دكتوراه فخرية في قلب الطاولة 🎓🎖️

العباقرة الجدد

مع التطور السريع اللي نشوفه يجتاح كل شي، تكاثرت نسخ جديدة وغير فاخرة من العباقرة!

في الفترة الماضية، تابعت مسلسلين مختلفين تمامًا، لكنهم يشتركون في وجود شخصية من نوع (العباقرة اللي نتكلم عنهم)؛ الشخصية اللي تتقن وبجدارة (للأسف الشديد) قلب الطاولة السريع، واللي دايم تطلع من كل مشكلة بمظهر الضحية البريئة!

أستغرب والله.. كيف تفوقوا وأخذوا هالدرجة الفخرية!
كيف يعرفون يطلّعون أنفسهم ضحايا بعد كل فوضى يسوونها؟
كيف يقنعون الكل إن الشمس طالعة من جهتهم حتى لو كانوا تحت الأرض؟

كيف يفكرون؟!

ما أخفيك.. أحيانًا أفكر كثير في تركيبة عقولهم والأسباب اللي خلتهم يوصلون لهالمرحلة.. المسألة هنا مو تبرير للشي اللي يسوونه.. لكنه محاولة لفهمها؛ علشان على الأقل ما نمشي في طريقهم يوم من الأيام.. ومن الأسباب اللي طلعت فيها:

• هل ممكن تكون آلية دفاع (نرجسية)؟ يعني يبي يتغدى فيك قبل حتى لا تفكر تتعشى فيه!

• ولّا هل ممكن يكون عنده خلل في طريقة تفكيره (ومافيه شك في هذا🌚)؟ يعني طول الوقت يفسر المواقف بطريقة تثبت له إنه هو دائمًا الصح!

• أو هل يا ترى (يعني لو قررت إني أفكر ببساطة) إنه جربها مرة وحدة وأعجبته النتيجة، فاعتمدها كأسلوب حياة وأسلوب مخارج؟

الصدق ما أعرف!!

لحظة.. وقف تسوير 😐!

تدري وش اللي يقهر أكثر؟!

إنك وقت الموقف تتجمّد!
مو لأنك ما تعرف ترد.. لكن لأنك مو مستوعب مدى بجاحة ووقاحة اللي قدامك!
وكأن صوتك الداخلي يقول: "لحظة.. وقف تسوير (تصوير).. شنو قاعد يصير؟!" ويتجمد بعدين من الصدمة!

بداية اللحظة الحرجة: هل أنا فعلًا الغلطان؟!

وليت الأمور توقف هنا! لا.. لا.. كمّل السيناريو:
هم الآن يشوفون سكوتك دليل إنهم على حق!

والأسوأ؟
إنك تبدأ تشّك بنفسك.. "يمكن أنا الغلطان!"
الشعور اللي يخليك تعيد كل مشهد مية مرة علشان تتأكد: هل أنا فعلًا غلطان؟!

طيب كيف أحمي نفسي؟

للأسف إن هالأشكال بنقابلها كثير.. ولا مفرّ لنا من التعامل معهم 🤷🏻‍♀️!
علشان كذا قررت أدرّب نفسي على إني أتعامل معهم وبأقل الخسائر الممكنة، كيف؟! 👇🏻

• أسمي هالأسلوب باسم علشان يسهل علي وعلى مخي التعرف عليه وتصنيفه بشكل سريع

• أحافظ على طاقتي قدر الإمكان، يعني ما أبرر ولا أدخل حتى في نقاشات طويلة مع هالشخصيات (لأنه ما يشوف إلا إنه هو الصح.. فليش أتعب نفسي؟!)

• أحاول تكون ردودي واضحة وثابتة.. يعني أقول اختلاف الرأي لا يفسد للود قضية، والسلام (انسحب)

• أعرف إن الموضوع ممكن يكون مزعج للبعض، لذلك أنا شخصيًا أحاول أفرغ الطاقة السلبية اللي حسيتها.. أكتب، أو أتناقش مع أحد أثق فيه أو حتى أرسم..

يمكن الحياة ما تعلمنا كيف نرد بسرعة، لكنها بتعلمنا من دروسها كيف نحافظ على سلامتنا.. وعيش كثير تشوف أكثر..

أشوفك على خير إن شاء الله 19 نوفمبر 💖