ليش أطلقت نشرتي البريدية؟

أهلا شرفتنا ونورتنا 👋🏻

أوه جالسة أكتب في مكان مافيه إلهام أبد أبد ولا نقطة إلهام عشان هيك لو طلعت النشرة الأولى مو أوكيه أنا مالي علاقة المكان هو السبب..🏃🏻‍♀️

من زمان ودي أطلق نشرة بريدية أو أسوي مدونة خاصة فيني وأقعد أتفلسف فيها لأن كثير تجي مواضيع ببالي وودي أكتب عنها..

بس إنشغالاتي كثيرة "خفي علينا ياسيدة الأعمال " وأعذاري أكثر عاد تعرفون إذا جيت تبي تبدأ شيء جديد إلا ماتبدع نفسك في إختلاق الأعذار والظروف اللي ماتخلص العجيب هنا إننا نصدق هالنفس بدون مانتأكد حتى من صحة الأعذار من عدمها..

فإذا كنت مؤجل شيء بحجة إنك مشغول أو بحجة الوقت المناسب أنصحك تقوم الحين تسويه " بس لحظة لين تخلص قراءة نشرتي أول " 🏃🏻‍♀️

مثل أي شيء قبل أبدأ فيه لازم أبحث ومن قلب قلبي..فكانت بدايتي هي البحث عن النشرات البريدية وأعرفها عن قرب أكثر وأكثر..

تفاجأت إنو أغلب النشرات لها هدف تسويقي يعني مثلا عندي منتج أو برنامج تدريبي أو أي شيء من هذا القبيل وابدأ أتفلسف في بداية النشرة ثم في الأخير أقول يوه للحين ما أخذت المنتج للحين ما اشتركت في الدورة والكثير من جمل التسويق اللي ماتخلص بس لحظة أنا ماعندي منتج!!! 🥲

ثاني شيء قالوا لازم يكون عندك توجه يعني مثلًا أقعد أكتب لكم عن كتابة المحتوى لين تطفشون مني وتقولون خلاص درينا انك كفو في كتابة المحتوى بس فعلا أنا كفو فيها 🏃🏻‍♀️

اممم طيب أنا ما أحب أكتب عن شيء واحد دايم أطفش🤷🏻‍♀️

طيب لحظة! أنتي ماعندك لا منتج ولا توجه وش هدفك طيب من النشرة اللي تبين خلق الله يشتركون فيها ويقرؤونها؟

قرأت نشرة لواحد أجنبي نسيت اسمه لكن يقول ممكن تبدأ نشرتك ومايكون توجهك واضح ومع الوقت ممكن يتضح توجهك وكلامه الوحيد اللي حمسني المفروض ما أنسى اسمه صراحة 🤷🏻‍♀️

طيب بقول هدفي من النشرة..🙄

بعدما دخلت عالم العمل الحر صرت مشغولة حرفيييا وهنا بدأت أنشغل عن  الكتابة الحرة حرفيا ما صرت أكتب إلا ناااادر جدا وأنا هيفاء اللي كانت كل أسبوع تطلع بكم كبير من المكاتيب الحرة 😪

فكان يجيني تأنيب ضمير وإنو أنا مقصرة في الكتابة وهي الشيء اللي أحبه والمفروض مايكون فيه تقصير لأن شيء وهبك الله إياه حلو تحافظ عليه وتستثمره وتفيد فيه..

أخذتني الكتابة التسويقية والكتابة للعملاء بعييد عن الكتابة الحرة وكنت أحاول في كل مرة أرجع لكن بدون فايدة..

فقلت هيوفي وش رأيك تسوين لك مدونة أو نشرة بريدية وابدأي أطلقي العنان لكلماتك..

مابين الإختيار نشرة ولا مدونة اخترت نشرة ليش؟ مدري بس ممكن يوما ما تكون فيه مدونة ماندري🤷🏻‍♀️

طيب شلون أسوي نشرة ووو رحت للرهيب دائمًا الأستاذ يونس سألته كذا سؤال بخصوص النشرات أعطاني كذا خيار للنشرات ومن ضمنها نشرة هدهد وفعلا حسيت إنها مناسبة لي خصوصا في هالوقت في بداياتي في النشرة …

بعدها نجي لأصعب شيء كان يشغلني اللي هو المحتوى اللي رح أطرحه في هالنشرة هل بيفيد القارئ؟ أو بيكون سرد فارغ مع إنو ما أظن إنو في شيء فارغ لكن وجب الحذر وتنبيه الفكر واليد اللي بيجهزون المحتوى فلازم يكون له معنى يافتاة🥲

طيب وياكثر ما أقول طيب 🤦🏻‍♀️متى رح تُنشر بالعادة؟ كل أصحاب النشرات بالعادة عندهم يوم ووقت محدد للنشر أنتي ايش وضعك؟وضعي طيران 🏃🏻‍♀️امزح امزح، امممم صراحة ما أحب أرتبط بوقت محدد أحس الوقت المحدد بيكون لي مثل القيد وهي أصلًا كتابة حرة بس لحظة ممكن تتمادين في الإهمال والتسويف إذا ماحددتي وقت؟ لحظة يانفسي الحين تبين وش خلاص قلت مافي وقت محدد وقت ماطرى موضوع في بالي بروح ابحث واكتب عنه 🤷🏻‍♀️

خلاص بكيفك عاد😒

طيب تحسين بيكون فيه قُراء كثير للنشرة؟ سألت هالسؤال في تويتر وممكن النسبة قليلة جدا..

لكن مايهم الآن هو أن أكتب شيء يستحق القراءة..

لحظة لحظة أشوف سطر بالعامية وسطر بالفصحى شالعلم؟!أبد لا علم ولا جهل 🏃🏻‍♀️بس النشرة ممكن تكون مرات هيك ومرات هيك..

وش هيك وهيك؟

العامية تكون أقرب للقارئ بس أحب أتفنن بالمفردات الفصيحة يعني نشرة عامية ونشرة فصحى..بس متأكدة إنو أي شيء فيه بصمتي بيكون جميل وجميل جدا " أبوك يالثقة "

طيب جاء في بالك إنو ممكن توقف هالنشرة في يوم من الأيام؟مثل اي شيء بدأ من قبل مثل نشرات مدونات بودكاست وغيرها الكثير اللي وقفت🙂

ايه جاء في بالي هالسؤال كثير ممكن أتعب شهور أو سنوات أو أو وفي الأخير أوقف ايه واااارد..لكن بإذن الله في حال التوقف يكون فيه بديل أفضل أو نقلة أفضل وأقوى أو إنشغال أهم وأعظم..بعدين الحين أنا الحين في البدايات المفروض أكون متحمسة مو أفكر بالنهايات متى وليش..

بس عزيزي القارئ أنت موعود بنشرة بطلة وخارقة ❤️‍🔥❤️‍🔥❤️‍🔥❤️‍🔥❤️‍🔥❤️‍🔥اشترك فيها طيب؟ 🤷🏻‍♀️🙄