احنا اللي بنختار العميل ولا هو بيختارنا؟

السؤال ده نزلته على أكتر من منصة علشان أعرف آراء الجمهور قبل ما أشارك معاكم الإجابة التفصيلية. والنتيجة كانت إن 80% رأيهم إن احنا اللي بنختار العميل الأول، وبعدها هو بيختارنا.

وهقولك في نهاية الإيميل رأيي وإجابتي على السؤال ده، بس ركز معايا وجهز مشروبك المفضل علشان الكلام هيكون طويل شوية ☕

في بداية شغلي كفريلانسر:

أخدت قرارات مهمة كانت بمثابة قواعد مش هتخلى عنها مهما كانت المغريات.

أهم القرارات دي كانت:

• مش هشتغل مع عميل من غير اتفاق واضح.
• مش هكتب محتوى كتجربة مجانية.
• ومش هعمل إعلانات إلا لو مقتنع بالخدمة أو المنتج.

القرارات دي، رغم إنها ضيعت عليا عدد عملاء كبير في البداية، لكنها مع الوقت كانت أفضل وسيلة لفلترة العملاء. وده خلاني أشتغل مع العميل المناسب لأفكاري وطريقة شغلي، وأحصل على أفضل نتيجة.

وعلشان توصل للمرحلة دي إنت محتاج تعمل كم خطوة مهمين 

أول خطوة : حدد عميلك المثالي

قبل ما تختار العميل، لازم تكون عارف مين هو العميل المثالي ليك. فكر في الأسئلة دي:

• إيه نوع الأعمال اللي تحب تقدمها؟
• إيه هي ميزانية العميل اللي عايز تشتغل معاه؟
• إيه هي قيم العمل اللي بتهمك وهل العميل ده بيشترك معاك في نفس القيم؟
• إيه الأهداف اللي تساعد عميلك في تحقيقها؟
• إيه الأهداف اللي مش هتساعده يحققها؟
• إيه مستوى توقعات العميل عن خدماتك أو منتجك؟

لما تحدد العميل المثالي، هيكون أسهل ليك تميز العملاء اللي مش مناسبين.

بعد ماتخلص المرحلة دي هيجي ف بالك سؤال مهم 👇

السؤال: إزاي أجذب عميلي المثالي وأعرفه بيا؟

الإجابة باختصار: من خلال المحتوى.محتواك هو أهم أداة عندك لجذب عملائك.

ثاني خطوة : صناعة المحتوى 

ابني استراتيجية محتوى موجهة للعميل المثالي

ابدأ بـ:

1. محتوى توضح فيه خبراتك وتجاربك: شارك نجاحاتك السابقة وحلولك المبتكرة.
2. دراسات حالة: اعرض نتائج مشاريعك السابقة بأرقام وحقائق تثبت قدراتك.
3. محتوى تعليمي: قدم نصائح وأدوات تفيد جمهورك، هيشوفوا فيك خبير يستحق العمل معه.
4. إجابات على أسئلتهم: ساعد جمهورك في حل مشاكلهم.

ثالث خطوة : بناء عرض مقنع ومحدد

بعد ما جذبت عميلك المثالي، انت محتاج تقدمله عرض يخليه يشتري منك بسهولة وبدون تفاوض. دي الخطوات اللي هتساعدك:

1. حدد تخصصك: كن واضحًا في خدماتك اللي بتقدمها.
2. اذكر فوائد خدماتك: أوضح كيف هتعود خدماتك على عميلك المستهدف وكيف ممكن تغير حياته للأفضل.
3. وضح طريقة العمل: اشرح الخطوات من استلام التفاصيل لحين تسليم الشغل.
4. حدد توقعات عميلك: كن واضحًا في المدة الزمنية، النتائج المتوقعة، والتكلفة.
5. سهل التواصل معاك: وضح طرق وأوقات التواصل.

آخر خطوة: اختيار العملاء بدقة

اختر عملاءك بدقة عالية، وكن جادًا في قبول العميل المناسب ورفض العميل غير المناسب. لإنك لو اخترت العميل الخطأ، الخسارة إنت اللي هتتحملها.

قبل ما توافق على أي عميل:

• خد وقتك في التفكير ومراجعة بياناته.
• اطلب منه أمثلة على الشغل المطلوب.
• كن واضحًا في عرضك واتفاقاتك.
• تأكد إنه يتناسب مع معاييرك وتوقعاتك.

بكده، هتقدر تصل لعميلك المثالي اللي هيزود أرباحك ويكون قصة جديدة تضيفها لقصص نجاحك.

الخلاصة:

إنت اللي بتختار العميل لما تكون واعي بنفسك وبقيمك وبتعرف تروّج لنفسك بطريقة فعالة. كلما كانت استراتيجيتك أقوى، كلما كان من الأسهل جذب العملاء اللي يفهموك ويقدروا شغلك. اختار عميلك بذكاء، وهتكون تجربتك مريحة ومثمرة.

ولو عندك أي سؤال، هكون سعيد لو كتبته في تعليق.

أو ابعتلي على الواتساب 

ومتنساش تشارك النشرة مع زمايلك المبدعين علشان تفيدهم.