نشرة تكنولوبيا #3 🤖 تعرف إن ChatGPT طلعله وش وصوت؟! 🤯

الصفحة الأولى

في التلات أيام اللي فاتوا

فيسبوك قرر يرجع الماسنجر جواه بعد 9 سنين انفصال

وجوجل ترانسليت هيخليك تترجم التيكست اللي في الصور من موقع الويب

ده غير تيك توك اللي بياخد قرارات ملخبطة الانفلونسرز جدا

ضيف لكدا إن بينج شات عامل أداء خرافي مع مايكروسوفت

الشركة اللي عملت وجه ولسان لـ ChatGPT!

يلا نبدأ 🔥

عشان يخرج أي فيلم أو مسلسل وفيه جزء جرافيكس لشخصية خيالية بتتحرك، دايما كانت حاجة معقدة، فلازم يجيبوا شخص بيلبس بدلة عليها سينسورز عشان الكاميرات والكمبيوترات تلقط حركة الجسم بدقة، وبعدها يتم تركيب الشخصية الخيالية على المجسم بتاع الممثل المتحرك في التصوير، وساعتها تطلع الشخصية الخيالية بتتحرك بشكل شبه طبيعي على الشاشة.. بس ده كان زمان!

شركة  جديدة اسمها Wonder Dynamics عاملة موقع ويب جديد (لسا تجريبي) بيخليك تقدر تشيل نفسك من أي فيديو وتحط مكانك أي روبوت أو شخصية افتراضية تانية، بحسبة ماوس عادي جدا!!!

الموقع الجديد معتمد على نظام ذكاء اصطناعي قوي جدا، بيقدر انه يحدد حركة الجسم في الفيديو وأبعاد الجسم وكمان بدقة عالية جدا يقدر يخليك تستبدل الجسم ده بأي كائن تاني سواء كان تصميم أو CG أو شخصية كرتونية أو أي حاجة تانية.. حرفيا أي حاجة ويظههر الفيديو طبيعي جدا!

شركة ميتا عندها مشكلة كبيرة في فهم كلمة "شهيد"، لدرجة انها بعتت طلب خاص للهيئة العليا الاستشارية Oversight Board عشان تاخد رأيها في ازاي منصات انستجرام فيسبوك ماسنجر واتساب تتعامل مع الكلمة دي؟!

(بالمناسبة، الهيئة العليا الاستشارية دي لجنة كدا كونها فيسبوك في 2020 عشان تبقى مستقلة ويتم الرجوع ليها في القضايا والقرارات الجدلية اللي بتحتاج ميتا تاخدها في التعامل مع مختلف أشكال المحتوى على منصاتها الاجتماعية)

ميتا حاليا لما بتيجي تتعامل مع كلمة "شهيد" بيبقى قدامها حلين، الأول انها تحذف كل المنشورات اللي فيها الكلمة وبيتم الاشارة فيها لشخص خطير او إرهابي، والتاني إنها تسيب الكلمة موجودة بشكل عادي طالما كان المقصود بيها أشخاص عاديين..

ميتا في طلبها للهيئة العليا طلب انه يتم توضيح أسلوب واضح وصريح في التعامل مع الكلمة دي مستقبلا!

بالمناسبة الهيئة دي فتحت المجال قدام عموم المستخدمين انهم يشاركوا برؤيتهم في طريقة التعامل الأمثل مع الكلمة مستقبلا والباب مفتوح لاستقبال المقترحات لحد 10 أبريل.. لو عايز تشارك، ادخل هنا

تيك توك اليومين دول عامل قلق جامد مع صناع المحتوى والانفلونسرز، من ناحية بدأ يطبق ميزة جديدة اسمها Series بتخلي صناع المحتوى يقدروا يعملوا فيديوهات طويلة توصل لحد 20 دقيقة، ويطالبوا المتفرجين انهم يدفعوا عشان يتفرجوا، مبالغ تبدأ من أول 1 دولار ولحد 190 دولار!

