نشرة تكنولوبيا - العدد #0

بواسطة محمد عادل • #العدد 1 • عرض في المتصفح

بسم الله الرحمن الرحيم

ازيك؟ 😄 أخبارك ايه؟ 🙄 يارب تكون مروّق 😎♥

أنا مبسوط إنك بتقرا الكلام ده، لإن دي خطوة كان نفسي أخدها من فترة، فريّح ضهرك كدا عشان أعرفك هي ايه نشرة تكنولوبيا دي ⁉

نشرة تكنولوبيا إن شاء الله هتحاول تقدملك كل اللي محتاج تعرفه عن السوق التقني، هتلاقي هنا مساحة دسمة وممتعة هتخليك مكتفي بشكل كبير من المعرفة التقنية اللي أنت بتدور عليها خلال أسبوعك!

📰النيوزليتر دي هتوصل ع الإيميل بتاعك مرتين في الأسبوع 📅 تلات وجمعة

أنا من جيل التسعينات القديم 👨 فمرتبط أوي بعصر الجرايد الدهبي ✨ حظك اليوم والكلمات المتقاطعة 📝 وملحق الجمعة، لما دخلت سوق الميديا 📺🗞📻 من 14 سنة، كانت البداية برضو من بوابة صاحبة الجلالة.. الصحافة

عشان كدا لما فكرت أقسم النيوزليتر، حبيت إنها تكون تعكس التجربة دي..

فقسمتها تلات أقسام

الصفحة الأولى

أول لما بتمسك الجورنال 📰 أول حاجة بتقابلك قدامك هي الصفحة الأولى، الرئيسية، أو يعني الـHomePage، ودي دايما بتتصدرها العناوين العريضة وأهم الأخبار 🔥

دي هتلاقي فيها ملخص مُركز للأحداث التقنية اللي حصلت خلال الأيام اللي فاتت وايه أهم خلفياتها، عشان تبقى قادر تواكب اللي بيحصل أول بأول، خصوصا إن بداية أي تريند أو موجة بتحصل في التكنولوجيا بتكون هي الخبر، فلو تابعته هتقدر تفهم التطور اللي حواليك من بدايته

التحليل العميق

لما بتعدي الصفحة الرئيسية وتقلب في باقي الصفحات جوا الجورنال، هتلاقي بقى مواضيع بيتفرد لها صفحتين أو أكتر، وهنا بيحصل ما بعد الخبر، التحليل، واللي بيكون جواه تفصيل أكتر لأبعاد الخبر من زوايا مختلفة، وربط الخبر مع السياق العام ومناقشة وعرض أسئلة ❓ مش كلها ليها إجابات طبعا، ولكن في كلها هتخليك تشوف الصورة بشكل أوضح وأشمل 🔎..

في الجزء ده هتلاقي تحليلات لخبر أو تقنية جديدة ⚡ أو جهاز ثوري أو قرار 📈 أخدته شركة أو اتجاه عام ⬅ في السوق التقني، هفتح فيه كل الجوانب الخاصة بيه سواء ماضيه حصل ايه فيه أو كمان ايه التطورات 🆕 اللي بتحصل حاليا وطبعا تأثيره على مستقبلنا مع التكنولوجيا هيكون عامل ازاي 👽🤖😱

الأخيرة

🍿🍦أكتر حاجة كنت بحبها جدا في الجرايد، الصفحة الأخيرة، متعة تانية خالص، لإن هنا بتبقى استراحة خفيفة أقرا فيها خبر لذيذ أو أشوف صور لحاجة غريبة 🥳🤩

عشان كدا في الجزء ده هتلاقي فيه صور وفيديوهات ولينكات أكتر، هاخدك من خلالها عشان تعرف وتتفرج وتنبسط وكمان تروح تجرب أبلكيشنز وتشوف تجارب أونلاين مختلفة تماما

دي كانت فسحة سريعة كدا قولت أعرفك فيها على النيوزليتر الجديدة دي ونـBreak the Ice بقى 😎

العدد الأول هيبقى الجمعة إن شاء الله، وعلى الله يعجبك 😅

👋سلامو عليكو👋