نشرة تكنولوبيا #4 - مايكروسوفت بتغير العالم! 🤖🤯

بواسطة محمد عادل • #العدد 5 • عرض في المتصفح

يا 200 مليون مرحبا 🥳مبسوط والله انك دخلت تقرا العدد الجديد من النشرةلو قريت الـ3 أعداد اللي فاتوا فأنت تكنولوبياوي أصيلا محنك لك 1000000 تحيةأما لو معاليك داخل جديد، فهنبسط جدا لو دخلت تقرا كل الأعداد اللي فاتت، هسيبلك اللينك في آخر النشرة 😎💉يلا إجهز عشان ده معادك مع جرعة مكثفة من التكنولوجيا💉

الصفحة الأولى

مساعد ذكي شغال بـChatGPT هيوصل لعربيات كاديلاك وشيفورليه قريب

شركة جينيرال موتورز أعلنت انها شغالة حاليا مع مايكروسوفت على تطوير مساعد ذكي صوتي جديد عشان تنزله جوا عربياتها المستقبلية، المساعد الجديد هيقدر يفهم أوامرك الصوتية ويرد عليك بإجابات وكمان هيقدر يقولك ايه اللمبة اللي منورة قدامك في التابلوه ومعناها ايه، وكمان هيسهل عليك انك تنجز حاجات كتيرة وانت جوا العربية، زي مثلا انه يبرمج العربية عشان يلقطها سيستم باب الجراج الأوتوماتيكي في الفيلا بتاعتك.. لامؤاخذة يا فقير :D

عظمة جينيرال موتورز

بالمناسبة، جينيرال موتورز داخلة في شراكة واسعة مع مايكروسوفت من 2016 لما اشتغلوا سوا على تطوير نظام للقيادة الذاتية لعربيات جينيرال موتورز المختلفة!

إتش بي قررت تجُر شكل مستخدمين طابعاتها بتحديث مزعج جديد.. تااااااني!

الشركة الأسطورة في عالم آلات الطباعة نزلت تحديث لبرنتراتها اسمه Dynamic Security، وده بيجبر مستخدمين طابعات إتش بي انهم ميستخدموش إلا خرطوشة الحبر اللي متصنعة من HP، بحيث لو جربوا يستخدموا خرطوشة حبر من إنتاج أي شركة تانية، الطابعات بتاعتهم بتعملها بلوك ومبتشتغلش!

رسالة HP المزعجة

الفكرة في التحديث انه بيخلي الطابعة تقدر تقرا الشريحة الإلكترونية ودايرة الكهربا بتاعت خرطوشة الحبر، بحيث تتأكد انها فعلا الأصلية بتاعت إتش بي، ولو اكتشفت انها مش هي، فتعملها بلوك فورا ومبتشتغلش.

دي مش أول مرة إتش بي تعملها، أول مرة كانت في 2016، واتعمل قلق جامد على الموضوع ده وقتها، لدرجة ان الشركة في 2020 دفعت أكتر من مليون دولار تعويضات للمستخدمين المتضررين من التقنية دي في الولايات المتحدة، ده غير ملايين تعويضات اتدفعت في الاتحاد الأوروبي وأستراليا.

دراسة جديدة: تقليل استخدام للسوشيال ميديا بمعدل 15 دقيقة يوميا.. هيخليك فل الفل!

كتير دراسات اتعملت على ان صحتك النفسية بتتحسن كتير جدا لما تقلل استخدامك للسوشيال ميديا، وده كلنا عدينا بيه وجربناه لانك بتخفف الضغط عن دماغك ومتابعة أي حاجة سلبية من أخبار أو كمان بوستات متشائمة وبتروج لأفكار سلبية، بس ان السوشيال ميديا تأثر على صحتك الجسدية.. دي بقى جديدة!

باحثين من جامعة سوانسي بيقولولك انك لما تقلل الوقت اللي بتقضيه ع السوشيال ميديا كل يوم ربع ساعة، ده بيحسن بنسبة 15% جهازك المناعي، بتقل إصابتك بنزلات البرد والانفلونزا، لا وكمان بتقل احتمالية ظهور حبوب ف رجليك!

ارحم نفسك من السوشيال ميديا

التفسيرات اللي وصلها الفريق البحثي بتقول انه لما المبحوثين قللوا الوقت اللي بيقضوه ع السوشيال ميديا، ده خلاهم يتحركوا أكتر ويعملوا أنشطة أكتر لان بقى عندهم وقت أطول فاضي متاح يعملوا فيه أي حاجة جديدة ونفسهم فيها، زده خلاهم يحسوا بتوتر أقل فده رفع معنوياتهم وحسن حالتهم النفسية وده انعكس كمان على صحتهم ومناعتهم..

بالمناسبة تقليل وقت السوشيال ميديا حسن جودة النوم بنسبة 50% وقلل احساسهم بالملل ودخولهم في الاكتئاب بنسبة 30%!!

