نشرة تكنولوبيا #8 - ايفون 2023.. نقلة جديدة ولا تحديث تقليدي؟ 🤔🍎

بواسطة محمد عادل • #العدد 8 • عرض في المتصفح

تقريبا من قبل ما ينزل الآيفون 14 السنة اللي فاتت، وانا بتابع تسريبات الآيفون 15 وازاي ان أبل في 2023 هتخربها بعيلة موبايلاتها الجديدة، لإن الآيفون 14 ده كانت نازلة في سنة التحديث، انما السنة دي المفروض دي سنة التجديد الجذري بقى، عشان كدا في التحليل العميق انهاردة هكلمك شوية عن مزايا وإمكانيات العيلة الجاية من موبايلات الآيفون وفقا لأحدث التسريبات والتقارير..برضو صفحتنا الأخيرة انهاردة مختلفة ودسمة جدا، وغالبا هتحبها ع الآخر لأنها مليانة أخبار جديدة ومختلفة ومتنوعة هتموتك من الضحك وكمان منها برضو اللي هيخليك تفتح بوقك ع الآخر من كتر الاندهاش..يلا بينا بقى نقرا جديد أهم الأخبار في السطور الجاية دي 👇

الصفحة الأولى

مايكروسوفت من 2019 واقفة في ضهر شركة OpenAI وحاطة مليارات كاش ع الترابيزة، بس لما جت المنافسة.. قالت نفسي نفسي!

تقرير جديد نشره موقع The Information أكد إن بتوع المبيعات في مايكروسوفت لما بينزلوا لأي شركة عشان يسوقوا إمكانيات وقدرات أنظمة OpenAI بيتكلموا زي الفل عنها لحد ما بيجوا عن الدفع.. بيبدأوا يتكلموا عن مايكروسوفت ومنتجاتها أحسن من OpenAI!

اتلخبطت؟! هفهمك واحدة واحدة..

مايكروسوفت لما استثمرت في OpenAI مليار دولار في 2019، وبعدها أعلنت 10 مليار دولار أول السنة دي لسنين قدام، الاستثمار ده بيديها الحق انها تبيع تراخيص Licenses لخدمات "أوبن إيه آي" بنفس أسعارها العادية، وكمان من حق OpenAI انها تتعاون وتقدم خدماتها لأي شركات تانية وكمان تنزل خدمات ومنتجات للمستخدمين، بس مايكروسوفت ليها نسبة من أي أرباح بتجيلها من الخدمات دي.. ومن حق الاتنين ينزلوا خدمات على كيفهم بعيد عن بعض بس بنفس التقنيات عادي جدا.. الفكرة كلها ان مايكروسوفت بس هي واخد الحق الحصري لتدريب أنظمة OpenAI للذكاء الاصطناعي على خوادمها الضخمة لخدمتها السحابية Azure..

مايكروسوفت وأوبن إيه آي

فآي نعم احنا شركاء في الأبحاث والتطوير، بس عادي نتنافس مش عيب، وده بظبط اللي عمله السيلز بتوع مايكروسوفت، انهم يقنعوا الشركات تشترك في خدمات Azure عشان يستفيدوا من تقنيات OpenAI بدل ما يشتركوا مع OpenAI مباشرة!

ودي حاجة انا قولتها من أول يوم مايكروسوفت نزلت فيه خدمات بينج شات المبنية على ChatGPT، ان مايكروسوفت هتنافس OpenAI رغم انها دافعة فيها مليارات عادي!

بمناسبة بينج، إحصائية جديدة نشرتها مؤسسة SimilarWeb بتأكد، إن سيرش بينج زادت نسبة استخدامه من ساعة ما نزلت ميزة "بينج شات" بمعدل 15%، في حين إن استخدام جوجل سيرش قل بنسبة 1%، كما أبلكيشن بينج تضاعفت معدلات تحميله 8 مرات من فبراير لحد 20 مارس، بينما تحميلات أبلكيشن جوجل انخفضت بنسبة !!

انستجرام نزلت نوعين إعلانات جداد!

