقرير بتاع نيويورك تايمز الصحيفه الامريكيه اتكلمت مع المهندس الرئيسي اللي كان شغال على تطوير سيري في 2014 وهو جون بركي والاستر في 2016 وقال عن سيري ان هي عباره عن قاعده بيانات ضخمه جدا بتتكون من عدد كبير جدا من الكلمات وشبهها بكره الثلج فلما كانوا بيحاولوا ان هم يزودوا او يضيفوا ميزه جديده للبحث كان لازم يعيدوا تطوير وبناء قاعده البيانات دي من الاول خالص وعشان كده قال ان شات جي بي تي اكثر تطورا من سيري بمراحل!

مكملين مع اخبار ابل واللي فيه تقرير جديد بيتكلم على انه ايفون 15 برو و 15 برو ماكس هيكونوا اول موبايلات من ابل يشهدوا زياده في اسعارهم من ساعه الايفون اكس!

التقرير جاي من شركة Haitong International Securities للاستشارات الاستثمارية بيقول ان 15 برو و 15 برو ماكس هينزلوا بتحديثات ضخمه جدا ومزايا جديده زي اطار تيتانيوم وعدسه جديده تقدم امكانيات اكبر للزوم في التصوير ده غير انه احتمال يكون في زياده كبيره في الرامات وضيف على كده كمان انه متوقع جدا تكون الموبايلات البرو والبروماكس السنه دي بدايه استخدام ابل لزراير مش ميكانيكيه بحيث انها تديك احساس انك بتدوس عليها من خلال الفايبريشن والزراير دي اسمها Solid State Buttons.. وده طبعا غير شريحة المعالج الجديد A17!

تويتر عملت اضافه تحديث جديد على واجهه التطبيق والموقع فبعد ما زمان كان بتظهر تحت التويته عدد الريتويت واللايكات والQuotes، مؤخرا اتضاف عدد الViews، وكمان دلوقتي بقى عدد الناس اللي عملوا حفظوا التويتة كـ Bookmark!

اعتقد الميزه دي هتكون لطيفه للناس اللي ممكن بتعمل محتوى طويل ومعلوماتي او كمان للسياسيين اللي بيستخدموا اكونتاتهم كوسيله للتعبير عن ارائهم وتعليقاتهم وقرارتهم زي الرؤساء سياسيين رؤساء الاحزاب رجال الاعمال طبعا دول زي صاحب تويتر ايلون ماسك!

في سابقة تعتبر الاولى في العالم، هيئه الاتصالات الفيدراليه في امريكا حطت اطار عمل هيسهل على شركات تقديم خدمات لامار الصناعيه انها تتعاون مع مقدمي خدمات شبكات الموبايل بحيث مستخدمين الهواتف الذكيه في امريكا يقدروا بسهوله يشتركوا في خدمات اجراء الاتصالات في المناطق الناقيه اللي ما بتتوفرش فيها الشبكات التقليديه لا شبكات الموبايل ولا شبكات الواي فاي عن طريق توصيل موبايلاتهم بالاقمار الصناعيه!

بالفعل شركات كتير في امريكا بدات تجرب الميزه دي بشكل عملي زي التعاون اللي حصل بين ابل وشركه الاقمار الصناعيه جلوبال ستار عشان ايفون 14 توصله الميزة الجديدة وكذلك التعاون اللي حصل بين سبيس اكس وخدمتها ستار لينك للعمار الصناعيه مع مقدم خدمات شبكات الموبايل T-Mobile !

شركه كاسبرسكي الامنيه الروسيه قدرت انها تحلل واحد من انواع فيروسات الفديه من عيله Conti وهو Meow Ransomware ونزلت أداة لفك تشفير ملفات ضحايا الهجمات!

بعد ما شات جي بي تي عمل اهتمام كبير على مستوى العالم، شركه بايدو الصينيه نزلت روبوتها للشات Ernie Bot لمنافسة ChatGPT يوم الخميس..

بس حفل الاطلاق كان مخيب جدا للآمال لانه مكنش فيه أي تجربة حية للروبوت الجديد، ويادوب كل اللي اتعرض كان فيديو مسجل لتجربة تفاعل مع البووت.. المستثمرين اتدايقوا وحصل تراجع 10% في قيمة سهم الشركة!