أما من الناحية التانية، تيك توك حرم كل الحسابات الشخصية انها يتحط في الـ Bio بتاعها لينكات أبلكيشنز على المتاجر الرسمية للتطبيقات زي آب ستور وجوجل بلاي، وكمان لينكات الحسابات المجمعة زي خدمة LinkTree !

تيك توك قالت ان الميزة دي هتكون متاحة فقط للحسابات البيزس، عشان تخلي الناس تعرف فرق بين حسابات الشخصية والبيزنس، ومن ناحية تانية المتوقع ان تيك توك بكدا بتضغط على مطورين التطبيقات بدل ما يروحوا يدفعوا للانفولنسرز عشان يخلوا الناس تحمل تطبيقاتهم، لأ كدا الديفيلوبرز غصب عنهم هيروحوا يعملوا حملات إعلانية مدفوعة على تيك توك وبكدا الربح كلو يكون رايحله!

موقع جوجل ترانسليت عمل حاجة فوق العظمة بجد، دلوقتي لما تفتح الموقع هتلاقي تبويب اسمه (صور Images) ودي يامعلم لما تدوس عليها هيخليك ترفع أي صورة ويترجملك أي تيكست جواها لأي لغة انت عايزها :O

العظيم انه بيحطلك التيكست المترجم جوا نفس الصورة مكان النص الأصلي، والأحلى وأحلى انه بيخليك تقدر تاخد Copy من الترجمة، وتروح في أي وورد ترميهم Paste!

جربها دلوقتي

مايكروسوفت دلوقتي رفعت سقف تجربة مستخدمين نظامها البحثي الحواري الذكي Bing Chat من يادوب 6 أسئلة في الجلسة الواحدة بمعدل 10 جلسات يوميا (يعني 60 سؤال في اليوم)، إلى 120 سؤال في اليوم!!

خليني أقولك انه بعد مرور شهرين على إطلاق بينج شات التجريبي في 7 فبراير اللي فات، مايكروسوفت عاملة عظمة وتعالى نبص كدا ع الأرقام:

🚀  100 مليون مستخدم يومي لبينج عموما(تلت العدد ده أول مرة يستخدم بينج أصلا)

🚀 45 مليون رسالة بعتها المستخدمين لبينج شات

🚀 تلت المستخدمين كانوا بيسألوا يادوب 3 أسئلة بس في جلسة الشات الواحدة مع بينج شات

جوجل حاليا بتجرب شوية مزايا أمنية جديدة مع نسخة أندرويد 14 التجريبية، ويمكن أكتر ميزة لفتت نظري هي خاصة بأداة للتحكم في السماح للتطبيقات بالوصول إلى صورك على موبايلك، فبدل ما كان الإذن بيكون إما انك تسمح أو متسمحش لأبلكيشن معين يدخل لصورك، مع أندرويد 14 انت هتحدد انهي صور بظبط اللي أنت هتسمحله يشوفها من الموبايل بتاعك!

ساعات بيبقى فيه مناسبات أو أوقات كدا محتاج تعمل جروب ضروري بس مش عايز يطول بعد ما تخلص مصلحتك منه، زي جروب أبحاث ف الكلية أو جروب تظبيط خروجة أو تظبيط جواز واحد صاحبك أو عيد ميلاد واحد صاحبتك أو أي مناسبة ليها وقت وهتخلص، واحنا أصلا مش ناقصين زحمة جروبات..

واتساب حلهالك، حاليا النجم الأخضر بيجرب ميزة جديدة تخليك تقدر تعمل جروبات شات على الواتساب، وتحط مدة معينة بعد ما تخلص، الجروب هيمسح نفسه بشكل كامل!

