رحلتك الممتعة لتحدي تطوير ذاتك في 6 أشهر ⚡🌅 البريدية - العدد #1

مرحباً أيها المحارب، تصافحك من بين رقصات الحروف دينا الهواري، في هذه النشرة أمنحك بعض الهدوء من ضجيج العالم. (تنمية ذاتية، علم نفس، تطوير مهارات)

لمن يسأل من هي دينا الهواري؟

أنا كاتبة محتوى، مهتمة بعلوم القرآن، والكتابة، وعلم النفس، وتنمية الذات.

عندي مدونة خاصة تقدر تشوفها من هنا، بقدم نشرة دينية بعنوان فسيلة بالمشاركة مع صديقتي ندى حجيج، لو مهتم يسعدنا وجودك معانا، وعضوة في مجتمع رديف لنخبة الكُتاب

هذا العدد سيكون بالعامّية المصرية. 

حابة أتكلم معاكم في أول عدد ببساطة ووّد😊

عشان كدا مش هتكلم عني كتير خلينا ندخل في الموضوع 😃

مقدمة

بعد البحث الكتير والتجارب لقينا إن علشان فعلاً تطور من نفسك، مينفعش تنمي جانب على حساب جانب تاني، يعني مثلاً مينفعش تنمي الجانب العملي وتقصر في عبادتك وصحتك، ولا أنك تنمي مهاراتك وتقصر في واجباتك الإجتماعية...

يعني أعمل إيه يا ست دينا ؟

هقولك يا سيدي ، يعني تحاول وتساعد نفسك أنك تنمي كل جوانب حياتك بنسب نمو صغيرة مع الإستمرار (قليل دائم خير من كثير متقطع).

تنظم أنك تعادل بين الجانب الديني والروحاني، والنفسي، والجسدي، والعلمي، والعملي، والإجتماعي. واللي بيسميه علم النفس بالتوازن . 

بالمناسبة في خطتي لتطوير ذاتي سميت عام 2024 عام التوازن، وهدفي منه (عام في طاعة الله وتزكية النفس ومساعدة الغير).

تعالى نشوف إيه هي الخطة اللي دوشتينا بيها. 

الخطة 

أولاً: الجانب الديني والروحاني

1. المحافظة على قراءة أذكار الصباح والمساء كل يوم.
2. الصلاة على أوقاتها، بالإضافة للنوافل.
3. قراءة ورد يومي من القرآن الكريم.
4. تعلم العلم الشرعي اللي هيعينك على معرفة دينك وازاي تعيش دنياك صح.
5. خلي الصدقة عادة.
6. ساعد حد محتاجلك من غير ما يطلب ومتردش سائل.
7. احفظ كل يوم آيتين من القرآن.
8. حافظ على التسبيح والإستغفار.

ثانياً: الجانب النفسي

1. حاول تتعرف على نقاط قوتك ونميها، ونقاط ضعفك وحاول تعالجها من خلال مختص لو مقدرتش تعالجها بنفسك.
2. اكتب افكارك ومشاعرك واتخلص من الضغط النفسي عن طريق تفريغ مشاعرك، في شكل كتابة يوميات.
3. اسمح لنفسك بالتنفس، اتعلم ازاي تتنفس بهدوء في وسط ضغط وزحمة يومك، أتعلم تمرينات التنفس وجربها يومياً هتفرق معاك جداً.
4. مارس التأمل، وامشي لوحدك يوم في الاسبوع، المشي بيساعدك على التخلص من التوتر والقلق.
5. اقرأ الكتب اللي تساعدك على معرفة نفسك، وإزاي تحافظ على حدودك، وتعرف قيمة ذاتك وتقدرها.

ثالثاً: الجانب الجسدي

وهنا هتهتم بصحتك يا بطل من خلال حاجتين الأولى: تتخلص من العادات الغلط اللي بتدمر صحتك على المدى البعيد زي السهر، والأكلات السريعة، ومضاعفة المجهود البدني.

