نشرة تكنولوبيا - العدد #7

الصفحة الأولى

موظفين ميتا سلخوا مارك زوكربرج بأسئلتهم!

في اجتماع عام لموظفين الشركة الخميس اللي فات، مدير ميتا ومؤسسها مارك زوكربرج التقى بالآلاف من الموظفين واللي كان أغلبهم متدايقين بشكل واضح من إعلان الشركة لبداية الجولة التانية من التسريحات بين صفوف الموظفين اللي بتستهدف 11 ألف موظف.. وكل اللي كان طالع على الموظفين: ليه موفيتش بوعدك يا مستر مارك؟!

الوعد اللي بيتكلموا عنه هو اللي قاله زوكربرج في أكتوبر اللي فات بعد الجولة الأولى واللي طالت 11000 موظف، ساعتها وعد بإنه مش هيكون فيه تسريحات تانية على المدى القصير.. وطبعا خلف!

مارك علل أسباب الموجة التانية بإن الادارة لقت ان الحالة الاقتصادية الضعيفة للعالم هتستمر لفترة أطول من اللي كان متوقع السنة اللي فاتت وبالتالي ده كان بيتطلب المزيد من الخفض من التكاليف سواء على مستوى المشاريع أو تكاليف الشركة أو كمان أعداد الموظفين، فالادارة حاليا شغالة بشل رئيسي على ترتيب أولويات الشركة من حيث المشروعات الأهم هي اللي هيتوجهلها موارد الشركة بشكل أكبر، بينما المشروعات الأقل أهمية هيتسحب منها الموارد وتتخفض القوة البشرية المخصصة ليها!

مارك كمان قال ان التسريحات مش بس على مستوى الموظفين الصغيرين، لأ بالعكس الشركة مستمرة في انها تقلل الطبقات العليا في هرمها الاداري وماشية ناحية انها تخلي درجات المديرين أقل بكتير من قبل كدا!!

أحب أفكرك إن مارك أول السنة دي أعلنها صراحة: "2023 هي سنة الكاءة.. التكاليف هتتخفض لأدنى حد ممكن، حتى على مستوى استثمارات الشركة في تقنيات الميتافيرس".. شد الحزام ع الآاااااااخر!

مايكروسوفت جاية تاكل في طبق جوجل وأبل!

فيل سبينسر، مدير قطاع الإكس بوكس، ضرب تصريح من يومين مرعب خلى جوجل وأبل يجروا وبرا بعض:

🔥مايكروسوفت شغالة على متجر جديد تماما متخصص في تقديم الجيمز على موبايلات أندرويد وآيفون بالكتير هيجهز على السنة الجاية!🔥

طبعا الخطوة دي هتضرب عتاولة الآب ستورز على أندرويد وiOS في مناطقهم الحساسة، حركة كش ملك كدا رهيبة طبعا ساندة على مشروع قانون Digital Markets اللي الاتحاد الأوروبي بيدرسه حاليا ولو اتوافق عليه هيتطبق من أول مارس 2024، وده ياسيدي بيلزم جوجل وأبل انها تفتح أنظمة تشغيلها عشان تقدر أي شركة تعمل متجر مستقل لأي نوع من التطبيقات بحيث المستخدم يقدر يختار يسطب أي ستور مختلف على موبايله.. طبعا بالنسبة لأبل دي ضربة تحت الحزام!

🗣👂كلمة ف سرك 🗣👂 أنا مبسوط في أبل لأنها قطعت رزق السوق كلو بحركة استراتيجية ATT (اختصار App Tracking Transparency ) اللي عملتها من سنتين على آيفون واللي حرمت بيها كل السوق انه ياخد داتا من موبايلات آيفون عشان يستهدفوا المستخدمين بالاعلانات، في حين إن أبل نفسها زودت جدا المساحات الاعلانية في الأبلكيشنز بتاعتها وخصوصا الآب ستور، فخسرت جوجل سناب ميتا وغيرهم مليارات، وهي كسبت بالهبوللي!

