رسالة لمستقبلك!

October 19, 2020

"من الغريب أنني أقدم هذه الرسالة بنفسي ولنفسي مستقبلاً ،لكن ولأن الفكرة أعجبتني للغاية فلم أتردد في كتابتها ، وعلى الرغم من عدم تخططي لكتابة الرسالة الّتي سأقدمها الآن ومن المفترض أن تُقدم على أفضل مستوى لكن بسبب تذكري لتلك الفكرة والوقت الّذي أقضيه في الفراغ فستكون هذه الرسالة الأولي الّتي سأكتبها لي."

دي كانت جزء من رسالة كتبتها في سنة 2020 وهي أول رسالة أكتبها بالطريقة دي، وبعيداً عن محتوى الرسالة اللي أغلبه كان يخص حياتي الشخصية فكرة إنك تكتب لنفسك شئ غير مألوف بالمرة ومن الصعب تقنع حد يعمل الحركة دي خوفاً من أن الرسالة ممكن تتقرأ مش شخص تاني، لكن هنا انا هتكلم عن إزاي قدرت أعمل الرسالة دي وأوصلها لنفسي بعد فترة تقعد بالسنة والسنتين وإزاي أنت يا عزيزي القارئ تقدر تعمل خطوة زي كده بكل سهولة!

خلينا في الأول نناقش الفكرة بهدوء لكن ممكن تكون مبهمة عند بعض الناس، الفكرة هنا أن أنت بتكتب رسالة عن طريق الأيميل والإيميل ده بيوصلك بعد فترة أنت بتحددها بنفسك فلو حابب الرسالة توصلك بعد سنة أو سنتين أو 5 سنين عادي طالما أنت عندك الإيميل اللي هيتبعت فيه الرسالة دي، الرسالة بشكل عام أنت لك الحرية في كتابتها لكن الأغلب أن الناس تبكتب عن حياتها ورحلتها بشكل عام بحيث لما توصلهم الرسالة هيفتكروا كل اللي كتبوه في الوقت ده، دي هي الفكرة من غير أي تفاصيل ، التفاصيل اللي هتيجي بقى هي إزاي تقدر تعملها وتكتب أيه من الأساس؟!

ليه تكتب رسالة لنفسك من الأساس؟

أصل فكر فيها ، أنت ليه تعمل حركة زي كده من الأساس ما انت أكيد هتكون فاكر الرسالة اللي كتبتها أو الأحداث اللي أتكلمت عنها مش صح؟ علشان أكون صريح معاك ... لا مش هتكون فاكر أبداً، في البداية أنت تقدر تقول أنك بتستخدمها علشان تعمل تجميعة لكل الأحداث المهمة اللي حصلتلك في السنة وكمان أختراعات وأفكار مختلفة عن أيه اللي هيكون في المستقبل، شئ قد يكون غريب على البعض لكن بمجرد إستلام أول رسالة مستقبلية منك هتتشوق تكتب أكتر وأكتر.

لو قدرنا نجاوب على سؤال ليه أكتب رسالة لنفسي من الأساس فهتكون الإجابة:

• لتذكرك أغلب الأحداث اللي حصلتلك في السنة
• وسيلة للأمتنان لكل العقبات اللي عدت عليك
• حاجة تقدر تخليك تتخيل وممكن تخطط للمستقبل
• تذكرك بأهمية الوقت اللي بتقضيه وإزاي تستغله

ويا عزيزي القارئ أكيد هيكون فيه أكتر من كده بكتير لكن ده مش هيعود للرسالة المستقبلية بل هيعود للتدوين واللي هتكلم عنه بالتفصيل الممل في النشرة فتأكد إنك مشترك لأنك هنا بتشهد رحلتي وتجاربي في مختلف المجالات🥰.