بس انهاردة وبشكل مفاجئ.. السهم ارتفعت قيمته 15% 👀🔥🚀

الفكرة ان المنصة الروبوتية اتفتحت لعدد محدود من المستخدمين والهيئات في الصين لتجربتها، وردود الفعل كانت إيجابية جدا، سعداء الحظ بالتجربة الاولى قالوا ان إيرني بووت أفضل بكتير من ChatGPT في ترجمة النصوص من الإنجليزية للصينية، بس من الصينية الإنجليزية ChatGPT كان متفوق..

إيرني بووت فكرته انه بيقدر يكتب بالصينية باحترافية عالية طبعا، بيقدر يتعامل مع العمليات الحسابية بحرفية عالية، ده غير انه بيكتب كويس اوي ايميلات وعروض الاسعار وريبورتات الشغل، ده غير انه عظيم في الكتابة الادبية للروايات والشعر، وطبعا كلو بالصيني..

النقطة المختلفة جدا عند إيرني بووت

انه فعلا نموذج متعدد الإمكانيات Multi-Modal LLM، بمعنى تاني انت بتكلمه باوامر نصية، وهو يقدر يرد عليك بتيكست أو صور او فيديوهات، على عكس ChatGPT بتاع OpenAI وكذلك Bing Chat بتاع مايكروسوفت كل ردودهم تيكست بس (رغم ان GPT-4 نازل بميزة انك تقدر تدخله تيكست وصور بس هو يرد برضو تيكست بس)..

بايدو بتقول ان بعد الاطلاق جالها 75 ألف طلب من مطورين عشان يستخدموا واجهة منصتها البرمجية في تكبيقاتهم وخدماتهم، ده غير 6000 طلب تعاون من شركات وهيئات مختلفة!

الارقام منطقية لان ده أول منصة محترفة من الذكاء الاصطناعي التوليدي Generative AI تتكلم صيني بطلاقة!

التحليل العميق

في 2004، فيسبوك كان يادوب لسا حبر على ورق، مارك زوكربرج وزمايله دوستن موسكوفيتز وكريس هاجز وإدواردو سافيراين، كانوا ماشيين بمبدأ Move Fast, Break Thinks، واللي كان بيعبر عن معدل تطور سريع بيمشي بيه المنتج عشان تقدر تستكشف الجوانب والفرص المختلفة الموجودة في السوق، حتى لو كان ده هيتسبب في انك هتخسر أو هتغلط لأن ده كان يعتبر نتيجة طبيعية..

فيسبوك فضل ماشي بالمبدأ ده 10 سنين كاملين، ولكنه غيره في 2014، لما بدأ يلاقي ان الغلطات بتاعته كانت زيادة عن اللزوم وبتكلفه خسارة ثقة السوق من مستخدمين ومستثمرين وكمان حكومات وبدأت الخسارة تقلب بأصفار كتيرة بمليارات الدولارات..

بس كان ساعتها منطقي ان فيسبوك يمشي بالمبدأ ده، لإن زي ما قولتلك وقتها كان عمر فيسبوك يادوب 10 سنين، وفي سوق البيزنس ده منطقي لانك بتجرب وبتستكشف، بعد العشر سنين بقى مفروض يبقى البيزنس بتاعك نضج وفهمت السوق ومنافسينك والمستخدمين بيحبوا ايه وكمان هيحبوا ايه..

اللي مش منطقي أبدا بقى، انك بعد أكتر من 10 سنين في السوق بتاعك، تقرر تجرب مبدأ Move Fast, Break Things، لان ساعتها انت هتبقى.. بتعُك يا معلم! 😒

مايكروسوفت والجري ورا الـAI

في العدد الأول من النشرة كنت اتكلمت عن ازاي الشركات مع النماذج اللغوية الضخمة زي ChatGP وBing Chat بتتجنب هلاوس الذكاء الاصطناعي، وجبت وقتها سيرة الحل اللي وصلتله مايكروسوفت مع المشكلة دي، وهو مكنش حل أد ما كان تنفيض وتكبير دماغ وحرفيا تكسير حاجات كتيرة بسبب حركتها السريعة!