من مدة كدا واحد وعيلته اشتروا عربية تيسلا Model Y، المهم الراجل ماشي في امان الله بالعربية بعد يومين تلاتة من استلامها، وهوووب لقى الدركسيون خرج من مكانه، وبقدرة قادر سيطر على العربية لحد ما وقفت خالص!!

الموضوع ده اتكرر مرتين، فالحمدلله هيئة الطرقة السريعة الأمريكية NHTSA فاتحة تحقيق على مستوى 120 ألف عربية موديل Y وواضح كدا ان تيسلا احتمال تلبس أسود وتدفع ملايين غرامة لو اتثبت ان الموضوع ليه علاقة بعيوب تصنيع وكوارث جودة!

تقرير جديد نشرته مؤسسة CounterPoint الاحصائية بيأكد ان موبايلات الآيفون مسيطرة على 8 مراكز من أصل 10 في قايمة الموبايلات الأكثر مبيعا في 2022!

تعالى يلا بينا نبص ع الترتيب كدا

على سيرة الآيفون، ريلمي نزلت موبايل جديد C55 واخد ديزاين الآيفون 14 برو كربونة ومسميها Mini Capsule!

من كام شهر كدا يوتيوب كان بدأ يطبق بشكل محدود سياسة جديدة عشان يحسن من جودة الفيديوهات اللي بتتنشر عنده، وهي انه كان بدأ يحرم صناع المحتوى من انهم ياخدوا فلوس من الفيديوهات اللي بيعملوها وفيها شتايم وألفاظ مش تمام في أول 10 ثواني منها.. أنا لسا بقول هييييييه، قام يوتيوب راجع في كلامه وقالك ياباشا عادي طالما شتايم في الخفيف كدا، انما لو ألفاظ تقيلة وبتتكرر كتير زيادة في الفيديو، فهيتحرم من الأرباح أو هتتقلل، والسبب في التغيير ان صناع المحتوى "المحترمين" زعلوا!

التحليل العميق

في 2016 طلع روبوت برمجي بيكلمك بكل تلقائية اسمه Replika، عادي بتكلمه في أي حاجة - حرفيا أي حاجة - بيرد عليك، كان يادوب شات بس عادي جدا.. بس مع الوقت الموضوع اتطور جدا.. Replika خرجت من توب بوكس التيكست في محادثة شات وبقت أفاتار في هيئة بشرية متكاملة وبتقدر تتواصل معاك وتتعامل معها كإنها شخص حقيقي عايش معاك على الشاشة سواء الكمبيوتر أو الموبايل والأدهى.. جوا نضارة الـVR!

كذلك ظهر الأول جوجل أسيستانت وسيري وأليكسا كمساعدين صوتيين أذكيا على موبايلاتنا، بعدها شوفنا روبوتات ذكية بتتكلم وتجاوب زي Sophia!

هو ده بظبط اللي احنا بنشوفه دلوقتي مع النماذج اللغوية الضخمة LLM زي ChatGPT!

بعد ما ظهر ChatGPT وبدأ يكلمنا بالكتابة ويجاوب علينا في نوفمبر 2022 وقلب الدنيا في الشات لحد دلوقتي، نهاية فبراير مايكروسوفت أخدت أول خطوة عشان تجرب ازاي تخلي سهل على أي حد انه يتحكم في الروبوتات بأوامر صوتية أو مكتوبة!

الموضوع كان صادم جدا، لإنه كان عامل كإن الروبوتات فعلا فاهمة انت بتقول ايه بكل دقة وكإنها بتفهم فعلا كلامك..