الموضوع كان مفيد وحقق نتايج مبهرة، لدرجة ان المبحوثين بعد ما قللوا وقتهم ع السوشيال ميديا 15 دقيقة، بعضهم قلل الوقت ده كمان بمعدل 40 دقيقة!

المطورين محتاجين 42 ألف دولار كل شهر عشان بس يحطوا تويتات تويتر جوا تطبيقاتهم!!

أول شهر فبراير، تويتر أعلنت انها مفيش أي مطورين هيقدروا يستخدموا واجهتها البرمجية Twitter API ببلاش تاني، وده خلى خدمات كتيرة تقفل تماما زي مثلا TweetBot وTwitterrific اللي كانوا بيخلوك تقدر تستخدم تويتر بشكل مريح وألطف كتير عن الشكل التقليدي للموقع أو الأبلكيشن..

هيموت ويقلب تويتر حصالة فلوس!

تويتر مفروض بيجهز باقات مدفوعة باشتراكات شهرية للمطورين عشان يقدروا ياخدوا التويتات دي ويستخدموها سواء في تطبيقاتهم أو لأغراض بحثية كمان على مستوى الباحثين..

تسريب جديد بقى طلع كشف عن الباقات دي هتبقى بكام:

الباقة الأولى

42 ألف دولار/ شهريا .. عشان توصل لـ50 مليون تويتة كل شهر

الباقة التانية

125 ألف دولار/شهريا.. عشان توصل لـ 100 مليون تويتة كل شهر

الباقة التالتة

210 ألف دولار/شهريا.. عشان توصل لـ200 مليون تويتة كل شهر

أحب أقولك إن الأرقام دي خرافية مقارنة بباقات تويتر القديمة للمطورين، واللي كانت أعلى باقة فيهم بـ 2900 دلار!!

مدير أبل هيقبض نص قبض السنة دي!

المستثمرين في أبل يوم الجمعة اللي فاتت قرروا إنهم يقللوا المرتب السنوي بتاع مدير الشركة تيم كوك..

مدير أبل تيم كوك زعلان

المستثمرين اتفقوا على إن مرتب تيم كوك يتحسب كالتالي:

3 مليون دولار مرتب ثابت

6 مليون دولار علاوة كاش

حصة سنوية من اسهم الشركة بقيمة 40 مليون دولار

شربتها يا كروديااا.. ها ها ها 😅

فالراجل هيقبض نص مرتب فعلا.. 49 مليون دولار بس!

بالمناسبة، المستثمرين اتفقوا على ان مرتب تيم كوك هيتعمل عليه تصويت سنوي، ويتحدد حسب أداء الشركة..

أما بقية مديرين الشركة في 2023، فالمستثمرين اتفقوا انهم هيقبضوا مرتبات سنوية متساوية.. كل واحد 27 مليون دولار.. بس! 😒

التحليل العميق

بصراحة التحليل العميق المرة دي هيتأخر شوية، واستناه يوصلك على الايميل في أي وقت!

السبب؟🤔

لإن مايكروسوفت منتظر إنها تعلن الجيل الرابع من تقنية GPT.. يعني منطقيا هيبقى اسمها GPT-4، وده الإصدار الجديد من تقنية GPT اللي بتدعم ChatGPT، واللي شغال حاليا بإصدار GPT-3.5!

بص فيه كمية كلام على GPT-4 مش طبيعية بتنتشر من أول السنة دي في الأوساط الغربية أهمها انه الجيل الجديد هيبقى متدرب على 100 تريليون متغير، مقارنة بـ175 مليار متغير فقط في GPT-3.5، ومن كتر ما الموضوع منتشر، سام ألتمان مدير OpenAI مطورة GPT قال انه الكلام ده حرفيا بلح في حوار ليه مع The Verge!

فخليني أقولك أرجوك متصدقش البوست ده لو شوفت أي حد عامله شير

بوست أي كلام عن GPT-4

عايز بقى تعرف ايه اللي جاي في GPT-4، اقرا الكام سطر اللي جايين دول ودول قالتهم مايكروسوفت نفسها يوم الخميس اللي فات عن الجيل الجديد:

في مؤتمر امبارح للذكاء الاصطناعي في ألمانيا،

مايكروسوفت اتكلمت على ان GPT-4

هيقدم حاجة اسمها Multi-Modal Large Language Model وده ياسيدي نموذج لغوي آه بتكلمه بالكتابة آه.

انما بيعمل حاجة واحدة بس؟ لأ

ده بقى بيعمل حاجات كتيرة في نفس الوقت..

يعني في نفس الشات تقدر

تطلب منه يكلمك عن تاريخ كأس العالم

فيكتبلك معلومات..

وتسأله عن كل تمائم بكولات كأس العالم في ال10 سنين اللي فاتوا،

فيجيبلك صورهم كلهم عادي..

وكمان تقدر تسأله ايه الاغاني اللي اتغنن في آخر 5 بطولات في حفلات الافتتاح،

فيروح هو يجيبلك فيديوهات ليها..