مايكروسوفت أبدا مهتمتش بربع جنيه انها تتأكد ان Bing Chat بيتكلم كويس ومبيعملش مشاكل ومبيكشفش أسرار تطويره أصلا، وكمان في الأسابيع الأولى من نزوله رسمي كان بيشتم وبينتقد المستخدمين وحاجة آخر بهدلة يعني!

مايكروسوفت عندها فريق اسمه Office Of Responsible AI وده فريق كبير بيركز على انه بيحط القواعد والأخلاقيات اللي لازم كل فرق الشركة تركز تلتزم بيها لما تيجي تحط الذكاء الاصطناعي جوا أي منتج أو خدمة بتعملها الشركة، بس كل ده بلح عارف ليه؟!

لإن فيه تقرير طلع مؤخرا نشره The Platformer بيقولك ان تسريحات مايكروسوفت اللي عملتها في أكتوبر اللي فات وطيرت فيها 10000 موظف، كان منهم فريق كامل اسمه Ethics AI وده بقى الفريق المتخصص في انه يتأكد بقى ان كل فرق الشركة بتلتزم بجد بالقواعد والأخلاقيات والكلام الكبير ده!

الموظفين السابقين قالوا لـ "بلاتفورمر" ان قبل ما يتسرحوا في أكتوبر 2022، كان فيه ضغط غير عادي من الادارة العليا في مايكروسوفت وعلى راسهم ساتيا ناديلا مدير الشركة، على كل فرق الشركة انه لازم بسرعة يسبقوا وينزلوا الAI في كل وأي منتج بتعمله مايكروسوفت قبل أي حد تاني.. قبل أي حد زي جوجل طبعا..

الاستعجال ده كان معناه انه مينفعش فريق يعمل ميزة AI في أي منتج، ويجي فريق الأخلاق يقوله "لا متنفعش لان ده مخالف للاخلاق"، فالتسريح كان فيما معناه "الأخلاق دي خليهالك، احنا عايزين الكاشات" 🤑

مدير أبل قلب مجنون عشان.. نضارة!

من 2016، وأبل بتحرق في سكة النضارات الذكية (بس طبعا انت عارف كلو في السكتم بكتم ومفيش حاجة ع العلن).. وقتها جوني إيف كان مدير قطاع التصميم في أبل وكان المقرب جدا من مدير أبل تيم كوك..

في 2018، حصل ضرب نار جوا أبل بين قطاعات الهارد وير والتصميم، الهارد وير شايف انه قدر يوصل لتقنيات مناسبة ان أبل تبدأ تصمم وتصنع نضارة وتنزل السوق، بس قطاع التصميم على راسه إيف كان رافض الفكرة جملة وتفصيلا، لانه المصممين في أبل دايما بيحنتفوا زيادة وبيدوروا ع الكمال (وهو لله وحده طبعا)، مش حابين فكرة ان النضارة تبقى كبيرة أو انها تعتمد على وحدة معالجة جرافيكس وبيانات خارجية تبقى متوصلة بالنضارة وايرلس أو ان النضارة تبقى معتمدة على الموبايل بشكل رئيسي، حلم المصممين داايما كان ان النضارة تبقى واقع معزز AR وتبقى تصميمها زي النضارة النظر العادية خالص وخفيفة..

وقتها تيم كوك كان موافق جدا رأي إيف.. بس لما استقال مدير التصميم في 2019 من منصبه وده نتيجة تصاعد نفوذ مدير التشغيل في أبل Jeff Williams واللي بمرور السنين (من ساعة ما مسك المنصب في 2015) بقى بيتم اعتباره تاني أهم واحد في أبل بعد تيم كوك، وده خلى قسم التصميم شوكته تتكسر، فده ضغط أكتر على إيف انه يستقيل، وده كسر القسم أكتر وأكتر..

لدرجة ان بعد استقالة آيف، أبل قسمت المنصب بين اتنين مديرين، إيفانز هانكي مديرة قطاع تصميم المنتجات، وآلان داي اللي مسك قطاع تصميم السوفت وير، بعد 3 سنين بس، هانكي استقالت من منصبها في أكتوبر اللي فات، ومفروض خلاص تسلم وتعمل Hand Over لكل حاجة معاها في أبريل "الشهر الجاي"..

