نشرة تكنولوبيا العدد #2 - ازاي فلاتر تيك توك الجديدة حقيقية كدا؟! 😱

الصفحة الرئيسية

كالعادة الأسبوع كان دسم جدا بالأخبار الجديدة في سوق التكنولوجيا، براوزرات الانترنت كان فيها ضرب نار 🔥 جوجل وموزيلا الاتنين بيجربوا يخرجوا عن طوع أبل، وBrave بيحاول ينافس 👊 قدام بينج شات ومايكروسوفت ايدج، على الناحيه التانية ChatGPT كان عامل قلق ⚡ ، سناب شات استخدمه عشان ينزل مساعد شخصي My AI 🤖 ومؤسس لينكد إن والسوري مصطفى سليمان بيحاولوا يطوروا منافس ليه وكالعادة تويتر 🐦 عاملة  قلق، فتقرير جديد بيأكد إن منصة التويتات باقية على جوجل أكتر من أمازون.. يلا بينا ندخل على التفاصيل..

أبل مسيطرة بشكل كبير على سوق البراوزرات على موبايلات الآيفون ودايما بتفرض على كل مطوري البراوزرات إنهم يستخدموا محركها البرمجي WebKit واللي بيخلي كل البروزرات على الايفون واخدة نفس الشكل وبتقدم نفس المزايا اللي بيقدمها سفاري وبكده هي بتقتل المنافسة بشكل كامل..

بس السنة اللي فاتت كان في دعاوى قضائية مرفوعة ضد أبل في الاتحاد الأوروبي و أمريكا وبريطانيا بتتهمها إنها بتحتكر سوق تصفح الانترنت على موبايلات الايفون وعشان كده بدأت جوجل و موزيلا يشتغلوا على متصفحات تجريبية بتستخدم محركات برمجيه خاصه بيهم..

على مستوى جوجل، مطورين الشركة بدأوا يستخدموا محركها الخاص Blink واللي بيستخدمه جوجل كروم ومعظم البراوزرات اللي شغاله على كروميوم حتى كمان إن المصممين والمطورين في جوجل قدروا يبنوا نموذج تجريبي اولي للبراوزر دي 👇 الصور بتاعته سواء من الموبايل او من الكمبيوتر

أما المطورين في موزيلا فبدأوا هم كمان يعملوا براوزر جديد تماما بيستخدم المحرك الخاص بفايرفوكس واللي اسمه Gecko ..

وبكدا جوجل وموزيلا يبقوا جاهزين ببراوزرات جديدة، لو اتحكم على أبل تكسر احتكارها!

مكملين برده في سوق البراوزرات بس المرة دي هنتكلم عن Brave ، واللي قدر إنه ينزل ميزة جديدة اسمها Summarize ودي بالظبط عاملة شبه بينج شات بتاع مايكروسوفت، فلما تيجي تكتب سؤال أو تعمل سيرش جوه محرك البحث برايف سيرش، هيبدأ محرك البحث يجمع لك المعلومات والاجابات من مصادر مختلفة ويلخصها لك ويعرضها لك في صورة إجابه منظمة مباشرة تحت مستطيل البحث وفوق نتائج البحث وهيبقى مكتوب تحتها المصادر اللي اتجمعت منها المعلومات دي..

الميزة الجديدة بتساهم كمان في إن نتائج البحث العادية هتتعرض بشكل منظم أكتر، بحيث يتعرض لينك الموقع وتحته هيتعرض المعلومة اللي جوه الصفحة دي وبتجاوب على سؤال المستخدم اللي في السيرش!

برايف قال انه مش معتمد في تقديم الميزة الجديدة على شات جي بي تي ولا على التقنية اللي شغال بيها أصلا وانما هو معتمد على 3 نماذج لغويةLLM خاصة بيه.

نيجي بقى لآخر تطورات ChatGPT، منصة سناب شات الاجتماعية نزلت خدمة جديدة اسمها My AI، وزي ما الاسم بيقول، ده مساعد ذكي هيساعدك ان أنت تقدر تكتب وتطلب مقترحات لحاجات كتير، الأحلى كمان انك ممكن تسمي مساعدك الشخص ده اي اسم أنت عايزه..

الخدمة الجديدة مش متاحة لعموم المستخدمين، لإنها متاحة بس للمشتركين في خدمة سناب شات بلس المدفوعة..

أحلى حاجة في سناب شات إنه مافردش عضلاته وقال انها خدمة مبتغلطش وجامدة جدا، بالعكس الشبكة الاجتماعية اعترفت في بيانها الرسمي بإن الخدمه الجديدة زيها زي أي روبوت برمجي جديد مُعرض إلى إنه يهلوس بهلاوس الذكاء الاصطناعي، عشان كده سناب شات بتقول لك احنا اسفين مقدما!