مايكروسوفت ناوية تستخدم صفقتها (اللي عاملة قلق) على Activision Blizzard أم 75 مليار دولار عشان تنزل كمية جيمز حصرية للستور بتاعها زي إصدارات جااية من Call Of Duty Mobile وDiablo Immortal  وكاندي كراش ساجا وغيرهم كتير.. وبكدا تستخدم دول ككارت ضغط على متاجر جوجل وأبل!

لو مش فاكر، أبل كانت عاملة زي الشوكة في زور مايكروسوفت لما كانت بتحاول تقدم خدمتها Game Pass للجيمز في الكلاود على موبايلات آيفون، وكانت رافضة تدخل الابلكيشن بتاع الخدمة أصلا على الآب ستور، وبطلوع الروح وصلوا لاتفاق وطبعا كان في مصلحة أبل فوق مايكروسوفت!

فيعني مايكروسوفت جايبة آخرها من أبل بشكل خاص، وفكرة الستور المنفصل هتبقى نقلة عظيمة لمايكروسوفت في سوق الجيمز خصوصا ان أرباح قطاع الجيمز عندها عالي جدا من السنة اللي فاتت!

فيسبوك وانستجرام ويوتيوب رجعوا ترامب إلى الحياة!

بعد بلوك دام سنتين، الرئيس الأمريكي السابق دونالد ترامب رجعت أكونتاتهم تشتغل تاني على فيسبوك وانستجرام ويوتيوب، وأعتقد العودة دي ممكن يكون ليها بعد سياسي لإن ترامب بيخطط ينزل انتخابات رئاسة أمريكية في 2024، وهو على انستجرام عنده 23 مليون فولور وعلى فيسبوك حوالي 34 مليون فولور!

كدا ترامب رجع للسوشيال ميديا كلها، وده بعد ما كان تويتر أول من رجع الرئيس السابق للولايات المتحدة لعالم الشبكات الاجتماعية بعد استحواذ إيلون ماسك على تويتر، وكان عمل ماسك في نوفمبر استطلاع رأي وقال جملته الاتينية المعهودة "Vox Populi, Vox Dei" ومعناها "صوت الناس هو صوت الرب"، وقام مرجع حساب ترامب!

خلي بالك السوق مليان نسخ مضروبة من هارد Samsung 980 PRO SSD!!

قابلني كمية بوستات أونلاين في الصين وكوريا بتتكلم على إن السوق فيه إصدارات كتيرة مزيفة من هارد سامسونج SSD الـ980 PRO واللي كلها مضروبة ومعمولة بحرفية عالية جدا بيخلي اكتشافها أصلا صعب جدا!

الهاردات المضروبة كلها عليها ستيكر أصلي زي بتاع الهارد الأصلي بتاع سامسونج، وكمان متنزلها الـfirmware الأصلي لدرجة ان برنامج سامسونج لإدارة وضبط هارداتها Samsung Magician وبيقراها انها أصلية عادي!!

لما أكتر من متخصص في الهاردوير بدأوا يفكوا الهاردات المضروبة اكتشفوا ان الكنترولر بتاعها من تصنيع شركة TSMC، في الوقت ان الهارد الأصلي بيستخدم الكنترولر من سامسونج نفسها، ضيف لكدا كمان إن الهارد الأصلي حجمه كبير بشكل ملحوظ مقارنة كمان بأي هارد SSD  اتنين تيرا!

أكتر حاجة كشفت المضروبين إن سرعات نقل الداتا مختلفة خالص عن الأصلي، مبدئيا سرعات المضروب 4.8 جيجا في الثانية معدل قراءة الداتا، و4.5 جيجا في الثانية معدل النقل إلى الهارد، أما الأصلي فسرعاته 7 جيجا في الثانية و 5جيجا في الثانية.. فيعني فيه فرق في السرعات سيدي الرئيس!

البجاحة الحقيقية ان المضروب بيتباع في نفس التغليف بتاع سامسونج الأصلي!

أداة جديدة بتحمي التصميمات الفنية من إن منصات زي Midjourney تقلدها!!