أول نوع إعلانات تقليدي جدا، وهو إعلانات السيرش، فلما تعمل بحث على أي حاجة خلال الشهور الجاية جوا انستجرام، ممكن جدا تلاقي بوست طويل عريض مكتوب عليه Sponsored، وده سواء بتعمل سيرش على شركة أو شخص أو موضوع!

إعلان في نتايج السيرش

النوع التاني بقى ده عبقري واسمه Reminder Ads وده عبارة عن 3 نوتفكيشنز بيظبطها المعلن عشان توصل للجمهور المستهدف، وعادة بيبقى الهدف انه يتم تذكير المستخدم بإيفنت أو حدث أو تاريخ مهم يحصل فيه مثلا تخفيضات، أول نوتفكيشن بيحصل قبلها بيوم، والتاني بيحصل قبل الايفنت بربع ساعة والتالت بيبقى في لحظة حدوث الايفنت!

إعلان في صورة نوتفكيشنز تذكيرات

اليومين اللي فاتوا ظهرت ثغرة جديدة خطيرة جدا بتضرب موبايلات بيكسل وكمبيوترات ويندوز 11 في مقتل!

الثغرة اسمها Acropalypse ودي اكتشفها باحث اسمه Simon Aarons والثغرة دي كل فكرتها انك لما بتعمل Crop أو بتقص جزء من سكرين شوت، فالثغرة دي بتخليك تقدر تسترجع الصورة الأصلية اللي اتقصت بسبب وجود داتا مرمية في فايل الصورة النهائية بعد قصها والداتا دي من بقايا الصورة الأصلية واللي ممكن جدا استرجاعها!

ثغرة Acropalypse

الثغرة دي موجودة في أبلكيشن تحرير وتعديل السكرين شوتس على موبايلات جوجل بيكسل من 4 سنين (يعني كل السكرين شوتس على موبايلات بيكسل من 2019 معرضة انها تتجاب ويتم استرجاع اصلها)، وجوجل سدت الثغرة في تحديث نزل في أول مارس الحالي!

بعد ما خرجت التقارير بتتكلم عن الثغرة دي، فيه مستخدم فضوله قتله انه يجرب يشوف هل أداة السكرين شوتس Snipping Tool على ويندوز 11 فيها نفس المشكلة ولا ايه؟! وطلعت نفس المشكلة بالمللي.. بس مايكروسوفت لسا مصحيتش من النوم وأكيد هتنزل أبديت قريب يحلها.

آيفون 14 بلس أشهر من آيفون 13 ميني!

السنة اللي فاتت أبل اتخلت عن فكرة نزول ايفون 14 ميني بعد ايفون 13 ميني اثبت فشل ذريع، ونزلت مكانه ايفون 14 بلس وواضح القرار كان صح، تقرير جديد من شركة DSCC لبحوث الشاشات المتطورة اكتشفت ان الاقبال على 14 بلس كان أكبر من 13 ميني وده بناءا على معدل الطلب على الشاشات بتاعت الاتنين، فشاشة آيفون 14 بلس كانت مبيعاتها أعلى بـ 59% من آيفون 13 ميني خلال سنة كاملة!

آيفون 14 بلس

آيفون 13 ميني

تحديث iOS 16.4 هيخلي المكالمات أوضح وأنقى!

أبل من فترة نزلت ميزة Voice Isolation لمكالمات فيس تايم بحيث يبقى كل الدوشة اللي حواليك معزولة وصوتك بس الواضح وتمام التمام، بس واضح ان أبل هتنزل الميزة دي كمان للمكالمات الصوتية العادية مع iOS 16.4!

ميزة Voice Isolation جاية للمكالمات الصوتية مع iOS 16.4

عشان تشغل الميزة، وانت في المكالمة، روح وافتح Control Center ودوس على Mic Mode واختار Voice Isolation

وهوباااا يبدأ السحر!

شركة Ubisoft بتستخدم أداة اسمها GhostWriter عشان تكتب الحوار بين الشخصيات في الجيمز!

نفس فكرة ChatGPT بظبط، ذكاء اصطناعي بس المرة دي تسهيل على المطورين بقى في شغلهم وهم بيعملوا كونتنت الجيمز!

