لا تحتاج الى اكبر حل تقني، تحتاج الى حل ذكي هادف - العدد #6

احد اصعب المشاكل الي كانت عند التجار بشكل مستمر و هي توصيل الطلبات و الاستلام و الي شافت المشكله و عرفت كيف تحلها بطريقة ذكية خلتها الان تبدأ تتحول الى بنية تحتية لهذا القطاع الخصيص و هي طرود، كانت العملية بشكل رئيسي تخضع لعدد كبير من العوامل الي ممكن تخلي التوصيل عملية متعبة و مستهلكه للوقت، ناهيك على ان العملية نفسها ما تأتي بهامش ربحي عالي على سبيل المثال عشان تغطي التكاليف.

وش سوت طرود عشان تحل المشكله ؟

كبداية كانت عملية ايجاد الشريك المناسب للتوصيل عملية مرهقه، فراح تبدا تصنف حسب نوع التوصيل هل تحتاج الى توصيل يكون مخصص للمجمدات، او مخصص للطلبات الحساسة للكسر او غيرها.

جت طرود لحل المشكله عن طريق ربط التجار مع طرود للمقارنة و ايجاد افضل حل لهم وايجاد افضل شركة توصيل لتوصيل الاشياء المجمدة مثلا. بدت هنا الفكرة على اساس حل تقني بسيط كلفهم فقط 60 الف ريال للربط مع شركتين كبداية، و اخذ منهم شهرين للتنفيذ.

الان ما هي طرود ؟

طرود اليوم جالسة تتحول لشركة بنية تحتية للقطاع اللوجستي كله. الفكرة كبرت من مجرد "حل" إلى "نظام أساسي" يقدر أي أحد يبني عليه.

اللي قاعد يصير هو إن طرود بتوفر نظامها وتقنيتها (API) بشكل مفتوح، بحيث يقدر أي شخص أو شركة تستخدم هذي البنية التحتية عشان تطور حلول جديدة وتساعد في تكبير قطاع التوصيل والشحن.

بهذي الطريقة، طرود ما عادت مجرد لاعب في السوق، بل صارت هي "الملعب" نفسه اللي يربط بين كل اللاعبين: التجار، المطورين، وحتى شركات الشحن الجديدة. هي جالسة توفر الأساس التقني اللي الكل يقدر يبني عليه ويكبر من خلاله.

كيف ممكن نطبق الفكرة ؟

الموضوع بسيط جدا و الخطوات راح تكون كتالي:

• تحديد الهدف (لماذا) : لما تحب تني اي حل تقني او رقمي لازم تعرف ايش الهدف منه النهائي، ايش الهدف منه هل هو توفير وقت ؟ او جهد ؟ او ربط منصة مع مزود خدمة ؟ او جعل الخدمة اقرب للعميل و سهله ؟ لأن كل هدف راح يحتاج لطريقة بناء مختلفة
• حدد الحل المناسب (ماذا): حدد الحل المناسب لك بأقل الامكانيات الممكنة، ممكن الحل المناسب لك هو منصة تجارة موحده من سلة او زد لو كنت تاجر مثلا ؟ او ممكن الحل منصة مثل woo commerce  مثلا لو حبيت شي مخصصه، او ممكن يكون موقع مبرمج من الصفر بأعقد التقنيات، كلها تعتمد على اختيارك لكن تذكر الحل المناسب هو الحل ذو اقل تكلفة يقدم لك اعلى عائد ممكن على استثمارك و يحل مشاكلك.
• من هو عميلك (من): احيانا بعض الحلول التقنية تنسى عميلهم، مو من الشخص الي راح نبيع له ؟ لا، هم ينسون الشخص هذا او الشركة هذي كيف تتصرف هل هي تقنيا مناسبة ؟ او هل هي كعمليات مناسبة او تحتاج الى اعادة تصميم ؟، هنا انت تحتاج الى انك تعرف عميلك بشكل ممتاز و تبني الحل مفصل على احتياجه، مو انك تفترض الحل بدلا عنه.
• ما هي مقاييسنا (كيف): و هنا بشكل بسيط راح نحدد مقاييس و معايير تقيس الاداء للحل بشكل واقعي مبني على هدف للتبني و هدف للكفاءة، Adoption Goal، Efficiency Goal.

الدرس الأهم: قصة نجاح "طرود" تثبت أنك لما تركز على حل مشكلة أساسية ومؤلمة جداً، حلك هذا ممكن يكبر ويتحول من مجرد خدمة إلى بنية تحتية يعتمد عليها سوق كامل.

بالخاتمة شاركنا

حساباتي

لينكدان

Abdullah Alqarni Website

Ultra tech | الترا تيك

لو حابب تحجز جلسة معاي