تعالى أقولك الدنيا بتمشي ازاي ونتفرج سوا على التطبيق العملي:

1- اول مرحله ببساطه هي انك تشتغل على الواجهات البرمجيه ومكاتب الاكواد الجاهزه عندك وتبدا تسمي كل وجهه من الواجهات دي باسم عشان تعلمه للنموذج اللغوي اللي هو بيشتغل عليه شات جي بي تي

وفي نفس المرحله دي هتبدا تربط كل الواجهات البرمجيه دي ببعض من خلال انك تعلم شات جي بي تي ان كل اسم مرتبط بواجهه برمجيه معينه وازاي كل وجه برمجيه ممكن عادي تتنفذ بعد او قبل اي وجهه برمجيه تانيه وتربط الواجهات البرمجيه دي كلها باوامر عادي جدا تتوجه للروبوت زي انه يشيل حاجه من مكانها او يروح يدور على عنصر بشكل معين او يدور على حاجه بلون معين او حتى يروح يتعرف على شخص معين قاعد في مكان ما جوه الشقه بتاعتك

2- المرحله الثانيه هي انك تبدا تصيغ مجموعه من الاوامر بشكل كتابي نصي بالانجليزي عادي وتبدا تغذيها وتعلمها لشات جي بي تي

3- المرحله التالتة بقى هي التدريب بالمحاكاه وهي معتمده يا سيدي على انك الديفيلوبر هيقعد يكتب الاوامر بشكل نصي لشات جي بي تي ويربطوا بسيستم محاكاه لحركه الروبوت فالديفلوبر يدي الاوردر بشكل نصي لشاد جي بي تي وشات جي بي تي يترجم الامر النصي ده لاكواد برمجيه واوتوماتيك تدخل على سيستم المحاكاه فيظهر الروبوت وهو بينفذ الامر البرمجي والديفلوبر بيراقب العمليه دي ويفضل يحسن ويطور فيها لحد ما يتاكد ان الكود اللي بيطلع من شات جي بي تي بينفذ الامر اللي يقصده الديفلوبر فعلا

4- وساعتها بتيجي المرحله الرابعة واللي فيها الديفيلوبر بيدي شات جي بي تي الموافقه النهائيه عشان يتم تخزين الكود النهائي جوه سيستم الروبوت الحقيقي!

جوجل كمان دخلت على الخط عن طريق نظام اسمه PALM-E واللي انا شايفه متطور أكتر من اللي قدمته مايكروسوفت، لإن سيستم جوجل مبيحتاجش مراجعة بشرية زي بتاع مايكروسوفت، لإن نظام جوجل هو سيستم متعدد الإمكانيات بما فيها قدرة إدراك بصرية أو يعني Multi-Modal Visual Languge Model، وده بيغذي الروبوتات بحوالي 562 مليار معامل (وده يخليه أضخم سيستم متعدد الإمكانيات حتى الآن)، كلها بتدعم قدرات الروبوتات الإدراكية سواء للحاجات اللي بتشوفها كاميراتها أو كمان للأوامر النصية اللي بتتوجهلها!

المبهر في سيستم جوجل PALM-E انه بيستفيد من خبراته والمهام اللي بيقوم بيها بحيث يبقى عنده خبرة يستخدمها في إتمام مهام تانية مستقبلا بدون ما يحتاج تدريب أو انه يكون شاف المهام دي قبل كدا، كمان عظيم لإنك لما بتقوله على مهمة يقوم بيها، بيبدأ يحط تحليل للمهمة ويحط خطة في صورة خطوات لما يمشي عليها ويخلصهم واحدة واحدة، يتمم المهمة في النهاية!

و زي ما قولتلك من الأول، كل مرة الموضوع بيبدأ بتطورات برمجية افتراضية مش ملموسة، والموضوع بيتطور تدريجيا عشان يبقى مجسم وملموس أكتر..

فيه شركة ناشئة اسمها D-ID، ودي متخصصة في تطوير الأفاتارات رقمية بهيئة بشرية، الشركة دي أخدت ChatGPT وربطته بنظام ذكي عندها اسمه Live Portrait وعملت حاجة جديدة خالص سميتها.. Chat.D-ID وده موقع بالمناسبة تقدر تدخل عليه وتجرب..