الحاجة التانية: هتبني عادات صحية زي مثلاً:

1. الكشف الدوري كل شهرين.
2. المحافظة على متابعة أدويتك لو الدكتور نصحك بيها.
3. النوم بدري وعدد ساعات كافية 
4. الأكل الصحي، وعمل نظام غذائي للتخلص من الوزن الزائد أو زيادة الوزن للوزن الطبيعي في حالة النحافة. المهم توصل لجسد صحي معافى، لأن جسمك هو السفينة اللي شايلاك لو أختلت لا قدر الله مش هتقدر توصلك لأي مكان.
5. الرياضة يا سيدي أرجوك، عارفة أن ممكن الشتاء يخليك تكسل، بس بالعكس الرياضة بتحسسك بالدفا، مارس تمارين اللياقة البدنية، السباحة أو المشي المهم تتحرك، زي ما بيقولوا في الحركة بركة.

رابعاً: الجانب العلمي وتنمية المهارات

اتكلمنا في الجانب الديني عن ضرورة تعلم العلم الشرعي، وهنا بكرر لأن كل الجوانب مرتبطة ببعضها، غير كدا:

1. حدد مجال معين جديد عليك، وقرر تستثمر جزء من وقتك في تعلمه.
2. حدد مهارتين مدة تعلم كل مهارة 3 شهور مع تطبيق كل مهارة طبعاً.
3. خلي القراءة عادة يومية زي الكتابة، وممكن تلخص اللي قرآته في شكل بوستات أو مقالات تنفع بيها غيرك وتبقى ضربت عصفورين بجحر واحد. ( إن شاء الله هقترح عليك كتاب كل أسبوع هيساعدك تتعرف على نفسك، أو تنمي مهارة.

خامساً: الجانب العملي

إذا كنت موظف أو صاحب عمل حر

1. لازم تطور مهارات التواصل واللي هتساعدك في التعامل مع مديرينك وزملائك لو كنت موظف، أو هتساعدك مع عملائك وجمهورك لو أنت صاحب عمل حر.
2. اعمل خطة لعملك بأهداف واقعية ومرنة ومحددة.

مثلاً: لكاتب المحتوى 

شهر يناير 

محتاج انشر 28 مقال في الشهر، كل أسبوع 7 مقالات 

الاسبوع الاول : عن أهمية القراءة 

الأسبوع الثاني : عن المهارات الناعمة

الأسبوع الثالث: عن التسويق بالمحتوى

الأسبوع الرابع: عن أهمية التواصل في الحياة الاجتماعية والعملية.

كدا أنا خطتي واضحة ومحددة وواقعية ، ومرنة ممكن استبدل عناوين الاسابيع وغيرها.صورة 

سادساً: الجانب الاجتماعي 

ودا جانب مهم جداً، أنا نفسي محتاجة أطوره، وليه أولوية عندي العام دا إن شاء الله .

طيب ممكن أعمل إيه :

1. هحافظ على وقت لأسرتي الصغيرة لأزم أكون متواجد معاهم بشكل منتظم أحسسهم بوجودي، واتونس بوجودهم واحس بنعمة وجودهم قبل فوات الآوان، ربنا يبارك في أعمارهم وأعمارنا، بس الدنيا بتاخدنا ونفضل نأجل، خليك معاهم واتدفى بيهم.
2. ههتم أكتر بصلة الرحم ، من خلال مكالمة أو زيارة ، بالمناسبة الرسائل النصية بتكون خالية من المشاعر، يعني مش هتوصل احساسك ليهم.
3. تطوع في منظمة بجزء من وقتك ولو وقت قليل.
4. اجبر بخاطر حد محتاجلك، أو وجودك بيسعده متبخلش على الناس بمشاركتك.

انتي بقى يا دينا بتضحكي على نفسك ولا علينا، أحنا هنقدر نعمل كل دا في يوم واحد ؟

استنى بس هو أنا مقولتلكش ؟ 

دي معظم الحاجات اللي ممكن تعملها وأنت أختار اللي يناسبك منها على حسب ظروفك ووقتك.