مجموعة باحثين عملوا أداة جديدة اسمها Glaze، الأداة دي فكرتها معتمدة على انها بتخلي المصممين يضيفوا بيانات كودية جوا تصميماتهم، بحيث لما منصات الذكاء الاصطناعي زي Midjourney وStable Diffusion يتطلب منها انها تعمل تصميم أو عمل فني بنفس ستايل لوحة معينة أو ستايل فنان معين، تتشوش ومتقدرش تقتبس الستايل بتاع اللوحة أو الفنان، وإنما مش هتقدر تاخد إلا شوية البيانات الكودية اللي ضافها المصممين باستخدام Glaze، وبكدا يطلع العمل الفني الناتج مختلف تماما عن العمل الفني الأصلي!

بالمناسبة فيه كمية قضايا مرفوعة ضد منصات الذكاء الاصطناعي الفنية دي من مصممين وفنانين لان هم شايفين ان تقليد المنصات دي للوحاتهم وأساليبهم الفنية بيضر سمعتهم وبينافسهم في شغلهم وبيهدد مستقبلهم!

مايكروسوفت: زيادة كبيرة في استهداف الهاكرز الروس للمستشفيات!

تقرير جديد نشرته مايكروسوفت بيكشف تركيز ملحوظ من هجمات سيبرانية بتعملها مجموعة هاكرز اسمها Killnet بتعتمد ضد المستشفيات ومؤسسات القطاع الصحي حول العالم!

الفريق الروسي – اللي مايكروسوفت بتقول انه مدعوم من حكومة بوتين – شغالة بأسلوب هجمات رفض الخدمة DDoS ضد المستشفيات من نوفمبر اللي فات وكانت البداية بمطارات أمريكا، بس حاليا التركيز زاد ع المستشفيات!

الفريق الروسي اتشكل في فبراير 2022 مع بداية الحرب الروسية على أوكرانيا، وعمل كمية عمليات إلكترونية ضد حكومات وشركات على مستوى العالم!

لعيبة الجيمز بدأوا يتكلموا مع شخصيات الألعاب بفضل منصات زي ChatGPT!!

تقرير جديد بيأكد إن شركات تطوير الألعاب الصينية العملاقة زي NetEase ةmiHoYo وTap Tap بدأت تطور مزايا تعتمد على النماذج اللغوية الذكية الضخمة LLM عشان يخلوا الجيمرز يقدروا يدخلوا تجارب مختلفة تماما في ألعابهم!

مثلا NetEase بتخلي دلوقتي لعيبة لعبتها Justice Online يتكلموا مع الشخصيات الافتراضية في اللعبة بالكتابة والصوت، كمان شركة miHoYo بدأت تطور أكتر مساعدها الذكي النصي MiniMax عشان مستقبلا تدخله أكتر في ألعاها وأشهرهم Genshin Impact!

في اتجاه كبير في سوق الجيمز ناحية استخدام الذكاء الاصطناعي في انه يطور محتوى جوا الألعاب سواء بأوامر صوتية أو نصية من اللعيبة، وده هيفتح مجال كبير سواء لخيال اللعيبة انه كل واحد منهم يحط التاتش بتاعه حرفيا جوا اللعبة عشان يحس انها لعبته هو، وكمان هيفتح مجال مختلف تماما عشان المحتوى ده أكيد مش هيكون دايما ببلاش وممكن جدا الشركات تستغله في ان اللعيبة تدفع سواء اشتراك او تشتري الميزة دي مرة واحدة، وفي الحالتين المزايا هتترجم لفلوس!

البرازيل بتفكر ازاي تحمل المواقع والشبكات الاجتماعية مسؤولية المحتوى اللي بينشره المستخدمين!

بعد موجة احتجاجات مدمرة حصلت في يناير من أنصار الرئيس السابق جاير بولسونارو بسبب اشاعات انتشرت ع السوشيال ميديا، الحكومة البرازيلية حاليا بتدرس ازاي تحط اطار تشريعي وقانوني يحمل الشبكات الاجتماعية والمواقع الالكترونية مسؤولية انتشار المحتوى المخالف عليها، طالما الشبكات والمواقع بيكسبوا منه فلوس عن طريق الاعلانات أو أي شكل ربحي تاني!