بس واضح إن ChatGPT جايله كمان منافس جديد، والمرة دي من شركة جديدة متأسسة تقريبا بقالها سنة شغالة واسمها Inflection وبتستعد حاليا انها تاخذ استثمارات بقيمة 675 مليون دولار!!

إنفلكشن واقف وراها اتنين من أتقل الناس اللي في سوق التكنولوجيا العالمي وهم مؤسس لينكد إن ريد هوفمان ومصطفى سليمان سوري الجنسية واللي كان أحد مؤسسي شركة DeepMind  اللي بتعتبر الدراع البحثي لجوجل في سوق تكنولوجيا الذكاء الاصطناعي!

انفلكشن بتحاول انها تقدم مجموعة من الروبوتات البرمجية الذكية اللي المستخدمين هيعتمدوا عليها في وقت قريب في عمليات البحث أون لاين وحجز الفنادق والطيران وكمان التعامل مع الانترنت بشكل عام ويمكن هو ده اللي سليمان شايف انه هيكون مستقبل الروبوتات الشات اللي هتغير طبيعة تعاملنا مع البيانات اون لاين!

معلومه على الهامش كده تبين لك قد ايه السوق هيتغير خلال الفترة اللي جاية، ريد هوفمان كان ضمن مجلس إدارة شركة OpenAI اللي هي مطورة ChatGPT وده لحد يوم الجمعة اللي فاتت، لما أعلن استقالته بشكل رسمي من مجلس إدارة الشركة وقال إن قراره ده نابع من رغبته في إنه يركز أكتر على الاستثمار في الشركات الناشئة اللي بتستخدم تقنيات OpenAI وتقنيات أي شركات تانية ليها علاقة بالذكاء الاصطناعي المُنتج للمحتوى  Generative artificial intelligence!

يلا بينا نطير على قلعة إيلون ماسك، تقرير جديد بيأكد إن تويتر من أول ما مسكها ماسك بعد استحواذه على المنصة في نوفمبر اللي فات كانت حريصة جدا على شراكتها وعلاقتها مع شركة جوجل لدرجة إنها لما فكرت توفر في المصاريف وطبعا دي السياسة المفضلة عند الملياردير، الشركة فكرت تفاصل في قيمة العقد –اللي مدته 5 سنين - اللي بينظم استخدام تويتر لسيرفرات جوجل كلاود واللي بتوصل لمليار دولار، بس وقتها إدارة جوجل بصنعة لطافة كدا فهمت ماسك وإدارة تويتر الحالية إن تقليل العقد مش في مصلحة أي حد لا في مصلحه المنصة ولا في مصلحة جوجل، عشان كده ماسك بيدفع المليار وهو مبسوط وساكت ولكن لما تيجي تقارن الموقف ده بوضع تويتر مع أمازون هتضرب كف على كف..

أول فبراير اللي فات أمازون بلغت تويتر بشكل رسمي انها بتفكر فعليا توقف كل حملاتها الاعلانيه على المنصه الاجتماعية، واللي تُقدر بحوالي مليون دولار، والسبب في كده هو التاخير المتعمد من جانب تويتر في دفع قيمة العقد – اللي مدته 5 سنين ونص - بتاع استخدامها لسيرفرات الخدمات امازون السحابيه واللي قيمته تقريبا نص عقد جوجل.. يادوب 510 مليون دولار!

التحليل العميق

تيك توك الأسابيع اللي فاتت وصل لمرحلة مع فلاتر التصوير.. ترعب 😱 أنت متفرجتش؟! 👀

لأ تعالى دوس ع الزراير دي واتفرج👇.. وأوعدك، هتتفااااجئ! 😲

بص شوية الفيديوهات اللي فوق دي عن فلتر اسمه Bold Glamour ودي فلتر جديد منزلاه تيك توك بيخلي حرفيا أي سيدة تتحول بقدرة قادر إلى وش حاطط ميكب كامل، بكل مشتملاته (متحرجنيش عشان فيه حاجات كتير في البتاع ده مبعرفش أساميها ففضلت أكتب ميكب كامل أسهل 😅) على الرغم ان وشهم الحقيقي مفيهوش نقطة بوية!