رحلتي مع الرسالة المستقبلية

أنا كنت شبهك بالضبط لما يتعلق الموضوع بالرسالة المستقبلية مكنتش فاهم هو الموضوع يتعمل إزاي من الأساس، لحد ما في يوم لقيت شخص نشر بوست في تويتر عن إزاي قدر يحقق كل كلمة قالها في رسالته المستقبلية وإن كان بيكتب لنفسه كل سنة وبيشوف هل هيقدر يحقق اللي قدر يكتبه فعلاً ، قال وقتها "أنا عملت الحركة دي لأني لما الرسالة توصلي هكون في موقفين ... السعادة من إني حققت اللي أنا عايزه او الزعل والحزن لأني خيبت ظن نفسي وخليتها تكتب الآمال دي على مفيش ... أنا كتبت الرسالة كذكرى ليا ولوقتي إزاي بستخدمه" بس طبعاً الرسالة كانت بالأنجليزي.

بعد ما شفت البوست ده راقت الفكرة ليا وقررت أديلها فرصة ، في الأول كان الموضوع صعب أولاً أنا مش عارف أكتب أيه أو أقول أيه من الأساس وغير كده كنت خايف جداً لأحتمالية أن الإيميل اللي كنت عامل عليه الرسالة يضيع أو حد يشوفها، لكن وبعد فترة بسيطة قلت إن المشاكل دي مشاكل بسيطة ومش معقدة وأقدر أحلها بسرعة، وبالفعل في يوم 18/3 من كل سنة قررت أن اليوم ده هيكون يوم رسالتي المستقبلية واللي فيه هستلم رسالة من نفسي بعد سنة!

كانت أول رسالة أكتبها للإيميل في يوم 13/3/2020 في عز أيام الكورونا ووقتها كنت في سنة تانية فكنت بتكلم عن قد أيه المواد صعبة والكورونا بهدلت البلد وحاجات تانية كتير تخص العيلة والصحاب وانا وكلام كتير بشكل مبعثر تماماً وغير مرتب ، لكن صدقني يا عزيزي المشاهد لما أستلمت الرسالة في نفس اليوم في سنة 2021 كانت على قلبي زي العسل، فعلاً أنا مكنتش مبسوط كده إلا في يوم ما أستلمت الرسالة ، لأني وقتها كنت في تالتة والأمور تطورت تماماً ففكرة إني أقرأ الرسالة اللي كانت بتحكي عن ايام زمان مني أنا شخصياً وبطريقتي أنا كانت رائعة بشكل مش طبيعي !!! ، من وقتها واليوم ده بقى اليوم المقدس اللي أقدر أسترجع فيها أوقات الماضي وذكريات الماضي مني أنا !

إزاي تقدر تكتب الرسالة؟

أظن أن دلوقتي الحماس وصلك إنك تجرب الحركة دي ليك ولو موصلش الحماس فمستغربش الموضوع دايماً بيكون غريب في الأول ، باقي دلوقتي إني أتكلم عن إزاي أقدر أعمل نفس التجربة ليا أنا ، هنا أنت هتحتاج أيميل أساسي بتتعامل بيه دايماً وموقع يقدر يبعتلك الرسالة دي بعد سنة أو أكتر، المقالة بعد كده هتكلم فيها عن الموقع وإزاي تستخدمه في الرسالة بتاعتك 

الموقع يُسمى FutureMe

تعريف عن الموقع

موقع FutureMe هو موقع هدفه الأساسي هو توصيل الأيميل ليك بعد فترة طويلة على حسب مزاجك ، والرسالة تتضمن أي شئ أنت حابه 

الموقع👇

FutureMe: Write a Letter to your Future Self

بعد ما تدخل على الموقع بتسجل بالإيميل اللي هتستلم بيه الرسالة بعد كده وبعد ما تخلص كل إجراءات الضمان اللي بيطلبها هتقدر تكتب الرسالة زي ما أنت حابب، فيه عندهم futureme plus لو حابب تضيف فيديو أو صورة للرسالة بشكل يخلي الرسالة أحسن لكن ده طبعاً بفلوس  فممكن تتعامل مع الموقع لو أنت حابب تكتب الرسالة بس، أنا عن نفسي أشتركت في الموقع لأنه إشتراك السنة عنده ب25 جنيه فكل الميزات اللي تقدر تقدمها دي وبسعر مش عالي كان صفقة حلوة جداً، ومن اللطيف جداً أنهم عملوا تطبيقات تقدر تتعامل فيها مع البرنامج