بالمناسبة، ده برضو اتجاه عام في الولايات المتحدة، فمؤخرا مرفوع قضية ضد جوجل مشهورة باسم "Gonzalez vs Google" القضية رافعاها عيلة بنت اسمها نوهيمي جونزاليز اتقتلت في هجوم إرهابي لداعش على باريس في نوفمبر 2015، اتسبب في مقتل 20 شخص، القضية دي عيلة نوهيمي اتهمت جوجل في انها اتساهلت مع المحتوى اللي بتنشره داعش على يوتيوب وده كان سبب في انتشار فكرهم الارهابي و تجنيد كتير من شباب الغرب واتسبب في مقتل بنتهم ضمن ضحايا كتيرة..

الدعوى القضائيةدي لو اتحكم فيها ضد جوجل وتم تحميلها مسؤولية المحتوى اللي بيتنشر على يوتيوب، فده  هيغير شكل الانترنت للأبد، لإن ده هيهد بند اسمه البند 230 أو Section 230 من قانون الاتصالات الأمريكية لعام 1934 واللي بينص على ان مقدمي خدمات الانترنت زي جوجل ميتا وغيرهم مبيتحملوش مسؤولية المحتوى اللي مستخدمي الخدمات والمواقع بينشروه على منصاتهم!

تويتر في كارثة اختراقات حاليا!!!!

من أول السنة وفيه كمية حسابات متوثقة بيحصلها اختراقات على تويتر (وكلها حسابات متوثقة قديمة قبل نظام التوثيق المدفوع)، كلهم بيحاولوا يضحكوا على الناس ويدخلوا ليهم من ان شخص مشهور بيبيع اجهزة لابتوبات ماك بوك ومتوقعة من الشخص المشهور وبسعر مخفض.. وآلاف الدولارات بتتسرق، وتويتر ساكتة!

الغريب ان الاكونتات دي بتتسرق، والنصابين بينشروا ويضحكوا على الناس في الفلوس، وتويتر مبتقفلش حتى الاكونتات دي!

الموضوع الأنقح بقى ان اكونت مستشار سياسي اسمه Winnie Wong (وده كان مستشار للمرشح الرئاسي بيرنسي ساندرز في الانتخابات الامريكية 2020) الاكونت بتاعه اتهاك، وبدأوا الهاكرز يبعتوا لناس تقيلة من حسابه – بعد ما غيروا اسمه إلى Twitter Support – على انهم من دعم تويتر الفني وأقنعوهم ان حسابات مخالفة ولازم يملوا استمارات وفي الاخر بيتطلب منهم تسجيل دخول وطبعا الباسورد ف ثانية بيبقى ف ايد الهاكرز!

كل ده بيحصل وتويتر ف بلاد الكاوكاو!

بمناسبة تويتر، دلوقتي خدمة تويتر بلو بقت متاحة ف مصر ودي أسعارها ومميزاتها 👇

الأخيرة

تعرف إن قبل ما ChatGPT يعمل قلق ويسمّع ويبقى تريند، فيه شركة تطوير ألعاب صينية اسمها NetDragon Websoft أعلنت في أغسطس اللي فات انها هتشيل مديرها التنفيذي وتحط مكانه.. روبوت!

الشركة فعلا حطت روبوت برمجي اسمه Tang Yu ومن وقتها سهم الشركة في العالي وقيمته زادت 10% على مدار الـ6 شهور اللي فاتوا!

الشركة قالت ان استخدام الذكاء الاصطناعي كمدير تنفيذي خلى القرارات تكون أذكى وتفادي المخاطر بقى أحسن بكتير، ضيف على كدا كمان إن بيئة العمل للموظفين بقت مريحة أكتر!

أحب أقولك إن جاك ما مؤسس امبراطورية علي بابا الصينية توقع في 2017 إن روبوت هيكون على غلاف مجلة التايم الأمريكية خلال 30 سنة كأفضل مدير تنفيذي.. خلينا نشوف 2047 هنوصل لفين!