الفلتر التاني بقى أفظع بمراحل وهو الـ Teenager Look وده بيخلي ملامح أي بني آدم ترجع للمراهقة وشنب إعدادي 🤣 اتفرج يا سيدي 👇

ضحكت وسخسخت؟🙄🤔

نتكلم جد بقى 😎 انا كنت بتابع في صمت وبحاول أفهم.. ازاي الفلاتر دي حقيقية أوي كدا؟! طول عمر الفلاتر على أي برنامج لما بتعدي ايديك من على وشك، لازم تقطع تبوظ يحصلها أي حاجة إنما تبقى في حالة من الثبات الرهيب، وخصوصا بتاع الميكب ده مرعب فعلا وواقعي بشكل زيادة عن اللزوم!!

بيني وبينك قولت أرجع لتيك توك نفسهم وأهو ما خاب من استشار، فبعت للمعلمين في تيك توك وسألتهم بشكل والله محدد وصريح: (يا جماعة انتوا ايه التقنيات اللي مستخدمينها في فلاتركم الجديدة؟ هل فيه تقنيات مختلفة عن زمان؟ ازاي الفلاتر الجديدة مش قادرين نميزها عن الشكل الحقيقي للبني آدمين؟ هل انتو عملتوا أبحاث على مدى تأثير فلاتر بالشكل ده على نفسية المستخدمين خصوصا المراهقين وآثارها السلبية على ثقتهم في شكلهم الحقيقي وتقبلهم لحقيقتهم؟).. طبعا قولت بقى دول هيفحموني يعني لإن جالي الرد بعد تقريبا 24 ساعة وكان كالتالي:

"دائما ما نعمل على استكشاف وسائل جديدة لإدخال روح الابتكار والمتعة على مجتمع مستخدمي منصتنا. المؤثرات البصرية المبتكرة تعد أحد أكثر وسائل الترفيه التي يعتمد عليها مستخدمينا للتعبير عن أنفسهم. ولمساعدة صناع المحتوى في تلك المهمة، نقدم دائما مجموعة متنوعة من المؤثرات المبتكرة والفلاتر التي تساعد المستخدمين في خدمة تقديم قصصهم المختلفة وإثرائها. نحن نركز على إنشاء بيئة آمنة وتمثل مختلف فئات المجتمع الدولي وتشجع الجميع على التفاعل وإنشاء المحتوى".

بصراحة أنا قعدت كتير قدام الكام سطر دول وحاولت أخرج بإجابة عن أي سؤال من الـ6 أسئلة بتوعي، مخرجتش إلا خايب الرجا.. ساعتها قولت مفيش فايدة، يلا ندعبس بقى! 🤷🏻‍♂️

اكتشفت ان تيك توك يوم 22 فبراير اللي فات نزلت تحديث مهم جدا لصناع المحتوى خاص بالأدوات اللي بيستخدموها لتصميم الفلاتر والإيفيكتات على فيديوهاتهم وهو Effect House v2.0.0 واللي فيه بقى ميزة جديدة تماما اسمها Generative Effects!

الميزة دي يا سيدي بتقدم دقة كبيرة في تتبع حركات الوجه كلها، زي الضحك Smiling وكمان حركة الشفايف وضمتها Lip Puckering وكمان حركة الحواجب!

فبقى سهل جدا على صناع المحتوى يعملوا فلاتر كتيرة جدا كل المستخدمين يعيشوا بيها في فيديوهاتهم!

برضو كانت من المزايا الجديدة في التحديث حاجة اسمها Look At واللي بتخلي أي جزء من أجزاء الفلتر ممكن تتحرك مع حركة وجهك بدقة عالية، وده كمان بيدي انسيابية وتبان كإنها حقيقية أكتر!

تيك توك على موقعها الرسمي قايلة ان ميزة Generative Effects بتستخدم تقنية اسمها Generative Adversarial Networks أو اختصارا GANs، ودي تقنية تقنيات تعليم الآلة Machine Learning، وبتكون معتمدة على مجموعتين من الخلايا العصبية Neural Networks، كل مجموعة عايزة تفوز، الشبكة الأولى بتحاول تصنع محتوى مش موجود أصلا ولكنه متوفر فيه نفس المزايا والمواصفات اللي كانت متوفرة في الداتا اللي اتدربت عليها وبقدر الامكان عايزة تطلع المحتوى حقيقي (رغم انه مش كدا)، أما الشبكة التانية فبتحاول تفرق بين المحتوى الحقيقي والمحتوى المصنوع (غير الحقيقي) اللي بتعمله الشبكة الأولى، وبتفضل المنافسة مستمرة للأبد وبالتالي تفضل مدى جودة والمظهر "الأقرب للحقيقة" يتطور باستمرار..