البرنامج للأندرويد

FutureMe for android

البرنامج للios

‎FutureMe on the App Store

محتوى الرسالة

هنا بقى نوصل للأساس والحجر الأساسي للمقالة دي كلها "إزاي تقدر تقسم كلامك وتستفيد من الأحداث والذكريات بأحسن طريقة ممكنة؟"

خلينا في الأول تفهم أنت محتاج تتكلم عن أيه ، أولاً لو حبينا نقسم الأزمنة اللي تقدر تتكلم عليها فهتكون الماضي والحاضر والمستقبل لكن أنت في الرسالة أنت بس محتاج تكتب عن الحاضر والحاجة اللي أنت عايشها حالاً والمستقبل واللي متوقعه من نفسك أنك توصله لبعدين ، هقدملك هنا أسئلة من خلالها تقدر تكتب بطريقة أحسن لنفسك ومتتوقعش فيها أنك هتسيب حدث معين!

حاضر السنة

عن نفسك

• أتكلم عن الوجه العام للسنة؟
• أصعب تحدي قابلته في السنة دي؟
• أعظم إنتصار قدرت تحققه في السنة دي؟
• شخص فخور إنك عرفته في السنة؟
• شخص تمنيت إنك مقابلتهوش في السنة؟
• هل أنت الآن فخور بالتقدم اللي عملته في السنة؟
• شايف ايه اللي أتغير بشكل جذري في السنة دي عن باقي السنين؟
• أهم تلات أساسيات حاسس دايماً أنك لازم تخلي بالك (مثلاً العائلة أو الصحاب أو الدراسة أوخلافه)
• أحسن حاجة قدرت تعملها من الناحية الإبداعية (كتابة أو تعلم أو تخلص كورس معين؟)
• مدى رضائك عن شغلك في مجالك السنة دي؟
• ايه هو الشعور الغالب على نفسك في اغلب احداث السنة؟
• أوصف حالك في الدين وعلاقتك بربنا الفترة دي؟

عن السنة

• أهم الأحداث في السنة؟
• أحسن حدث فرحك في السنة دي؟
• أسؤأ حدث حصلك في السنة دي؟
• الجو العام للسنة وأختلافها عن باقي السنين؟
• الشئ اللي قدرت تتميز فيه في السنة دي عن اي سنة؟ (العلاقات ،تعمق في المجال او غيره)
• حدث ممتن ليه جداً في السنة ؟
• أحسن كتاب قرأته في السنة ؟( لو بتقرأ أصلاً🤣)
• أحسن فيلم شوفته في السنة؟
• أحسن أنمي شفته في السنة؟

عن الناس

• ايه هو الشخص اللي تقدر تقول عليه "أفضل ما عرفت" في السنة
• ايه هو الشخص اللي تعلن اليوم اللي تفتكره فيه
• أوصف الكراش ؟ وهل الكراش معاك ولا لا (سؤال حقير أنا عارف🙃)
• أوصف حياتك من جهة معينة (الإجتماعية ، الرومانسية وغيره)
• رسالة تقولها لشخص معين في الوقت ده؟
• أوصف عائلتك بشكل مفصل جداً
• شخص فخور أنه في حياتك مش بس في السنة لكن بشكل عام؟

عن المستقبل

• شايف نفسك هتحقق أيه في السنة الجاية؟
• أيه اللي من وجهة نظرك شايف أنك مهم تركز عليه؟
• أذكر أهم جوانب حياتك اللي محتاج تطورها؟
• أيه اللي تقدر تعمله علشان تحسن علاقتك بربنا بشكل أحسن؟
• ايه أهم القرارات اللي أنت شايف إنك محتاج تاخدها في السنة الجاية؟
• أشخاص شايف أنهم هيكونوا مهمين في السنين الجاية؟
• عادات هتحاول تلتزم بيها في السنة الجاية؟

بالطبع أنت مش محتاج تلتزم بكل سؤال لأنك لو قعدت وقت تجاوب على كل الأسئلة دي في رسالتك هتقعد اليوم كله💀 فعلشان كده شوف الأسئلة اللي شايفها هتكون مهمة انك تكتب عنها وأقولك على نصيحة "أكتب كتير جداً!!!" صدقني أنت هتندم إنك مكتبتش بأستفاضة أكتر لأنك لما تستلمها هتفرح بشكل مش طبيعي وأنت بتقرأ الرسالة !