وتقدر كمان تطلب منه تصميم تخيلي لتميمة البطولة اللي جاية فيصممهالك.وكمان يعملك ليها فيديو..

كل ده في نفس الشات

على نفس منصة التواصل

فمش محتاج تتنطط بين

أكتر من منصة من ChatGPT لـDALL-E وغيرهم!

🔴 بالمناسبة،

كنت اتكلمت عن مجموعة حوارات

عملهم سام ألتمان، مؤسس OpenAI، من السنة اللي فاتت لحد فبراير السنة دي،

واستعرضت تصريحاته وكلامه عن مستقبل النماذج اللغوية الضخمة LLM بما في ذلك كمان كلامه عن الـMulti-Modal Language Model

وتقدر ترجع للكلام من البوست ده على فيسبوك.

الأخيرة

في مؤتمر عملته شركة ديزني خلال فعاليات مهرجان SXSW التقني السنوي، خلال عرض بعض مديرين الشركة لآخر ما توصلت إليه من تكنولوجيا حديثة وتقنيات هتستخدمها في الجولات جوا ديزني لاند.. خرج روبوت من الصندوق!

الروبوت عبقري جدا لانه بيقدر يعمل حركات أكروباتية بليونة عالية جدا ورشاقة عجيبة، فمثلا لما بيتشقلب وبيقع بتلاقيه فجأة بيقوم ويقف عادي جدا بشكل سلس جدا وكإنه عنده عضلات مرنة مش شوية تروس ومفصلات حديد!!

Storytelling Through Characters at Disney Parks I SXSW 2023 - YouTube

المفروض الروبوت الجديد بشكله الأرنبي العجيب هيبقى جزء من ديزني بارك جديدة هتفتح في الصين نهاية السنة دي وهي مفروض الـTheme بتاعتها هتبقى محاكاة لعالم فيلم Zootopia!

بالمناسبة اتفرج على الفيديو كلو، هتلاقي حاجات رهيبة!

***

فيه ناس كدا لما بتيجي تعمل ملف وورد، بتستخدم ألوان عجيبة للكتابة وخصوصا الفرق بقى بين العناوين والكلام بتاع النص نفسه، بتشوف إبداع مرعب، اللي يحطلك ألوان من درجات الرمادي الفاتح على خلفية بيضا، فمايكروسوفت ميرضيهاش الكلام ده خالص وعملت ميزة مخصوص للقصة دي اسمها Accessibility Assistant!

ميزة Accessibility Assistant من مايكوروسوفت وورد

الميزة دي عبقرية جدا لانها في المقام الأول بتحاول تخلي تنسيق مستندات الوورد مناسبة للناس اللي عندها مشاكل في الرؤية بحيث تبقى المستندات سهلة عليهم في قرايتها، فالدور الرئيسي للميزة الجديدة هي انها تخلي الألوان اللي تختارها تكون بتزود فرصة العين انها تقرا كويس وهي مرتاحة!

الميزة هتنزل الأول للمشتركين في خدمات Microsoft 365 وبعدها تبدأ توصل لوورد الغلابة نهاية السنة دي.

***

واحد في كندا كان خارج من شغله ومستعجل عشان يروح يجيب عياله من المدرسة، فطلع أبلكيشن تيسلا على موبايله وفتح العربية ومشي بسرعة..

وهو ماشي ع الطريق لاحظ ان فيه كسر في الازاز الأمامي للعربية، فكلم مراته واتخانق معاها، وقالتله انها مكسرتش الازاز ومعملتش حاجة..

بعد ما خد ساعة ونص في الطريق وخد عياله، جتله رسالة على موبايله من رقم غريب بتقول:

" هو أنت اخدت عربيتي التيسلا؟!"

الراجل اتصدم جدا، ركن العربية، وأول ما نزل وشاف العجل.. عرف ان العربية فعلا مش بتاعته!

لما ركز كدا ورجع بالذاكرة، افتكر ان كان فيه عربيتين تيسلا راكنين جمب بعض، وهنا حصلت اللخبطة، الرعب اللي بجد انه ازاي الراجل ده دخل عربية التاني، والتاني ازاي دخل عربية الراجل ده ساعتها لقى ورقة عليها رقم تليفونه جوا العربية فكلمه!

أبلكيشن تيسلا بيخلي صاحب العربية التيسلا يقدر يفتحها بس لازم موبايله يبقى متوصل بالعربية، فلما يقرب، العربية تفهم انه صاحب العربية فتفتح، انما أبلكيشن تيسلا يفتح أي عربية تيسلا دي جديدة خالص بقى!

الأحلى بقى ان حد من الاتنين بعت ايميل يشتكي لتيسلا القصة دي وبعت شرح طويل عريض وفيديوهات تثبت المشكلة، والرد جاله من الشركة:

"إيميل الشركة مليان.. ومش هيعرفوا يستلموا الايميل بتاعك"! 🤣