اختراق مديرة سياسات الأمن المعلوماتي السابقة في ميتا! 😅

زي ما بيقولوا، باب النجار مخلع، أرتيميس سيفورد، مدير سابقة في ميتا كانت مسؤولة عن سياسات الأمن المعلوماتي في الشركة، تم اختراقها في سبتمبر 2021 بفيروس تقيل اسمه Predator وده بيخلي الهاكر قادر يتحكم ويشوف كل الداتا ع موبايل الضحية وكإنه بين ايديه!

اللطيف كمان ان "سيفورد" اتسجلها مكالمات من موبايلها على مدى سنة كاملة من جانب المخابرات اليونانية..

الحاجة خدت بالها ان كل ده حصل لما شافت اسمها في ليستة للشخصيات العامة اللي استهدفها "بريداتور" خرجت للنور في نوفمبر اللي فات!

مهندس قرر انه يدرب نظام ذكاء اصطناعي عشان يقلد صوت ستيف جوبز.. النتيجة؟ مرعبة😱

المهندس John Meyer عمل نظام ذكاء اصطناعي وبدأ يدربه على كم ضخم من البيانات والفيديوهات والمقاطع الصوتية اللي كلها خاصة بمؤسس أبل الراحل ستيف جوبز، وبعدها قام رابط سيستم الذكاء الاصطناعي ده بالواجهة البرمجية بتاعت ChatGPT عشان يقدر سيستم الـAI بتاع جون يبقى قادر يبني جمل وعبارات ويتكلم بشكل أقرب للطبيعي وبأسلوب جوبز..

بعد كدا ربط السيستم كلو بفيسبوك ماسنجر.. والنتيجة طلعت مخيفة!

جون نزل فيديوهين على تويتر بيوضح فيهم انه ازاي بيكتب أسئلة في الماسنجر للروبوت بتاعه، واللي بدوره بيبدأ يرد على الأسئلة بفويس نوتس متسجلة بصوت .. النسخة الرقمية من ستيف جوبز 🔥

مؤسس ومدير نيفيديا: أقدر أدير الشركة لمدة 30 أو 40 سنة من خلال روبوت ذكي!

طبعا دي كان إجابة فيها مبالغة حبتين قالها جينسين هوانج، اللي أسس شركة نيفيديا وبيديرها من 1999 ولحد دلوقتي، لما اتسأل في حوار ليه مع قناة CNBC لحد امتى هيفضل مدير الشركة، وقال برضو انه شايف انه يقدر لسا يدير الشركة بنفسه شخصيا لمدة 30 سنة كمان - جينسين 60 سنة انهاردة - وبعدها بيفكر انه يقدر يديرها من خلال روبوت لمدة 30 أو 40 سنة كمان.. المرعب ان لا جينسين ولا المذيعة ضحكوا.. بيتكلم جد؟👀

أحب أقولك وأفكرك ان في 2021 مؤتمر نيفيديا السنوي للمطورين GTC 2021 اتعمل بالكامل من أوله لآخره كلو بالكامل ع الآخر "تزييف عميق Deepfake"، ووقتها المؤتمر لما اتعرض كان كلو فيديوكونفرانس مش لايف وظهر فيه "جينسين" في بيته ومطبخه وبيتحرك وبتاع.. وكل ده طلع بلح ومعمول ديب فيك والعالم كلو فتح بوقه ع الآخر.. فلما يقول هيدير الشركة بروبوت هصدقه عادي 😅

اتفرج ع الفيديو فوق 👆 من الدقيقة 23:05 👆

خلصت النشرة😎

🏮كل سنة وانتو طيبين.. رمضان كريم علينا جميعا 🏮

تقدر ترجع لأرشيف النشرة من هنا في أي وقت عشان تشوف كل الأعداد السابقة لو فاتك منها حاجة وكمان هنبسط جدا لو قدرت تعمل شير عشان أكتر ناس يقدروا يستفيدوا من نشرة تكنولوبيا🙏🌹