Ubisoft is Developing an AI Ghostwriter to Save Scriptwriters Time - YouTube

منصة GitHub البرمجية نزلت تحديث جديد عشان تسهل على المبرمجين ينجزوا البرمجة بذكاء اصطناعي!

التحديث الجديد اللي جاي للمنصة – المملوكة لمايكروسوفت – هيخلي المطورين يقدورا يتفاعلوا مع المساعد الذكي CoPilot سواء من خلال كتابة الأسئلة بالكيبورد أو توجيه الأسئلة بالصوت، وبكدا الكوبايلوت يقدر يساعد المطور انه يكتب عنه الكود الأولي وبعدها يراجع المطور ويعدل أو كمان يساعده انه يلاقي أي ثغرات في الكود أو يفهمه أصلا هو الكود ده بتاعه ايه وهيعمل ايه بيه!

مزايا جديدة جاية لمساعد Copilot في GitHub

المزايا الجديدة هتتوفر في قايمة جانبية في تطبيقات Visual Studio وقريب كمان هتبقى موجودة جوا مساحة كتابة الأكواد نفسها، فالمساعد كوبايلوت يبقى بيكتب مع الديفيلوبر في مكان واحد وميحتاجش يروح للقايمة الجانبية أصلا!

ون بلس شغالة على إصدار جديد من موبايلها OnePlus 11 هيستخدم مادة لأول مرة في تاريخ الموبايلات!

مدير ون بلس شيّر على شبكة ويبو الصينية صورة لموبايل ون بلس 11 وضهره تحسه... رخام!

الصورة اللي نشرها مدير ون بلس

بعض المستخدمين والمدونين التقنيين قالوا ان ممكن جدا تبقى المادة هي الرخام لانها هتحافظ على الجهاز بارد وتسهل تبريده وتخلصه من الحرارة وكمان هيبقى مريح جدا في الاستخدام في الايد.. وهنشوف برضو.

أوبرا آخر البراوزرات اللي هينزل بـ ChatGPT!!

بصراحة أوبرا عملتها بمعلمة عالية اوي، مبدئيا كدا نزلت ميزة اسمها AI Prompt ودي ياسيدي عبارة عن زرار تدوس عليه في البراوزر يظهرلك مجموعة من الأوامر اللي كلها شغالة بالذكاء الاصطناعي، زي انك تشير موقع معين في تويتة مكتوبة بأسلوب حد مشهور، أو تطلب انه يتشرحلك محتوى الصفحة اللي انت واقف فيها أو تطلب تلخيصه أو كمان تطلب انه يظهرلك محتوى أكتر بنفس ستايل وموضوع محتوى صفحة الويب اللي انت فيها..

Opera introduces AI Prompts & GPT-based services in sidebar - YouTube

أوبرا معتمدة هنا على الاتنين ChatGPT وChatSonic، موجودين ي الزرار ده، وكمان موجودين برضو في قايمة جانبية بحيث تقدر تشات معاهم وتسألهم بالطريقة التقليدية!

التحليل العميق

حبيت ادخلك معايا في دوامة تسريبات وتوقعات الايفون 15 اللي جاي السنة دي عشان يقدم أخيرا حاجة جديدة لعشاق موبايلات أبل، واللي أنا شايف انها السنة دي فرصة متتفوتش ليها عشان تجدد ثقة جمهورها في موبايلاتها..

البداية مع أسامي الإصدارات:

ايفون 15 - ايفون 15 بلس - ايفون 15 برو - ايفون 15 برو ماكس أو ايفون 15 ألترا

تصميم شاشة الموبايل:

السنة دي متوقع جدا أبل تعمم تصميم الـDynamic Island على كل إصدارات ايفون 15 على عكس ايفون 14 اللي نزلت التصميم الجديد في إصدارات ايفون 14 برو وايفون 14 برو ماكس فقط..

متوقع ان تصميم Dynamic Island هيوصل لكل إصدارات موبايل ايفون 15 السنة دي

بس برضو أبل منتظر انها تخلي مزايا تقيلة زي شاشة الـAlways-On وكذلك ميزة معدل تحديث عرض الشاشة الديناميكي ProMotion مزايا حصرية فقط للإصدارات البرو..