لما تيجي تطبق الكلام ده على فلتر Bold Glamour، هتلاقي ان الشبكة الأولى بتحاول تعمل شكل الميكب حقيقي جدا على وجه اللي بتتصور، بينما الشبكة التانية هنا هي زاوية التصوير اللي بتتغير باستمرار مع حركة الكاميرا، فالشبكة الأولى طول الوقت بتحاول انها تحافظ على المظهر الحقيقي للميكب مها اختلفت الزوايا والاضاءة وكمان دخلت عوامل تشتيت تانية زي حركة إيد اللي بتتصور!

من أكتر الحاجات اللي قابلتها وشرحت الموضوع ده هو فيديو صوره Luke Hurd وخبير في واستشاري في تقنيات الواقع المعزز AR بيشتغل مع انستجرام وسناب شات على الفلاتر دي وتقدر تشوف الفيديو في تويتة نشرها لما تدوس ع الزرار ده 👇 وهتلاقي بيقارن بين فكرة الفلاتر القديمة اللي كانت معتمدة على انها بتعمل نسخة رقمية من وجهك بيتطبق عليها الفلتر وصورة وجهك الـ2D تحتها فلما ايدك كانت تعدي كانت بتبوظ الفلتر، مقارنة بالفلاتر الجديدة بتاعت تيك توك!

على أد ما التقنيات دي مبهرة جدا وبتقدم مستويات غير عادية من المصداقية للمحتوى الديجيتال اللي بنتفاعل معاه لدرجة ممكن تخليك تفتكره حقيقي، على أد ما فعلا هي مضرة جدا وبتفصلك تماما عن الواقع.. مفيش أحلى فعلا من خلقة ربنا الحقيقية لينا، لإن لما بنتعود على الحاجات المصطنعة مش هنرضى بحقيقتنا، فيه ناس فعلا اعرفهم مستحيل يتصوروا من غير فلتر، لا يمكن!

دايما خليك واثق في نفسك، وفوكك من أي حد يقولك أنت مش كويس أو أنت وحش أو يذمك بأي شكل، اللي يقولك كدا بتريقة أو استهزاء أو تنمر.. قوله بص لنفسك، كلنا ناقصين والكمال لله وحده!

قلبتهالك دراما؟ تعالى أفرفشك 🥳🍿🍦

الأخيرة

مهندس في تويتر بيقول ان إيلون ماسك لما بيتمشى في مباني الشركة بيبقى معاه على الأقل 2 بودي جاردات 💪🏻

الأنقح بقى انه بيقول انهم بيمشوا وراه حتى وهو داخل.. التواليت 🚽🧻😅🤣

واتساب منزل ميزة جديدة من فترة بس مخدتش حقها أوي وهي ميزة انك لما تسيب أي جروب شات وتهرب منه، مش هيعرف إلا الأدمنز بتوعه فقط، ومش هيتنشر نوتفكيشن تفضحك جوا الجروب زي زمان..

فحضرتك لو ناوي على فراق جروب العيلة وهجرة بغير رجعة، اتكل على الله متخفش، أهم حاجة ميكونش الحاج الوالد هو الأدمن! 😅

أمريكي في غابات ثلجية في ولاية أوريجون قرر يخرج ويقضي اليوم هناك بعربيته، بس للأسف حصل ما لم يتوقعه.. العربية عطلت، ومفيش شبكة في المنطقة! 👀❄🥶

فعمل حاجة غير اعتيادية بالمرة، كتب رسالة SMS فيها اللوكيشن بتاعه على موبايله لحد قريب منه وداس إرسال Send، وربط الموبايل في طيارة درون كانت معاه، وقام مطيرها على ارتفاع عالي لمسافة بعيدة، وهووب ساعتها لقطت شبكة والرسالة وصلت وجت النجدة تنقذه!

يوم 15 مارس اللي جاي، لعبة FIFA 23 هينزل فيها 12 فريق كرة قدم في الدوري الأمريكي.. النسائي! 👩⚽

بالمناسبة، FIFA 23 هي أول نسخة من اللعبة الشهيرة اللي ينزل على غلافها صورة لعيبة كرة ست، وهي اللاعبة Sam Kerr بنادي تشيلسي!

بنت بيل جيتس الكبيرة، جينيفر جيتس، خلفت بنت والحاج بيل بقى جد أخيرا، ونسيبه "جوز بنته" هو نجم الفروسية المصري نائل نصار!

نشرة انهاردة خلصت على كدا

شكرا جدا على وقتك ومتابعتك لنشرة تكنولوبيا

لو عجبتك النشرة، حاول تنشرها على السوشيال ميديا  عشان توصل لأكبر عدد ممكن والكل يستفيد! 😎🚀🔥

♥ يومك جميل ♥