هل أنت جزرة 🥕؟!

الصورة مولَّدة باستخدام الذكاء الاصطناعي

سؤال طرى على بالي فجأة وأنا أبشر حبات من الجزر 🥕.. وكل تركيزي كان على حركة يدي وأنا ماسكة الجزرة وأنا أحركها فوق تحت..

حزنت على الجزرة.. يعني رغم طبيعتها القوية كانت نهايتها كذا 😞💔!

كانت هاللحظة بداية تأملاتي في حال الجزرة اللي يشبه بعض حالاتنا أحيانًا.. كيف؟! خليني أشرح لك وأشارك معك بعض تأملاتي في ذيك اللحظة (الآن.. الآن.. وأنا اكتب عرفت ليش أنا بطيئة في إنجاز بعض المهام 😅)..

بين الجزرة والانسان 🥕👤

الجزرة كيف ما كانت مصيرها واحد، وهو: إنها تنأكل.. زي الإنسان بالضبط؛ مهما عاش وطال عمره في النهاية بيموت (يمكن الفكرة شكلها سوداويّة هنا 😅، بس صدقني ترا فيها حكمة أنت بس كمّل قراءة 😁).

💡: لو تأملنا هالنقطة، لقينا إن الفكرة ما تكمن دائمًا في النهاية! بل في كيف بنعيش حياتنا قبلها! ووش الأثر اللي بنتركه بعدها!

الجزرة مهما اختلفت ظروفها بتترك دائمًا أثر بعدها (لون، طعم، أو شكل).. بغض النظر كيف كانت نهايتها، سواء: مبشورة، مطبوخة، أو حتى نيّة.

درس جزري 📝🥕

مثل ما الجزرة تمر بمرحلة بشر أو طبخ، حتى احنا بعد نمر بظروف وتجارب تصقلنا صقل إنما ايه 👌🏻🌚.

💡: ولو تأملنا هالدرس، لقينا إن بعض التجارب تعلّمنا المرونة علشان نصير أسرع في التأقلم مع الأحداث، وبعضها يخلينا ننضج ونعرف وش اللي لازم نركز عليه.

باختصار 👈🏻: ترى هذي هي طبيعة الحياة، وكل مرحلة منها حتى لو متعبة قاعده تعلّمنا شيء يضيف لنا، بس ندعي إن ربي يفتح علينا علشان نشوف هالدروس..

فاصل قبل الختام ✨

مدري ليش قلبت الموضوع جدي! وهو مجرد شعشرة 😅..

بس خليني أختم هالعدد بشي لقيته على بنترست لما كنت أدور صورة مناسبة لعدد اليوم (كنت أبحث عن جزرة لو كان الموضوع يهمك 😁):

الرسمة الأصلية لـ FruitGoneBad – وهذي نسخة محسنة بالذكاء الإصطناعي**

لحظة!

تحسبني باكتفي بدون ما أشرح مثل ما تشرح الأستاذة 🦦؟

نقاط مهمة قبل الشرح:

- نطق كلمة grate = great

- معنى great: بخير، عظيم

- معنى grate: مبشور

اللحين بأشرح 🤓:

الجزرة الواقفة تقول للثانية: "يا ساتر! إنتِ بخير؟"

الثانية ترد عليها وتقول: "أنا مبشورة"

لكن لأن نطق grate نفس great، فالجزرة الأولى تحسب الثانية تقول أنا بخير

وفي رواية أخرى 👀:

الثانية كانت تحاول تبين إنها بخير رغم إن وضعها واضح، فعشان كذا هي تقول " great"، لكن صاحب الرسمة كتبها grate لأن الحقيقة واضحة..

وكل الروايتين تخليك تضحك لين تبكي 😓💔..

الخاتمة 💖

واللحين بعد خالص شكري على وصولك هنا 💖.. قول الصدق: هل أنت جزرة؟ هل أنت بخير؟!

أشوفك إن شاء الله في العدد الجاي يوم 19 أكتوبر 💅🏻💖

** لحظة.. تبي تشوف النسخة الأصلية من الكاريكتير؟ بتلقاه هنا