الشاشة السنة دي متوقع انها تقدم ميزة تدخل الموبايلات دي التاريخ كأنحف حواف حوالين شاشة موبايل في تاريخ السوق، حاليا موبايل شاومي 13 هو صاحب أنحف حواف في العالم بسُمك 1.81 مللي وبيقدم نسبة امتداد الشاشة لهيكل الموبايل حوالي 93.3%!!

موبايل شاومي 13

التوقعات بقى ياسيدي بتقولك ان ايفون 15 هينزل بسُمك حواف 1.55 مللي، وده هيخلي موبايلات أبل الجديد تقدم معدل امتداد شاشة مقارنة بهيكلها يعتبر هو الأعلى في السوق على الاطلاق!

صورة مسربة لشاشات ايفون 15

أحب أقولك شاشات الموبايلات الجديدة من أبل ايفون 2023 متوقع جدا انها تنزل بميزة جديدة لتوفير استهلاكها للطاقة حتى مع زيادة درجة سطوع الشاشة، متوقع ان ابل تستخدم في الموضوع ده هيخلي ايفون 15 ينافس سامسونج، اللي استخدمت تقنيات تصنيع توفر طاقة مع شاشات جلاكسي S23 ألترا وجلاكسي S22 بلس واللي خلت الأولاني يقدر يستهلك طاقة أقل بمعدل 600 مللي وات من البطارية مقارنة بايفون 14 برو ماكس لما تتظبط درجة سطوع شاشة الاتنين على 1150 درجة سطوع!

نيجي بقى للتصميم:

مش هيكون في تغيير ضخم في تصميم إصدارات ايفون 15 الأربعة، بس يمكن تصميم الزراير في موبايلات ايفون 15 برو وايفون 15 برو ماكس هيبقى الأهم والأوضح، لان الزراير في الموبايلين دول مش هيبقوا زراير ميكانيكية كعادة زراير الايفون من اول ما نزل في 2007، وإنما أبل السنة دي هتتجه أكتر ناحية الزراير الثابتة State Solid Buttons واللي لما تيجي تدوس عليها مش هتحس انك بتدوس زي زمان والزرار يطلع وينزل تحت صباعك، وانما هتحس بس باهتزاز Vibration فقط وده هيعتمد على محركين اهتزاز Taptic Engines..

تصميم متوقع لزراير التحكم في الصوت وكتم الأصوات في ايفون 15 برو

ضيف لكدا ان زراير التحكم في الصوت مش هيبقوا زرارين واحد لرفع الصوت والتاني لخفضه، وانما هيبقوا زرار واحد طويل، وكمان زرار قفل الأصوات تماما Mute Button مش هيكون متحرك slider وانما هيكون زرار ضغط..

كمان متوقع ان ايفون 15 وايفون 15 بلس يوصلوا بألوان جديدة زي الأزرق الفاتح والبينك!

ألوان جديدة لايفون 15 وايفون 15 بلس

أبل برضو احتمال كبير تميز ايفون 15 برو وايفون 15 برو ماكس بإطار ألومنيوم ووش وضهر ازاز، وكمان الازاز هيبقى واخد كيرف من الحواف من ناحية الشاشة والضهر بحيث تختفي الكيرفات جوا الحواف!

تصميم تخيلي لقالب ايفون 15 برو

متوقع جدا ان كل الاصدارات الاربعة لايفون 15 ينزلوا بفتحة شحن ونقل داتا USB-C.. أخيرا! 🔥

الـ USB-C العظيمة متوقع توصل مع ايفون 15!

على مستوى الكاميرات 📷📱:

غالبا كدا مفيش أي جديد في التصوير، إلا على مستوى ايفون 15 برو ماكس انه هتوصله عدسة جديدة تماما مخصوص للزووووم وهتبقى بتقنية المخروط Periscope Lens واللي فيه كلام انها تسمح للإصدار الرائد من ايفون 2023 انه يقدم ضعف مستويات التكبير البصري الحالية، فبدل الـ3 مستويات مع ايفون 14 برو ماكس، الايفون 15 برو ماكس متوقع يقدم 6 مستويات تكبير بصري!