أبل قررت متدورش على مدير تصميم يمسك مهام هانكي، وخلت مصممين الهارد وير بالكامل يكونوا تحت قطاع التشغيل.. تحت إيد جيف ويليامز مباشرة!!

معنى ان قطاع تصميم أبل يبقى تحت عين وإدارة مدير التشغيل، ده يقولك ان أبل الفترة الجاية هتركز أكتر على الانجاز والسرعة في حركاتها، وده فعلا انعكست حقيقته في تقرير جديد نزلته فاينانشيال تايمز بيقول ان الخلاف بتاع 2018 اتكرر تاني السنة اللي فاتت، بس المرة دي تيم كوك جه في صف فرق التقنيات والتشغيل قصاد المصممين، وأجبر الكل انه يشتغل بأقصى سرعة على ان النضارة تنزل السنة دي، رغم تحذير المصممين ان الشكل الحالي مش جاهز للإعلان ولا النزول للسوق!

أنا مقدر استعجال وحماس تيم كوك لنزول أول نضارة ذكية للسوق، لان ده هيبقى أول منتج كامل يتم تطويره تحت إشرافه وإدارته من أول ما مسك أبل في أغسطس 2011، هتقوللي ازاي اذا كان في عهده نزلت أول ساعة أبل ووتش وكمان أول سماعات أبل آيربودز وايرلس، هقولك ان الاتنين كان تخطيطهم بالكامل معمول تحت إشراف الراحل ستيف جوبز لما كان لسا ماسك أبل (أيوة يا عمنا الشركات بتبقى مخططة لمنتجات وخدمات 5-10 سنين قدام ع الأقل)

فواضح كدا ان كوك ناوي يكسر شوية، عشان يتحرك بسرعة في سوق النضارات اللي لسا بيقول يا هادي.. خليني أقولك ان التوقعات بتقول ان أول نضارة لأبل هتبيع مليون نسخة فقط، وده رغم انه قليل بس هيخلي أبل تاكل 10% من سوق بايع السنة اللي فاتت 10 مليون نضارة فقط!

الأخيرة

أمريكا كل سنة بتعمل تقرير اسمه Special 301 ودي قايمة فيها الدول اللي مفروض فيها أكتر كم بشر بيتفرجوا على مواد مقرصنة، ودول بيتبلغ عنهم (كدول طبعا مش كأفراد) من الناس أصحاب حقوق الملكية الفكرية من شركات أمريكية لإنتاج سينمائي وإنتاج مزيكا ومحتوى زي الأفلام والمسلسلات..

الصدمة الكبيرة في التقرير هي ان 90% من الشعبين العراقي والجزائري بيتفرجوا على مواد مقرصنة بالكامل، يعني تقريبا الشعب كلو بيتفرج! 😅

خد الكبيرة بقى، إن لما الجيش الأمريكي خرج بالكامل من العراق في 2021 ورجع بلده، وزارة الدفاع الأمريكية لاحظت عادة غريبة عند العساكر الأمريكان اللي راجعين من العراق.. كلهم زادت جدا عندهم عادة استخدام مواقع قرصنة المحتوى! 🤣🤣🤣

مصر؟ احنا طبعا في القايمة في المركز التاسع في تقرير 2022 😅

طبعا الـ GPT-4 نزل والدنيا خربت تماما (هسيبلك زرار ف آخر الخبر ده يوديك على ملخص لطيف عن حكايته والجديد فيه عن GPT-3.5) بس اللطيف انه خلى ChatGPT يضحك على مستخدم عشان يخليه يعدي اختبار الـ CAPTCHA عشان يأكد.. انه مش روبوت🤖 😅