الخدمة دي ببساطة هي نسخة مجسمة من الـChatGPT.. نفس الذكاء والقدرة على الرد والحوار والمناقشة مع إضافة صوت وحركة شفايف دقيقة بتعكس الكلام اللي بيقوله ChatGPT لما يجي يرد عليك!

الفكرة ان أفاتار D-ID بيرد بتلقائية وشفايفه بتتحرك بالكلام اللي بيقوله كإنه بيتكلم بجد، والعظيم انك بتتفاعل معاه مش بس بالكتابة، لأ انت كمان ممكن تتكلم بصوتك وتسأله بدون ما تلمس الكيبورد أصلا!

خليني أقولك ان D-ID بتقول انها بمرور الوقت وتطور تقنيتها الجديدة، هتخلي المستخدمين يقدروا يعملوا مساعدهم الشخصي الذكي بالصورة اللي يحبوها، يعني ممكن يحطوا صورة أي شخص ويتعمل منه نسخة 3D بوجهه، ما عدا صور المشاهير والممثلين والشخصيات العامة، طبعا منعا لانتشار الشائعات وفبركة الفيديوهات!

بصراحة انا متوقع جدا ان الموضوع ميقفش لحد هنا، وهتلاقي ذكاء الـChatGPT يدخل جوا أنظمة روبوتات حقيقية بتتحرك حوالينا، ويبقى الحوار مفتوح أكتر وبيتطور بطرق أفضل، لإن كل الروبوتات المتوفرة حاليا في الأسواق زي صوفيا وغيرها إلى حد كبير عندها مسار معين لإجاباتها وتطور الحوار بينها وبين البشر اللي بيتفاعلوا معاها، مع تطور النماذج اللغوية الضخمة LLM، الموضوع تطوره هيبقى سريع وغير طبيعي في التطور وقفزاته هتبقى أسرع من تخيلنا!

التطور ده متوقع جدا، لإن عشان تعرف ايه اللي جاي في التكنولوجيا، لازم تحلل طريقة تطور التقنيات القديمة مشي ازاي!

الأخيرة

فاكر التنين بارني الموف بتاع زمان؟ هيرجع تاني قريب في نفس الكارتون بس مش هيبقى واحد لابس تنين كبير، إنما هيبقى ظاهر ككرتون يستخدم تقنية CGI فبني آدم هيمثل دوره ويتحرك وبعدين يركبو التنين جرافيكس!

تعرف ان الشركات التقنية لسا بتدفع ملايين تأمين وحماية لمديريها التنفيذيين رغم انها بتقول ان فيه أزمة مالية وبتعمل موجات اقالات للموظفين!

أوبر دفعت أكتر من نص مليون دولار لتأمين مديرها في 2021

أمازون دفعت 590 ألف دولار لتأمين مديرها في 2021

ديزني دفعت أكتر من 870 ألف دولار لتأمين مديرها في 2022

أبل دفعت 1.3 مليون دولار لتأمين مديرها في 2022

أوراكل دفعت 1.56 مليون دولار لتأمين مديرها في 2022

أمازون دفعت 1.6 مليون دولار لتأمين جيف بيزوس في 2021 قبل ما يستقيل

ألفابت (مالكة جوجل) دفعت 4.3 مليون دولار لتأمين مديرها سوندار بيتشاي في 2021

ميتا دفعت في 2021 مبلغ 26.82 مليون دولار لتأمين مارك زوكربرج

لأول مرة اسطوانات الفينيل عدت مبيعات السيديهات لأول مرة من 1987، تايلور سويفت هي الأعلى مبيعا 

اسطوانات الفينيل وصلت مبيعاتها في 2022 حتى 41 مليون اسطوانة، قصاد 33 مليون سيديهاية!

خلصت نشرة انهاردة يارب تكون عجبتك🥳

وياريت تعمل Share مع صحابك وتعرفهم بالنشرة😎

🎈إنجوي في ويك إندك بقى 🎈