⚡البروسيسور والأداء بقى⚡:

أبل في موبايلاتها الجديدة ايفون 15 برو وايفون 15 برو ماكس هتنزل معالجها الجديد A17، واللي متوقع يكون من تصنيع التايوانية TSMC بتقنية 3 نانومتر وهيقدم أداء أعلى 10% إلى 15% من A16 Bionic وكمان هيقلل استهلاك البطارية بنسبة 35%!!

أما الايفون 15 وايفون 15 بلس هيستمروا في استخدام A16 Bionic بتاع ايفون 14 برو و14 برو ماكس من السنة اللي فاتت..

نفس الرامات القديمة 6 جيجابايت مكملة معانا في الايفون 15 برضو، وكذلك أبل مكملة في استخدام مودم كوالكوم X70، لإن على أفضل تقدير أبل على 2024 هتقدر تبدأ تستخدم شرايح المودم الخاصة بيها اللي هتصممها بنفسها!

الأخيرة

5 قنوات تلفزيون وشوية جرايد في الاكوادور كلهم جالهم فلاشات ع الشغل.. الفلاشات طلعت بتفرقع!

البوليس الاكوادوري وهو بيتعامل مع فلاشة متفجرة!

أنت متخيل ان بعد التحليل اكتشفوا ان الفلاشات فيها مادة RDX اللي بتدخل في تكوين قنابل بلاستيكية خطيرة جدا زي الـC4!

حبيبة إيلون ماسك القديمة Grimes جالها هدية خوذة للتحكم في الكمبيوتر بالإشارات الدماغية من شركة Neurosity المنافسة لنيورالينك بتاعت ماسك!

جريمز ع اليمين

جريمز هي اللي عملت أوردر بيها والخوذة اسمها The Crown وطالبة لونها أبيض بالكامل!

دي خوذة The Crown

اللطيف ان واحد كان منزل فيديو على تويتر بيظهر فيها ازاي استخدم الخوذة دي في انه.. يتحكم في عربية تيسلا!!

شوف الفيديو

تقرير جديد بيأكد ان أبل وتويتر بدأوا الاتنين يسجلوا حضور وانصراف الموظفين ببصمة الكارت بتاعهم عشان يحسبولهم ساعات الشيفتات معادش فيه شغل من البيت تاني!

بادجات موظفين أبل

تعرف ان فيه شركة بريطانية اسمها Deep Green بتعمل سيرفرات بقدرات عالية جدا وفي نفس الوقت أحجام صغيرة، لدرجة انها ممكن تتحط في حمامات السباحة، بحيث يتم الاستفادة من السيرفرات في تدفئة حمامات السباحة عن طريق الحرارة اللي بتطلع منها، وكمان في نفس الوقت يتم استخدام مياه حمامات السباحة كوسيلة لتبريد السرفرات..

تقريبا كدا حمام السباحة ممكن يوفر سنويا 24 ألف دولار في بند التدفئة لو استخدم الفكرة دي!

حجم سيرفر Deep Green

من يومين شركة Unreal - المملوكة لعملاق الجيمز Epic - نزلت تقنية اسمها MetaHuman Animator وده ياسيدي سيستم جرافيكس بيلقط داتا عن حركات الوجوه عشان يصمم أفاتارات بهيئة بشرية بدقة عالية جدا.. من مجرد فيديو متصور بآيفون!!

MetaHuman - Real-Time Facial Model Animation Demo | State of Unreal 2023 - YouTube

الدنيا مطرت جامد في سان فرانسيسكو من يومين والجو كان وحش، والدنيا زحلقة وزحمة، قامت عربيتين تاكسي قيادة ذاتية تبع شركة Cruise عطلوا خالص وكاميراتهم مبقتش شايفة حاجة ومشيوا دخلوا في مناطق غلط اصلا مش مسموح المشي فيها بالعربيات ووقفوا الدنيا أكتر وأكتر 😅🤖🚗