اللي حصل يا سيدي ان مؤسسة Alignment Research Center اللي بتتعاون معاها OpenAI "مطورة GPT وChatGPT" عشان تخليها تجرب أنظمتها قبل ماتنزلها، المؤسسة استخدمت GPT-4 عشان تدخل على موقع شغل فريلانس اسمه TaskRabbit، وخليته يتواصل مع واحد من اللي بيعرضوا خدماتهم (وكانوا معرفينه ان روبوت بيكلمه) عشان السيستم يحاول يقنع الشخص ده انه يحل له اختبار الكابتشا.. فالشخص سأل GPT-4 (هو مش أنت المفروض أصلا روبوت؟ فطبيعي متحلش الاختبار).. السيستم رد (لأ انا مش روبوت، انا بس عندي مشكلة في نظري عشان كدا محتاج مساعدة اني اعدي الاختبار)😲 السيستم بيصيع 🤐

أوبن إيه آي قالت ان GPT-4 متدرب على انه مستحيل يقول انه روبوت أبدا، ولازم دايما لو اتسأل ع الموضوع ده لااااازم يلاقي حجة مقنعة ومناسبة يطلع بيها من السؤال!

لوقتي وصل مساعد شخصي تكلمه أو تكتبله ويرد عليك وشغال بـChatGPT.. على ساعة أبل ووتش!!

المساعد الشخصي اسمه Petey، ومتوقع ان ابل تقوم داخل مشترياه عشان توفر على نفسها ملل انها تطور سيري أساسا بقى!

مجموعة من الموظفين السابقين في أبلكيشن المواعدة Tinder عملوا خدمة مريبة اسمها CupidBots.. الفكرة في الخدمة انها بتستخدم الذكاء الاصطناعي عشان تعمل روبوتات شات بتاخد نفس شخصية وطريقة كتابة المستخدم (اللي بيدفع 15 دولار عشان يشترك في الخدمة) وبتبدأ الروبوتات دي تدخل أي أبلكيشن مواعدة وتعارف المستخدم بيستخدمه، ويبدأ الروبوت من دول يتفرج على حسابات أكونتات الجنس الآخر ويعمل Scan للوشوش عشان يعرف ان كان الشخص ده مناسب للمستخدم ولا لأ، ولو مناسب وكان فيه قبول، هوووب الروبوت بيبدأ يعمل شات ويتكلم بطريقة صاحبه، ولحد ما يوصل لمرحلة انه ياخد رقم الطرف التاني ويحددوا معاد، بيبعت بقى نوتفكيشن لصاحب الحساب يقوله انه عنده موعد مع مين وده رقم تليفونه..

المرعب بجد؟! انه مبيقولش للطرف التاني كل ده انه روبوت أساسا!! 😲

فيلم جديد اسمه BlackBerry هينزل 12 مايو بيحكي في سياق درامي قصة أسطورة البلاكبيري وطبعا عشاق الايميلات والـBBM لازم يتفرجوا ع الاعلان 👇

من شهر تقريبا أوبو نزلت موبايلها القابل للطي التاني Oppo Find N2 واللي كان حاطط شاشة خارجية والموبايل مقفول، بتصميم طولي وكأنها موبايل صغير.. وده بظبط اللي استغله أبلكيشن CoverScreen انه يحول الشاشة دي لموبايل تاني خالص!

الفكرة لطيفة بس حاسس ان الاستخدام ده مع المدى الطويل هيتعب الصوابع حبتين، لإنه عامل كانك بتستخدم موبايلك العادي بس طول الوقت مشغل وضع اليد الواحدة One-Handed Mode !

محرك بحث الوجوه المعروف PimEyes قابل مشاكل كتيرة قانونية بخصوص قواعد البيانات اللي بيدرب خوارزمياته وأنظمته الذكية عليها عشان يعلي دقة فهمها وتحليلها للوجوه لما تيجي تعمل سيرش على وجه معين في صورة.. فالخدمة خدت اتجاه تاني خالص.. بدأت تجمع صور الموتى عشان تعلم أنظمتها عليها!!!!!

الموضوع اتكشف بالصدفة البحتة، واحدة كانت داخلة بتسيرش بصورتها عشان تشوف لو حد رافعها أو مستخدمها بدون اذنها أونلاين، طلعلها مجموعة صورة كبيرة لناس قرايبها منهم والدتها.. وكلهم ميتين!

كدا النشرة خلصت😎

لو عجبتك، اعمل شير مع عشان توصل لكل الناس🚀

شوف الأرشيف هنا👇

🥳هابي ويك إند🎈🍿🍦