هل أنت سلحفاة؟ 🐢✨

اسم جريدتكم 🌴

السلحفاة كائن زاحف ولها نوعين برية وبحرية، وسرعتين مختلفة، في البر هي بطيئة، أما في البحر هي سريعة، وترى كل نوع منهم مختلف عن الثاني، حتى في خلق الله فيهم، ترى مو متشابهين!🤝

وأنا اليوم اخترت السلحفاة هالكائن اللطيف! ✨

فزي له يا أرض لا جاك بشويش يتسحب، هو مو قصده كذا لكن ربي خلقه

اللي مأخوذ عنها هالمسيكينة صورة ذهنية بأنها بطيئة😅 لأن حتى السلحفاة البحرية💦 إذا جت للشاطئ صارت بطيئة بــــــعــــد، يعني من وين تلقاها البطء ملاحقها ملاحقها هالسلاحف😂 بس إذا جينا نعرف أسباب البطء فهو شيئين2️⃣ فالسلحفاة البرية لأن أطرافها قصيرة، أما البحرية فالعائق لها هي التربة. بــــــــــــــــــــــــــــس بالبحر تعجبكم تسبح وتغوص، ولها صولات وجولات، وتنافس بعد، فمن قدها هي في المكان اللي يناسبها🌊  

وخروا عنها تستعرض مهاراتها

شفتوا الفرق بينهم👀 وتأملتوا كيف خلق الله فيهم؟ ترى اللي تستعرض لكم الحين، في البر نفس بنت عمها البرية بطيـــــئـــــــــة😁

وهنا يجي السؤال: وش علاقة هالكائن اللطيف فينا؟ ترى مو درس في الأحياء تطمنوا 📚

فاللي تُحيي الكلمة وتنعش الجملة، ما راح تجيب لكم موضوع عن السلاحف إلا لأن فيه شيء اكتشفته 🧐💡 وقواسم مشتركة لقتها!

ومثل ما شفنا، إن السلحفاة ما تسرع إلا إذا كان عندها فرصة في بيئة تناسبها، وهنا تجي أول حكمة نتعلمها منها:

🏆 1/ حكمة البطيء في تجويد ما يستطيع

دايم اللي يبحث عن الجودة حتى في ابسط اموره يتعب! اي يتعب، 😵‍💫💭 فهو يبغى يوصل للنسخة الأحسن من اللي بيقدمه من أول مـــــــــــــــره، وهذا له بُعد أخر وأسباب لها مختصين يشرحونها، أنا هنا اللي بوصله أن الجودة اللي يسعى وراءها أي شخص لتقديم الأفضل، هي السبب في البطء اللي يصير معه.

فالبطء مو تأخير للشيء بل هو أسلوب للتقدم بثقة وثبات بدون تشتيت، مثل السلحفاة، اللي بالرغم من بطئها، تلقاها تركز على أهدافها تعرف من وين تجيب أكلها، وين تحط صغاراها، وكيف تحمي نفسها من الأخطار، فتعيش وفق إيقاعها الخاص بدون ما تستعجل لأن السرعة مو شرط للوصول، فنمط حياتها ماشي ماشي والبطء اللي الله خلقها فيه هي متكيفة معه تمام التمام🤝

🎯 2/ هدف واحد مرسوم وواضح ولا عشرة ....!

إذا كان عندك هدف تبغى تحققه وما تشوف غيره🔭، تسعى، تفكر، تتعثر، بس هو أمامك ومؤمن بقدراتك إنك بتوصل له، فما يهمك من يتنافسون معك على الطريق🛣️ نفس قصة الأرنب والسلحفاة 🐇🐢 اللي نشوفها من وحنا صغار، من فاز بالنهاية؟ اللي حاط هدفه نصب عينه واجتهد وحاول وما كان البطء عائق أو عذر فهو حولها الى ميزة بتركيزة على هدفه اللي بين يدينه، ويشوف النهاية أقرب له من غيره عشان يوصل ويتعلي على قمة الفائزين.🎖️

القمة⛰️ اللي اتسعت للي قبلنا وبتتسع لنا وللي بعدنا، فركز على أهدفاك، أشغالك، مهامك، ولا تلتفت لأي نقطة غير جيدة فيك لأنك مخلوق خلقك الله وخلق غيرك بقدرات محدودة ومختلفة عن بعض، وكل منكم يكمل الثاني.🧩

3/ مرونة وتكيف مع ما لا يتكيف؛ لأن فيه قهوة تكيف☕️

نعرف إن السلحفاة تتكيف في البر، البحر، ومنها اللي شوي هنا وشوي هنا🏝️. فالتكيف والمرونة ميزه مو عند أي أحد، فإذا كنت مرن فالله عطاك شيء مو موجود عند غيرك💎، تقدر تنتقل من شغلة إلى ثانية بأريحية حتى لو شارفت على الإنتهاء منها وجاتك شغله ثانية فتروح وتخلصها وترجع وكأنك ما فارقتها🔄، عارف وش عندك وفاهمة وراسم الخطة ببالك، فــــروق وكـــــيف على قهيوتك 😌ولا تاخذك الأفكار يمين ويسار، وتزعل نفسك على نفسك، وركز على اللي عندك من مزايا الله هو وهبك إياها ❤️‍🩹 

ومن باب أجبروا بالخواطر🚪، ترى فيه كثيرين أبطأ من السلحفاة وأولهم هالطيب النايم (كسلان) 

مساكم الله بالخـ....ـيــــ...... 🥱🌙

نام الكسلان🌚. المهم اليوم عرفنا إن البطء اللي حاصل مع أي شخص مو مجرد تسويف وإهمال، بل هو بحث عن جودة وكمال، يحاول يقدمها عشان يريح ضميره، ولأنه عنده هدف حاطه حتى في أبسط الأمور. وإذا رحنا شويتين بعيد، نلقاه حتى مع أهله حريص على تقديم الأحسن والأفضل.

وفيه أمر آخر اكتشفته: عندهم طـــــــــمـــــــــوح عالي، ودائم يشوفون إن الطريق إذا كان اثنين يمديهم يحطون ثالث، وإذا كان ثلاثة فهم بيحطون طريق رابع، المهم أنهم يوصلون القمة بطريقتهم المتأنية الخاصة 😎.

في النهاية، السلحفاة وصلت هدفها لأنها وثقت بخطواتها وما انشغلت بسرعة غيرها. فالسرعة مو كل شيء، اللي يوصلك فعلًا هو الاستمرار، التركيز، والتكيف، وأنت بعد.. لا تستعجل، لكن لا تتوقف! 😉

فإذا كنت من جماعة السلاحف 🐢، مو النينجا طبعًا 🌚⚔️، فخلك سلحفاة دام فيه جودة تقدمها، وتراهن عليها 👏🏻، ودائم حط ببالك أن محد كامل، وكلنا نكمل بعضنا 🌟.

وبما أن اليوم رمضان، كل عام وأنتم بخير، وتقبل الله صومكم وقيامكم. 🌙

سلحفاتكم ما قصرت تبي ترتاح الحين بعد يوم طويل..

ترى النشرة الجاية قريــــــبــــــــــــــــــــــــــــــــــــــ