وأنا هعتمد على ضميرك أنك مش هتحسب وقتك بعد ما تقعد ساعتين على التيك توك وساعة على الريلز من غير ما تاخد بالك، عشان كدا هقولك تعمل ايه، هجيبلك الخلاصة يعني عشان ميكنش ليك حجة.

اكتب كدا ورايا عشان تحفز نفسك 

دقائق منتظمة لتغيير حياتك 

يومك فيه 24 ساعة لو قولنا حضرتك موظف يبقى ربنا يعينك ويعننا، هناخد من حضرتك 6 ساعات وعندك 18 ساعة لو قلنا 9 ساعات شغل ومسافة الطريق ، يبقى 6+9=15-24= 9 

منهم 8 ساعات نوم يبقى حضرتك عندك ساعة ترفيه اعمل فيها اللي أنت عايزه، وكدا يبقى انا مقصرتش معاك.

1. نص ساعة أذكار الصباح والمساء.
2. ساعة صلاة فروض ونوافل.
3. نص ساعة قراءة قرآن .
4. نص ساعة قراءة كتاب أو مقالات.
5. نص ساعة كتابة يوميات.
6. ساعة مع الأسرة .
7. نص ساعة مشي.
8. ساعة لتعلم العلم الشرعي.
9. نص ساعة تأمل وعمل تمرينات التنفس.
10. احفظ آيتين بتكرار السمع في المواصلات، أو قبل النوم.

ملاحظات على الخطة

1. الخطة دي مرنة يعني ممكن تختار أولاوياتك منها، تضيف أو تحذف زي ما أنت عايز مع مراعاة التوازن.
2. أنا منستش الجانب الإجتماعي بس مقدرش أحددلك إمتى تعمل إيه بالظبط عشان يومك غير يومي، وبيختلف من شخص للتاني، يعني مثلا ممكن يوم أجازتك يكون وقت ممتاز للنشاط الاجتماعي، حد تاني ممكن يخلي الرياضة يوم بعد يوم ويستغل يوم منهم للزيارات أو الخروج.
3. قراءة نصف ساعة كل يوم ما يقارب من 10 صفحات لو انت بطئ في القراءة يعني في 6 شهور يعني 1800 صفحة يعني 6 كتب لو الكتاب 300 ورقة واكثر لو الكتاب حجمه أقل ، تخيل إيه اللي هيحصل لدماغك وتفكيرك لو عملت كدا.
4. القرآن نفس الموضوع بس هنققل عدد الصفحات عشان هنكون بنقرأ بهدوء، وخشوع..بس خلي ليه الأولوية عشان كل ما ختمته هيديك حافز لباقي المهام.
5. متخليش الروتين يخنقك، استمتع برحلة تغييرك.

تقييم الآداء

هتقيم خطتك كل شهر، وهتشوف قصرت في إيه وحاول تعوض على اد ما تقدر، بس خلي تعديلاتك مرنة، وشد حيلك في اللي جاي.

كافئ نفسك كل شهر لو حققت ٨٠٪ من خطتك، كافئ نفسك عموماً على أي تطور تلمسه في شخصيتك وحياتك، عشان دا هيكون حافز ليك. 

كدا باقي عندي ليك يا سيدي الروابط اللي هتساعدك تنمي جوانب حياتك عشان متقولش دا كلام وخلاص.

روابط معينة على تنفيذ الخطة

العلم الشرعي 

أكاديمية زاد 

مركز آيات 

المهارات والكورسات 

تعلم مهارات الكتابة والعمل الحر مجتمع رديف

ادراك 

النشرات البريدية

خطة حفظ القرآن الكريم

وهنا نكون قدمنا كل حاجة للعدد دا أشوفك على خير في عدد قادم من طاقة نور.

إذا عجبك العدد نورنا بإشتراكك ✅